ភ្ជាប់​ទៅ​គេហទំព័រ​ទាក់ទង

ប្រជាប្រិយភាព​ Facebook របស់​អ្នក​នយោបាយ​មិន​គ្រប់គ្រាន់​ដើម្បី​ឈ្នះ​ការ​បោះឆ្នោត​ទេ

  • ហ៊ាន សុជាតា

រូប​សម្រោល​នៃ​អ្នក​ប្រើប្រាស់​ទូរស័ព្ទ​រួម​ជាមួយ​ស្លាក​សញ្ញា ​Facebook។

៥០%​នៃ​អ្នក​ប្រើប្រាស់​ហ្វេសប៊ុក​គឺជា​អ្នក​ដែល​គ្រប់​អាយុ​បោះឆ្នោត​ថ្មី​ ដែល​គេ​មើល​ឃើញ​ថា ជា​អ្នក​កំណត់​ជោគវាសនា​ល្បែង​នយោបាយ​នៅ​កម្ពុជា​នៅ​ក្នុង​ការ​បោះ​ឆ្នោត​ឆ្នាំ​២០១៧ និង​២០១៨​ខាង​មុខ។

បណ្តាញ​សង្គម​ហ្វេសប៊ុក​ (Facebook) បាន​ក្លាយ​ជា​សមរភូមិ​នយោបាយ​ថ្មី​មួយ​ទៀត​ក្នុង​ការ​ទាក់ទាញ​ប្រជាប្រិយភាព​រវាង​លោក​នាយក​រដ្ឋមន្រ្តី ​ហ៊ុន សែន​ និង​លោក ​សម​ រង្ស៊ី។​

៥០%​នៃ​អ្នក​ប្រើប្រាស់​ហ្វេសប៊ុក​គឺជា​អ្នក​ដែល​គ្រប់​អាយុ​បោះឆ្នោត​ថ្មី​ ដែល​គេ​មើល​ឃើញ​ថា ជា​អ្នក​កំណត់​ជោគវាសនា​ល្បែង​នយោបាយ​នៅ​កម្ពុជា​នៅ​ក្នុង​ការ​បោះ​ឆ្នោត​ឆ្នាំ​២០១៧ និង​២០១៨​ខាង​មុខ។ ក៏ប៉ុន្តែ​ អ្នក​ឃ្លាំ​មើល​នយោបាយ​ យល់​ថា ​តួលេខ​អ្នក​ប្រើប្រាស់​ទំព័រ​ហ្វេសប៊ុក​ទំនង​មិន​អាច​ឆ្លុះ​បញ្ចាំង​ពី​លទ្ធផល​បោះឆ្នោត​បាន​ទាំង​ស្រុង​នោះ​ទេ។ ពោល​គឺ​វា​អាស្រ័យ​លើ​ថា ​តើ​អ្នក​ប្រើប្រាស់​បណ្តាញ​សង្គម​នោះ​នឹង​ចុះ​ឈ្មោះ​បោះឆ្នោត​ដែរ​ឬទេ?​ ហើយ​ថា ​តើពួក​គេ​នឹង​ទៅ​បោះ​ឆ្នោត​ដែរ​ឬ​យ៉ាង​ណា?

រូបឯកសារ៖ អ្នក​ប្រើប្រាស់​ទូរស័ព្ទ​ទំនើប smartphone មួយ​ចុច​មើល​ទំព័រ​ហ្វេសប៊ុក​របស់​លោក​នាយរដ្ឋមន្ត្រី ហ៊ុន សែន នៃ​ប្រទេស​កម្ពុជា​ក្នុង​ពេល​ទទួល​អាន​អាហារ​ពេល​ព្រឹក​នៅ​ក្នុង​ភោជនីយដ្ឋាន​មួយ​នៅ​កណ្តាល​រាជធានី​ភ្នំពេញ​កាល​ពី​ថ្ងៃ​ទី​៧ ខែ​តុលា ឆ្នាំ​២០១៥។
រូបឯកសារ៖ អ្នក​ប្រើប្រាស់​ទូរស័ព្ទ​ទំនើប smartphone មួយ​ចុច​មើល​ទំព័រ​ហ្វេសប៊ុក​របស់​លោក​នាយរដ្ឋមន្ត្រី ហ៊ុន សែន នៃ​ប្រទេស​កម្ពុជា​ក្នុង​ពេល​ទទួល​អាន​អាហារ​ពេល​ព្រឹក​នៅ​ក្នុង​ភោជនីយដ្ឋាន​មួយ​នៅ​កណ្តាល​រាជធានី​ភ្នំពេញ​កាល​ពី​ថ្ងៃ​ទី​៧ ខែ​តុលា ឆ្នាំ​២០១៥។

ការ​ប្រកួត​ប្រជែង​ប្រជាប្រិយភាព​នៅ​លើ​បណ្ដាញ​សង្គម​ Facebook ​បាន​ក្លាយ​ជា​សង្គ្រាម​នយោបាយ​ថ្មី​មួយ​រវាង​គណបក្ស​ធំៗ​ទាំង​ពីរ​ក្នុង​ប្រទេស​កម្ពុជា។​ ជា​ពិសេស​គឺ​សង្គ្រាម​ថ្មី​រវាង​លោក​នាយក​រដ្ឋមន្ត្រី​ ហ៊ុន សែន និង​លោក​ សម រង្ស៊ី​ ប្រធាន​គណបក្ស​ជំទាស់​ដែល​ស្ថិត​ក្នុង​ការ​និរទេស​ខ្លួន​នៅ​ក្រៅ​ប្រទេស។​

ការ​ប្រកួត​ប្រជែង​នេះ​លេច​រូបរាង​កាន់​តែ​ច្បាស់​ទៀត​ នៅ​ពេល​ដែល​ការ​បោះឆ្នោត​ឆ្នាំ​២០១៧ និង​២០១៨​ ​កាន់​តែ​ខិត​ជិត​មក​ដល់។​ អ្នក​ឃ្លាំ​មើល​ការ​វិវឌ្ឍ​នយោបាយ​នៅ​កម្ពុជា​យល់​ថា​ នេះ​គឺ​ជា​ត្រៀម​ខ្លួន​របស់​អ្នក​នយោបាយ​កម្ពុជា​ក្នុង​ប្រកួត​ប្រជាប្រិយភាព​របស់​ខ្លួន​នា​ពេល​ខាង​មុខ។

កាល​ពី​ខែ​កញ្ញា​កន្លង​ទៅ​ លោក​នាយក​រដ្ឋមន្ត្រី​ ហ៊ុន សែន​ បាន​ប្រកាស​ទទួល​ស្គាល់​ជា​ផ្លូវការ​នូវ​ទំព័រ​ហ្វេសប៊ុក​របស់​លោក​ ក្រោយ​ពេល​បដិសេធ​ជា​ច្រើន​ឆ្នាំ។ ​ដោយ​មាន​ការ​ជ្រោមជ្រែង​ពី​ក្រុម​ការងារ​ Facebook​ ពិសេស​របស់​ខ្លួន ​ទំព័រ​របស់​លោក​ ហ៊ុន​ សែន​ ​កាន់​តែ​មាន​ភាព​សកម្ម​ខ្លាំង​ឡើងៗ​ ហើយ​នឹង​ទទួល​បាន​ការ​គាំទ្រ​ជាង​២,៣​លាន​ខ្ពស់​ជាង​ទំព័រ​លោក​ សម រង្សី​ ដែល​មាន​អ្នក​គាំទ្រ​ជាង​ ២,១​សែន​ត្រឹម​សប្តាហ៍​នេះ។​

​គេ​រំពឹង​ថា ទំព័រ​ Facebook ​របស់​លោក​ ហ៊ុន សែន​ នឹង​ក្លាយ​ជា​ទំព័រ​ដែល​ទទួល​បាន​ការ​គាំទ្រ​ច្រើន​ជាង​គេ​បំផុត​នៅ​កម្ពុជា​នា​ឆ្នាំ​២០១៧​ខាង​មុខ។ ​ពេល​នេះ​ចំនួន​អ្នក​គាំទ្រ​របស់​លោក​ស្ថិត​នៅ​ក្រោម​ទំព័រ​ហ្វេសប៊ុក ​VOA Khmer​ តែ​មួយ​គត់​ដែល​មាន​ចំនួន​ជិត​៣លាន​នាក់។

កាល​ពី​សប្តាហ៍​កន្លង​ទៅ​ លោក​ ហ៊ុន​ សែន​ ​បាន​បញ្ជា​ឲ្យ​មន្ត្រី​សាធារណៈ​របស់​ខ្លួន​បង្កើត​ក្រុម​ការងារ ​Facebook ​រៀងៗ​ខ្លួន ​និង​យក​ចិត្ត​ទុកដាក់​ដោះស្រាយ​បញ្ហា​នានា​របស់​ប្រជាពលរដ្ឋ​ដែល​បាន​រាយការណ៍​នៅ​លើ​បណ្តាញ​សង្គម ​Facebook។

លោក​ សុខ ឥសាន​ ជា​តំណាងរាស្ត្រ​ និង​អ្នក​នាំ​ពាក្យ​គណបក្ស​ប្រជាជន​កម្ពុជា​ ថ្លែង​គាំ​ទ្រ​ទៅ​លើ​ចំណាត់ការ​របស់​លោក ​ហ៊ុន សែន​ ដែល​មាន​ការ​គាំទ្រ​កើន​ឡើង​យ៉ាង​គំហុក​នេះ។​ លោក​ប្រាប់​VOA ​ថា នេះ​គឺ​ជា​ជ័យជម្នះ​មួយ​របស់​គណបក្ស​កាន់​អំណាច​ ក៏​ដូច​ជា​ជ័យជម្នះ​របស់​លោក​ ហ៊ុន សែន។​

«វា​មិន​ទាន់​គ្រប់គ្រាន់​ទេ។ វា​គឺ​ជា​ផ្នែក​មួយ​នៃ​ជ័យជម្នះ​របស់​គណបក្ស​ប្រជាជន​ ជា​ពិសេស​គឺ​របស់​សម្តេច​តេជោ​ ហ៊ុន សែន ក្នុង​នាម​លោក​ជា​បេក្ខភាព​នាយក​រដ្ឋមន្ត្រី​របស់​គណបក្ស​ប្រជាជន»។

អ្នក​នាំ​ពាក្យ​រូប​នេះ​ថា​ ភាព​សកម្ម​នៃ​នាយក​រដ្ឋមន្ត្រី ​ហ៊ុន សែន ​គឺ​ជា​ការ​សម្រប​ខ្លួន​ទៅ​តាម​និន្នាការ​នៃ​ការ​រីក​ចម្រើន​បច្ចេកវិទ្យា​ទំនើប​ក្នុង​សង្គម​កម្ពុជា។ ​ហើយ​នេះ​ក៏​ជា​វេទិកា​មួយ​ផ្សារ​ភ្ជាប់​ទំនាក់ទំនង​រវាង​ថ្នាក់​ដឹក​នាំ​ និង​ប្រជា​ពលរដ្ឋ​ដោយ​ផ្ទាល់​ ​ដែល​អនុញ្ញាតិ​ឲ្យ​ថ្នាក់​ដឹក​នាំ​អាច​ឆ្លើយ​តប​ទៅ​នឹង​សេចក្តី​ត្រូវការ​ជាក់​ស្តែង​របស់​ប្រជាពលរដ្ឋ​ទាន់​ពេលវេលា​ និង​កាន់​តែ​មាន​ប្រសិទ្ធភាព។

​យោង​តាម​របាយការណ៍​អង្កេត​របស់​មូលនិធិ​អភិវឌ្ឍន៍​អាស៊ី (Asia Foundation)​ ដែល​ឃ្លាំ​មើល​ការ​ប្រើប្រាស់​ Facebook ​ក្នុង​ប្រទេស​កម្ពុជា​ ​បាន​ឲ្យ​ដឹង​ថា ​ទំព័រ​ហ្វេសប៊ុក​របស់​លោក​នាយករដ្ឋមន្រ្តី​ ហ៊ុន​ សែន​ ដែល​មាន​អ្នក​គាំ​ទ្រ​ជាង​២,៣​លាន​នាក់​ បាន​ទទួល​បាន​ការ​ឆ្លើយ​ឆ្លង​ (engagement) ពី​អ្នក​ប្រើប្រាស់​ហ្វេសប៊ុក​ច្រើន​ជាង​គេ​បំផុត​បើ​ធៀប​នឹង​អ្នក​ប្រើប្រាស់​នានា​ក្នុង​ប្រ​ទេស។​

របាយការណ៍​អង្កេត​ដដែល​នេះ​បាន​ឲ្យ​ដឹង​ផង​ដែរ​ថា ភាគ​ច្រើន​ទំព័រ​របស់​លោក​ ហ៊ុន សែន​ បង្ហោះ​នូវ​ព្រឹត្តិការណ៍​នានា​ដែល​លោក​ ហ៊ុន​ សែន​ បាន​ចូលរួម​ និង​សមិទ្ធផល​របស់​គណបក្ស​កាន់អំណាច។ ផ្ទុយ​ទៅ​វិញ​ ​ទំព័រ​ហ្វេសប៊ុក​ផ្ទាល់​ខ្លួន​របស់ ​លោក​ សម រង្ស៊ី​ ដែល​មាន​អ្នក​គាំទ្រ​២,១​លាន​ បាន​បង្ហោះ​នូវ​បញ្ហា​សិទ្ធិ​មនុស្ស​ ជម្លោះ​ដីធ្លី​រាំរៃ​ករណី​ប្តឹង​តំណាងរាស្ត្រ​គណបក្ស​ប្រឆាំង​ ​និង​អំពើ​ហិង្សា​លើ​សកម្មជន​បក្ស​ប្រឆាំង​ជាដើម​ ​ដែល​ជា​ចំណុច​អវិជ្ជមាន​នៅ​ក្នុង​សង្គម​ ​ស្ថិត​ក្រោម​ការ​ដឹកនាំ​របស់​គណបក្ស​កាន់​អំណាច។

លោក យ៉ែម ប៉ុញ្ញឫទ្ធិ អ្នក​នាំ​ពាក្យ​គណបក្ស​សង្គ្រោះ​ជាតិ បាន​លើក​ឡើង​ថា​ប្រជាប្រិយភាព​នៅ​លើ​ទំព័រ ​Facebook ​មិន​ឆ្លុះ​បញ្ចាំង​ពី​លទ្ធផល​នៃ​ការ​បោះឆ្នោត​នា​ពេល​ខាង​មុខ​នោះ​ទេ។​ លោក​ថា ​ដូច​គ្នា​នឹង​ប្រព័ន្ធ​ផ្សព្វផ្សាយ​ផ្សេងៗ​រួមទំាង​ ​ទូរទស្សន៍​ វិទ្យុ​ដែរ ​បណ្តាញ​សង្គម​គ្រាន់​តែ​ជា​មធ្យោបាយ​មួយ​ផ្សេង​ទៀត​ដែល​អ្នក​ប្រើប្រាស់​អាច​ទទួល​បាន​ព័ត៌មាន​រហ័ស​ និង​ទាន់​ពេល​វេលា​ប៉ុណ្ណោះ។ ​រីឯ​ ការ​គាំទ្រ​ពិត​ប្រាកដ​គឺ​ស្ថិត​នៅ​លើ​សកម្មភាព​ជាក់​ស្តែង។​

រូបឯកសារ៖ មន្រ្តី​ជាន់​ខ្ពស់រាជរដ្ឋាភិបាល​កម្ពុជា​កំពុងប្រើប្រាស់ ​Smart Phone (ទូរស័ព្ទ​ដៃ​ទំនើប) ខណៈដែលកំពុងរង់ចាំ​លោក​នាយករដ្ឋមន្ត្រី ហ៊ុន សែន ត្រឡប់មក​ពីទស្សនកិច្ចនៅឯប្រទេសបារាំងវិញ​ កាល​ពី​ថ្ងៃ​ទី២៨ ខែតុលា ឆ្នាំ២០១៥។
រូបឯកសារ៖ មន្រ្តី​ជាន់​ខ្ពស់រាជរដ្ឋាភិបាល​កម្ពុជា​កំពុងប្រើប្រាស់ ​Smart Phone (ទូរស័ព្ទ​ដៃ​ទំនើប) ខណៈដែលកំពុងរង់ចាំ​លោក​នាយករដ្ឋមន្ត្រី ហ៊ុន សែន ត្រឡប់មក​ពីទស្សនកិច្ចនៅឯប្រទេសបារាំងវិញ​ កាល​ពី​ថ្ងៃ​ទី២៨ ខែតុលា ឆ្នាំ២០១៥។

លោក យ៉ែម ប៉ុញ្ញឫទ្ធិ ពន្យល់​ថា៖«ពាក្យ​ថា​ប្រជាប្រិយភាព​ខ្លាំង​នោះ​មិន​ដឹង​យក​អី​មក​វាស់​ទេ។ ហើយ​ចំពោះ​អ្នក ​Like Page ច្រើន​ឬ​មិន​ច្រើន គឺ​ថា​ដាក់​លុយ​ក្នុង​មួយ​ថ្ងៃៗ​ប៉ុន្មាន​ដើម្បី​ទិញ Like ឲ្យ​បាន​ច្រើន។​ តែ​អ្វី​ដែល​សំខាន់​ យើង​ត្រេកអរ​ដែល​លោក​[នាយករដ្ឋមន្ត្រី ហ៊ុន​ សែន​]បាន​ទទួល​ព័ត៌មាន​ពី​បណ្តាញ​សង្គម​ ហើយ​ដោះស្រាយ ក៏ប៉ុន្តែ​ក៏​មិន​ត្រូវ​ភ្លេច​ពី​ប្រព័ន្ធ​គ្រប់គ្រង​រដ្ឋ​ដែល​មាន​ពី​ថ្នាក់​មូលដ្ឋាន​ដល់​ថ្នាក់​ជាតិ»។

លោក ​យ៉ែម ប៉ុញ្ញឫទ្ធិ ​បន្ថែម​ថា​ ​ប្រតិកម្ម​របស់​លោក​នាយក​រដ្ឋមន្ត្រី​ ហ៊ុន​ សែន​ ក្នុង​ការ​ដោះ​ស្រាយ​បញ្ហា​ពី​លើ​ចុះ​ក្រោម​នេះ កើត​ចេញ​មក​ពី​ភាព​ទន់ខ្សោយ​នៃ​ប្រព័ន្ធ​គ្រប់គ្រង​រដ្ឋ​ ភាព​ឃ្លាត​គ្នា​រវាង​គោល​នយោបាយ​ថ្នាក់​ជាតិ​ និង​មូលដ្ឋាន​ដែល​បង្ក​ឲ្យ​មាន​ភាព​អសកម្ម​ក្នុង​ការ​បំពេញ​ការងារ​ដោយ​មន្ត្រី​សាធារណៈ។​

ឆ្លើយ​តប​នឹង​បញ្ហា​នេះ​ លោក ​សុខ ឥសាន​ ​ថ្លែង​ថា ​ការ​ដោះស្រាយ​បញ្ហា​ដែល​ធ្វើ​ឡើង​ដោយ​លោក ហ៊ុន សែន​ តាម​ទំព័រ​ហ្វេសប៊ុក​នេះ មិន​មែន​ដោយសារ​អសមត្ថភាព​ ឬ​ភាព​អសកម្ម​នៃ​មន្រ្តី​ក្រោម​អំណាច​នោះ​ទេ។​

លោក​ពន្យល់​ដោយ​ការពារ​ចំណាត់ការ​របស់​លោក ​ហ៊ុន សែន ​យ៉ាង​ដូច្នេះ​ថា៖​

«កន្លែង​ណា​ដែល​ត្រូវ​នាយក​រដ្ឋមន្ត្រី​ដោះស្រាយ កន្លែង​ណា​ដែល​ត្រូវ​មូលដ្ឋាន​ដោះស្រាយ។ ចឹង​ទេ ពេល​ណា​ដែល​នាយករដ្ឋ​មន្រ្តី​ដោះ​ស្រាយ លោក​ដោះស្រាយ​ភ្លាម។ កន្លែង​ណា​ជា​សមត្ថកិច្ច​របស់​ថ្នាក់​មូលដ្ឋាន​ គាត់​បញ្ជា​ទៅ​ថ្នាក់​មូលដ្ឋាន​ឲ្យ​ដោះស្រាយ។ អាហ្នឹង​ទៅ​តាម​ឋានានុក្រម​ការងារ​មិន​មែន​ទាំង​អស់​នាយក​រដ្ឋមន្ត្រី​ដោះស្រាយ»។​

យ៉ាង​ណា​ក៏​ដោយ​ លោក​ អ៊ូ រិទ្ធី ​ស្ថាបនិក​វ័យ​ក្មេង​របស់​កាហ្វេ​នយោបាយ​ ឬ​Politikoffee​ និង​ជា​អ្នក​សកម្ម​ម្នាក់​ក្នុង​បណ្តាញ​សង្គម​ផង​នោះ​ ប្រាប់ ​VOA ​ថា ​ការ​ផ្តល់​ជា​ដំណោះស្រាយ​ភ្លាមៗ​តាមរយៈ​ទំព័រ​ហ្វេសប៊ុក​របស់​លោក​នាយក​រដ្ឋមន្ត្រី​នេះ ​កើត​មាន​ឡើង​តែ​ចំពោះ​បញ្ហា​តូច​តាច​ប៉ុណ្ណោះ​ តួ​យ៉ាង​ការ​ផ្តល់​សេវា​សាធារណៈ​ជា​ដើម។ ​ដោយ​ឡែក​បញ្ហា​សំខាន់ៗ​ដូច​ជា​បញ្ហា​ពុក​រលួយ​ សិទ្ធិ​មនុស្ស​ ចំណាក​ស្រុក​ជម្លោះ​ដី​ធ្លី​រាំរ៉ៃ​ ការ​កាប់​បំផ្លាញ​ព្រៃ​ឈើ​ ផលិត​ផល​កសិកម្ម​ចុះ​ថោក​ និង​បញ្ហា​ផ្សេង​ទៀត​ នៅ​មិន​ទាន់​អាច​ផ្តល់​ជា​ដំណោះ​ស្រាយ​បាន​នៅ​ឡើយ​នោះ​ទេ។

«ខ្ញុំ​គិត​ថា​ មក​ដល់​ឥឡូវ​មិន​ទាន់​អាច​និយាយ​បាន​ថា​ចំនួន​អ្នក ​Likeហ្នឹង​ ជា​អ្នក​បោះ​ឆ្នោត​ឲ្យ​លោក​នាយក​រដ្ឋមន្ត្រី ហ៊ុន​ សែន​ ទេ។ ទាំង​ខ្ញុំ​ទាំង​គេ ទាំង​គណបក្ស​ប្រឆាំង​ក៏​ចុច​ Like ទំព័រហ្វេកប៊ុក (Click Like Page) លោក​ ហ៊ុន​សែន​ ដែរ​ ដើម្បី​ទទួល​បាន​ព័ត៌មាន»។

សម្រាប់​លោក អ៊ូ រិទ្ធី ​ហ្វេសប៊ុក​គឺ​ជា​អាវុធ​មុខ​២​សម្រាប់​អ្នក​នយោបាយ៖

«ទី​១​គឺ​ធ្វើ​ឲ្យ​លោក​នាយក​រដ្ឋមន្ត្រី ហ៊ុន​ សែន​ សន្សំ​ប្រជាប្រិយភាព​ពី​យុវជន​ដែល​ប្រើប្រាស់​ហ្វេសប៊ុក​ដែល​ជា​អ្នក​បោះឆ្នោត​ថ្មី​ ដែល​កំណត់​ជោគ​វាសនា​ថា​ អ្នក​ណា​ឈ្នះ​ អ្នក​ណា​ចាញ់។ ធ្វើ​ខ្លួន​ឲ្យ​សាមញ្ញ ​ដោះ​ស្រាយ​បញ្ហា​ប្រជា​ជន ​ហើយ​ដាក់​នៅ​លើ​ហ្វេសប៊ុក ​ដើម្បី​រក​ប្រជាប្រិយភាព។​ ក៏ប៉ុន្តែ​ កាំបិត​មួយ​ទៀត​ដែល​ជា​បញ្ហា​ ប្រសិន​បើ​គាត់​ប្រតិកម្ម​បែប​អវិជ្ជមាន បែប​អំពើ​ហិង្សា​ទៅ​ចាប់​គេ​ដាក់​គុក​ជា​ដើម​ វា​ជា​រឿង​មួយ​ដែល​គ្រោះថ្នាក់​សម្រាប់​គាត់​ គឺ​បាត់​ប្រជាប្រិយភាព​លឿន​បំផុត»។

​គិត​មក​ត្រឹម​ខែ​វិច្ឆិកា​ ឆ្នាំ​២០១៥​ អ្នក​ប្រើប្រាស់​ហ្វេសប៊ុក​នៅ​កម្ពុជា​មាន​ចំនួន​៣,៣​សែន​នាក់។ ក្នុង​នោះ​ស្ទើរ​តែ​៥០%​នៃ​អ្នក​ប្រើ​ប្រាស់​ហ្វេសប៊ុក​គឺ​ជា​យុវជន​ដែល​គ្រប់​អាយុ​បោះឆ្នោត​ថ្មី។ បណ្តាញ​សង្គម​ហ្វេស​ប៊ុក​ត្រូវ​បាន​គេ​មើល​ឃើញ​ថា ​ជា​ចំណង​ភ្ជាប់​សំខាន់​មួយ​ ឬ​ជា​វេទិកា​ឆ្លង​ឆ្លើយ​ដ៏​មាន​ឥទ្ធិពល​រវាង​សាធារណជន​ និង​ថ្នាក់​ដឹកនាំ។

រូបឯកសារ៖ ​អ្នកបោះឆ្នោត​មួយ​រូប​នៅ​ក្នុង​មណ្ឌល​បោះឆ្នោត​សាលាបឋមសិក្សា​ព្រះនរោត្តម​នៅ​រាជធានី​ភ្នំពេញ​ចូល​រួម​បោះឆ្នោត​ជ្រើស​រើសក្រុមប្រឹក្សា​រាជធានី​ខេត្ត ក្រុង ស្រុក ខណ្ឌ អាណត្តិ​ទី២ កាល​ពី​ថ្ងៃព្រឹក​ថ្ងៃ​អាទិត្យ​ទី​១៨ ខែ​ឧសភា ឆ្នាំ​២០១៤។ (ស៊ុយ ហ៊ាមខេមរា/VOA)
រូបឯកសារ៖ ​អ្នកបោះឆ្នោត​មួយ​រូប​នៅ​ក្នុង​មណ្ឌល​បោះឆ្នោត​សាលាបឋមសិក្សា​ព្រះនរោត្តម​នៅ​រាជធានី​ភ្នំពេញ​ចូល​រួម​បោះឆ្នោត​ជ្រើស​រើសក្រុមប្រឹក្សា​រាជធានី​ខេត្ត ក្រុង ស្រុក ខណ្ឌ អាណត្តិ​ទី២ កាល​ពី​ថ្ងៃព្រឹក​ថ្ងៃ​អាទិត្យ​ទី​១៨ ខែ​ឧសភា ឆ្នាំ​២០១៤។ (ស៊ុយ ហ៊ាមខេមរា/VOA)

អ្នក​តាម​ដាន​ស្ថានភាព​នយោបាយ​រូប​នេះ​ក៏​លើក​ឡើង​ថា​ បើ​យើង​មើល​តែ​មួយ​ភ្លែត​ ហាក់​បង្ហាញ​ថា​ ចំនួន​អ្នក​ប្រើប្រាស់​ហ្វេសប៊ុក​ ជា​អ្នក​កំណត់​ជោគ​វាសនា​ល្បែង​នយោបាយ​នៅ​កម្ពុជា ចំពោះ​ការ​បោះឆ្នោត​ឆ្នាំ​២០១៧ និង​២០១៨​ខាង​មុខ។ ក៏ប៉ុន្តែ​ តួលេខ​អ្នក​ប្រើប្រាស់​ទំព័រ​ហ្វេសប៊ុក​ទំនង​មិន​អាច​ឆ្លុះ​បញ្ចាំង​ពី​លទ្ធផល​បោះឆ្នោត​បាន​ទាំង​ស្រុង​នោះ​ទេ។ ពោល​គឺ​វា​អាស្រ័យ​លើ​ថា ​តើ​អ្នក​ប្រើប្រាស់​បណ្តាញ​សង្គម​នោះ​នឹង​ចុះ​ឈ្មោះ​បោះឆ្នោត​ដែរ​ឬទេ? ហើយ​ថា ​តើពួក​គេ​នឹង​ទៅ​បោះ​ឆ្នោត​ដែរ​ឬ​យ៉ាង​ណា?

​លោក​ គល់ បញ្ញា​ នាយក​ប្រតិបតិ្ត​អង្គការ​ខុមហ្វ្រែល​ ដែល​ឃ្លាំមើល​ការ​បោះឆ្នោត​នៅ​កម្ពុជា​អះអាង​ប្រាប់​ VOA ​ថា ​ការណ៍​នេះ​មិន​ជា​កញ្ចក់​ឆ្លុះ​បញ្ចាំង​ពី​លទ្ធផល​បោះឆ្នោត​នា​ពេល​ខាង​មុខ​នោះទេ។

«គ្រាន់​តែ​ថា ​បើ​សិន​ជា​មាន​គេ ​Like ច្រើន​ Pageហ្នឹង​មាន​គេ​ចាប់អារម្មណ៍។ វា​វិជ្ជមាន​ហើយ។​ តែ​វា​មិន​ឆ្លុះ​បញ្ចាំង​នឹង​លទ្ធផល​បោះឆ្នោត​អី​ទេ។ វា​អត់​មាន​ទាក់ទង​គ្នា។ តែ​ខ្ញុំ​ឃើញ​ចំណុច​គួរ​ឲ្យ​ចាប់​អារម្មណ៍​នោះ​គឺ​ ការ​ឆ្លើយ​តប​យក​បញ្ហា​ដែល​គេ​លើក​នៅ​លើ​សារ​ ហើយ​គាត់​ខិត​ខំ​ឆ្លើយ​តប​ខ្លះៗ​ហ្នឹង​ហើយ​ដែល​ជា​ចំណុច​នាំ​ឲ្យ​មាន​ការ​ចូល​រួម​ ចុចLike និង ​Shareច្រើន»។

ស្រប​ពេល​ដែល​ការ​ប្រើប្រាស់​ហ្វេសប៊ុក​មាន​ការ​កើន​ឡើង​នោះ ក្តី​បារម្ភ​ជុំវិញ​ការ​ប្រើប្រាស់​បណ្តាញ​សង្គម​នេះ​នៅ​តែ​ជា​កង្វល់​សម្រាប់​អ្នក​ប្រើប្រាស់។​ ប៉ុន្មាន​ខែ​ចុង​ក្រោយ​នេះ​ មាន​ការ​ចាប់​ខ្លួន​អ្នក​ប្រើប្រាស់​បណ្តាញ​សង្គម​មួយ​ចំនួន​ ដែល​ធ្វើ​ការ​រិះគន់​ប្រមាថ​រដ្ឋាភិបាល ​ឬ​ថា្នក់​ដឹកនំា​នៃ​គណបក្ស​កាន់​អំណាច។​ ការណ៍​នេះ​បង្ក​ឲ្យ​អ្នក​ប្រើប្រាស់​ហ្វេសប៊ុក​មួយ​ចំនួន​ធំ ខ្លាច​រអា​ក្នុង​ការ​បញ្ចេញ​យោបល់​រិះគន់​នៅ​លើ​បណ្តាញ​សង្គម​ដ៏​មាន​ឥទ្ធិពល​នេះ។​

​យោង​តាម​របាយការណ៍​មួយ​របស់​មជ្ឈមណ្ឌល​សិទ្ធិ​មនុស្ស​កម្ពុជា​ CCHR ​ស្តី​ពី​ការ​បង្ក្រាប​ទៅ​លើ​អ្នក​ប្រើ​ប្រាស់​ហ្វេសប៊ុក​ ហើយ​ចេញផ្សាយ​នា​សប្តាហ៍​នេះ​ ​បាន​ឲ្យ​ដឹង​ថា​ ​យ៉ាង​ហោច​ណាស់​មាន​មនុស្ស​២៤នាក់ ​រង​ការ​គំរាមកំហែង​ជា​សាធារណៈ​ដោយសារ​ការ​បញ្ចេញ​មតិ​នៅ​លើ​បណ្តាញ​សង្គម។​

លោកស្រី​ ឆាយ ឈុនលី​ គឺ​ជា​អ្នកសម្រប​សម្រួល​គម្រោង​ការពារ​សេរីភាព​មូលដ្ឋាន​នៃ​ CCHR​ ឲ្យ​ដឹង​ថា​ មាន​ការ​កើន​ឡើង​នូវ​ការ​ចាប់​ខ្លួន​ប្រជាពលរដ្ឋ​ដោយសារ​ការ​រិះ​គន់​នាយក​រដ្ឋមន្ត្រី ហ៊ុន សែន​ និង​បុគ្គល​សាធារណៈ​មួយ​ចំនួន​នៅ​កម្ពុជា​ជា​បន្ត​បន្ទាប់។​

«នៅ​ក្នុង​លទ្ធិ​ប្រជា​ធិបតេយ្យ​ គេ​គោរព​នូវ​សេរីភាព​នៃ​ការ​បញ្ចេញ​មតិ​គ្រប់​ទម្រង់​ទាំង​អស់​ ​ទាំង ​Online [ក្នុង​បណ្តាញ​អ៊ីនធឺណិត]​ ​និង ​Offline [ក្រៅ​បណ្តាញ​អ៊ីនធឺណិត]។​ អញ្ចឹង​បើ​មាន​ការ​រឹត​ត្បិត​ការ​បញ្ចេញ​មតិ ​Online​ ​វា​ធ្វើ​ឲ្យ​មាន​ការ​បិទ​សេរីភាព​បញ្ចេញ​មតិ​មួយ​ផ្នែក​ហើយ»។​

​លោក​ស្រី ​ឆាយ ឈុនលី ​ចង់​ឲ្យ​សេរីភាព​នៃ​ការ​បញ្ចេញ​មតិ​នៅ​លើ​ប្រព័ន្ធ​អ៊ីនធឺណិត​នៅ​កម្ពុជា​ត្រូវ​បាន​ទទួល​ស្គាល់​ និង​ជៀសផុត​ពី​ការ​គំរាមកំហែង។​ មួយ​វិញ​ទៀត​ លោកស្រី​យល់​ថា ​រដ្ឋាភិបាល​គប្បី​ធ្វើ​ការ​សិក្សា​ និង​ស៊ើប​អង្កេត​ទៅ​លើ​ករណី​នីមួយៗ​ឲ្យ​បាន​ច្បាស់​ជា​មុន​សិន​ មុន​ពេល​ធ្វើ​ការ​ចាប់​ខ្លួន​បុគ្គល​ណា​ម្នាក់​នោះ។​

​បណ្តាញ​សង្គម​រួម​ទាំង​ហ្វេសប៊ុក​ (Facebook) ត្រូវ​បាន​គេ​ប្រើប្រាស់​យ៉ាង​ច្រើន​នៅ​កម្ពុជា​ ចាប់​តាំង​ពី​មុន​ការ​បោះឆ្នោត​ឆ្នាំ​២០១៣ ​ពេល​ដែល​បណ្តាញ​ព័ត៌មាន​កម្ពុជា​ជា​ច្រើន​ រួម​ទាំង​វិទ្យុ​ និង​ទូរទស្សន៍​ស្ថិត​ក្រោម​ការ​រឹតត្បឹត​របស់​រដ្ឋាភិបាល។

ក្រោយ​ការ​បោះឆ្នោត​ឆ្នាំ​២០១៣​ និង​ក្នុង​អំឡុង​ពេល​ជាប់​គាំង​នយោបាយ​ជិត​មួយ​ឆ្នាំ​ គណបក្ស​ជំទាស់​សង្គ្រោះ​ជាតិ​ បាន​ប្រើប្រាស់​បណ្តាញ​សង្គម​ដើម្បី​ប្រមូល​ និង​ដើរ​ក្បូន​បាតុកម្ម​នានា​តាម​ដង​ផ្លូវ​ក្នុង​ទីក្រុងភ្នំពេញ៕

XS
SM
MD
LG