ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

បន្ថែម​លើ​បញ្ហា​កូវីដ១៩ សហភាព​អឺរ៉ុប​ប្រឈម​នឹង​ការប្រយុទ្ធ​​ដ៏​សំខាន់​​ផ្សេងទៀត


រូបឯកសារ៖ មនុស្ស​ដើរ​ហែក្បួន​ក្នុងពេល​តវ៉ា​ប្រឆាំងនឹង​រដ្ឋាភិបាល​ដែល​ត្រូវបាន​ចោទ​ប្រកាន់​ថា បាន​ប្រើប្រាស់ spyware ដ៏​មាន​អានុភាព​ដើម្បី​ឈ្លបមើល​គូប្រជែង​នៅ​ទីក្រុង Budapest ប្រទេស​ហុងគ្រី កាលពី​ថ្ងៃទី២៦ ខែកក្កដា ឆ្នាំ២០២១។

ប្រទេស​ហុងគ្រី​ កំពុង​ស្ថិត​នៅ​ក្នុង​បញ្ជី​នៃ​ការ​ព្រួយ​បារម្ភ​កាន់​តែ​ខ្លាំង​របស់​សហភាព​អឺរ៉ុប ដែល​រួម​មាន​ការ​ធ្វើ​ច្បាប់​ដ៏​ចម្រូង​ចម្រាស​ស្ដី​អំពី​មនុស្ស​ស្រឡាញ់​ភេទ​ដូច​គ្នា​ និងការ​លួច​ទិន្នន័យ​របស់​អ្នក​សារព័ត៌មាន ​សកម្មជន​សិទ្ធិ​មនុស្ស ​និង​អ្នក​នយោបាយ​ប្រឆាំងជា​ច្រើន​នាក់។

ប្រទេស​ប៉ូឡូញ បាន​ច្រាន​ចោល​នូវ​សេចក្ដី​សម្រេច​របស់​តុលាការ​កំពូលសហភាព​អឺរ៉ុប ដោយ​អះអាង​ថា រដ្ឋ​ធម្មនុញ្ញ​របស់​ខ្លួន​មានអាទិភាព​លើ​ទៅ​ច្បាប់​នានា​របស់​សហភាពអឺរ៉ុប​ដែល​ខ្លួន​បាន​ចូល​រួម​កាល​ពី​ឆ្នាំ ២០០៤ បើ​ទោះ​បី​ជា​ពេល​នេះ ​ប៉ូឡូញ​ហាក់​ដូច​ជា​បានដក​ថយ​វិញ​ចំពោះ​ការ​អះអាង​បែប​នេះក្តី។

ចំណែក​នៅ​ភាគ​ខាង​ជើង​ហើយ​ពាក់​ព័ន្ធ​នឹង​រឿង​នយោបាយ​វិញ ​រដ្ឋាភិបាល​ឆ្វេង​និយម​របស់​ប្រទេស​ដាណឺម៉ាក ក៏​កំពុង​កើត​មាន​កម្ដៅ​ខាង​ផ្លូវ​ច្បាប់​ទៅ​លើ​សេចក្ដី​សម្រេចថ្មីៗ​របស់​ខ្លួន​ក្នុង​ការ​បញ្ជូន​ជន​អន្តោប្រវេសន៍​ស៊ីរី​រាប់​រយ​នាក់​ទៅ​ទីក្រុង​ដាម៉ាស​វិញ។ ​ការ​ធ្វើ​ដូច្នេះ​ ត្រូវ​បាន​អ្នក​រិះ​គន់​និយាយ​ថា ប្រទេស​នេះ​ កំពុង​រំលោភ​លើ​សិទ្ធិ​មនុស្ស​ជាមូលដ្ឋាន ហើយ​អាច​បង្កើត​បាន​ជា​ទម្លាប់​ដ៏​គ្រោះ​ថ្នាក់​មួយ​សម្រាប់​ការ​បណ្ដេញ​ចេញ​ផ្សេងៗ​ទៀត​នា​ពេល​អនាគត។

ស្រប​ពេល​ជាមួយ​នឹង​ការ​ប្រយុទ្ធ​ប្រឆាំង​ទៅ​នឹង​ជំងឺ​រាតត្បាត​កូវីដ១៩ និង​ផល​ប៉ះ​ពាល់​ផ្នែក​សេដ្ឋកិច្ច សហភាព​អឺរ៉ុប​កំពុង​ប្រយុទ្ធ​ប្រឆាំង​យ៉ាង​ស្វិត​ស្វាញ​ទៅ​លើ​ការ​គំរាម​កំហែង​ដែល​កើត​ស្រាប់ នៅ​ខណៈ​ពេល​ដែល​គោលការណ៍​គ្រឹះ​ប្រជាធិបតេយ្យ​ នីតិរដ្ឋ និងសិទ្ធិ​មនុស្ស​របស់​ខ្លួន​កំពុង​ប្រឈមនឹង​បញ្ហា​ជា​ច្រើន​ដែល​កើត​មាន​នៅ​ក្នុង​ប្លុក​នេះ។ បញ្ហា​ប្រឈម​ទាំង​នោះ​ ត្រូវ​បាន​អ្នក​ឃ្លាំ​មើល​មួយ​ចំនួន​និយាយ​ថា ប្លុក​ដែល​មាន​ប្រទេស​សមាជិក​ចំនួន ២៧ នេះ​ មិន​បាន​ត្រៀម​ខ្លួន​ជាមុន​នោះ​ទេ។

ប្រធានាធិបតី​បារាំង លោក អេម៉ាណូអែល ម៉ាក្រុង (Emmanuel Macron) កាល​ពី​ពេល​ថ្មីៗ​នេះ​ ​បាន​និយាយ​សំដៅ​ដល់​ប្រទេស​ហុងគ្រី និង​ប៉ូឡូញ ក្នុង​ចំណោម​ប្រទេស​ផ្សេង​ទៀត ដោយ​លោក​ព្រមាន​ថា​ ពួក​គេ​កំពុង​ប្រឆាំងនឹង​ការ​អភិរក្ស​បែប​សេរីនិយម ដែល​ការ​នេះ​ធ្វើ​ឲ្យ​ខូច​នូវ​តម្លៃ​របស់​សហភាព​អឺរ៉ុប និង​តម្លៃស្នូលនៃ​ប្រជាធិបតេយ្យ​សេរីនិយម​របស់​បស្ចឹម​លោក​រាប់​សតវត្សរ៍​មក​ហើយ។

លោក​ Sebastien Maillard នាយក​វិទ្យាស្ថាន​ Jacques Delors មាន​មូលដ្ឋាន​នៅ​ទីក្រុង​ប៉ារីស​បាន​ថ្លែង​ថា៖ «លទ្ធិ​ប្រជាធិបតេយ្យ​ គឺជា​រឿង​សំខាន់​បំផុត​នៅ​សហភាពអឺរ៉ុប​តាំង​ពី​ដើម​រៀង​មក»។

លោក ម៉ាក្រុង បាន​ថ្លែង​ថា៖ «បញ្ហា​ដែល​រដ្ឋ​ជា​សមាជិក​កំពុង​ប្រឈមនេះ វា​ជា​ការ​គំរាម​កំហែង​ដ៏​ធំ​មួយ​ ពីព្រោះ​សហភាព​អឺរ៉ុបបង្កើតឡើងដោយ​ច្បាប់។ ប្លុក​នេះ​គ្មាន​កងទ័ព​ទេ ហើយ​អំណាច​តែ​មួយ​គត់​របស់​សហភាព​អឺរ៉ុបនោះ​ គឺ​អំណាច​ផ្លូវ​ច្បាប់»។

នៅ​ពេល​ចម្ងល់​ជា​ច្រើន​កំពុង​កើត​មាន​ថា​ តើ​ប្លុក​នេះ​មាន​សមត្ថភាព​ដោះ​ស្រាយ​បញ្ហា​ទាំង​នេះ​បាន​ដោយ​ខ្លួន​ឯង ​ឬ​យ៉ាង​ណា​នោះ​ ពេល​នេះ​សហភាព​អឺរ៉ុប​ កំពុង​សម្រួច​នូវ​កិច្ច​ការ​ពារ​របស់​ខ្លួន។ ទស្សនាវដ្ដី​ The Atlantic ​បាន​ចេញ​ផ្សាយ​កាល​ពី​ឆ្នាំ​មុន​ដោយ​ដាក់​ចំណង​ជើង​ថា ​«សហភាព​អឺរ៉ុប​កំពុង​សម្លឹង​មើល​ នៅ​ពេល​ដែល​ប្រទេស​ហុងគ្រី​កំពុង​សម្លាប់​លទ្ធិប្រជា​ធិបតេយ្យ» ដោយ​បាន​បន្ទរ​តាម​ការ​វិភាគ​វាយ​តម្លៃនានា។

អ្នក​ឃ្លាំ​មើល​មួយ​ចំនួន​មើល​ឃើញ​ថា មេដឹក​នាំ​អឺរ៉ុប​ កំពុង​និយាយ​រិះ​គន់​សមាជិក​មួយ​ចំនួន​ដែល​ប្រឆាំង។ ​ការរិះ​គន់​នា​ពេល​នេះ​ មិនសូវ​ធ្លាប់​កើត​ឡើង​កាល​ពី​ពេល​មុនទេ។ គណៈ​កម្មការ​អឺរ៉ុប ដែល​ជា​ផ្នែក​អនុវត្ត​ច្បាប់​របស់​សហភាព​អឺរ៉ុប​ កំពុង​ពិចារណ​លើ​ការ​ដាក់​ទណ្ឌកម្ម​ផ្នែក​ហិរញ្ញវត្ថុ​ថ្មី​ ទៅ​លើ​អ្នក​ល្មើស​ច្បាប់​ចម្បងៗ​មួយ​ចំនួន។

មិន​ទាន់​គ្រប់​គ្រាន់

យ៉ាងណា​ក៏​ដោយ សម្រាប់​មនុស្ស​ជា​ច្រើន ការ​រិះ​គន់​ទាំង​នោះ​ មិន​ទាន់​គ្រប់​គ្រាន់​នោះ​ទេ។

លោក Mark Rutte ​នាយក​រដ្ឋមន្ត្រី​នៃប្រទេស​ហូឡង់​ បាន​ថ្លែង​កាល​ពី​ខែ​មិថុនា​ថា៖ «សម្រាប់​ខ្ញុំ សហភាព​អឺរ៉ុប​មិន​មាន​កន្លែង​ទំនេរ​សម្រាប់​ទទួល​យក​ប្រទេសហុងគ្រី​ទៀត​ទេ»។ ចំណែក​លោក​ Jean Asselborn រដ្ឋ​មន្ត្រី​ការបរទេស​លុចសំបួ និង​ជា​រដ្ឋ​មន្ត្រី​ការបរទេស​សហភាព​អឺរ៉ុប​ដែរ​នោះ បាន​ស្នើឲ្យ​មាន​ការ​ធ្វើ​ប្រជាមតិ​មួយ​លើ​សមាជិកភាព​របស់​សហភាព​អឺរ៉ុប។

ការ​ស្តីបន្ទោស​បន្ទាប់​ គឺ​ជាពេល​ដែល​សំដៅ​ទៅ​លើ​ប្រទេស​ប៉ូឡូញ​ ដែលសហភាពអឺរ៉ុបបានដាក់សម្ពាធឲ្យ​អនុវត្ត​តាម​ការ​សម្រេច​របស់​តុលាការ​កំពូល​សហភាព​អឺរ៉ុប។ តុលាការ​នេះ​ បាន​វិនិច្ឆ័យក្តីប្រឆាំងទៅនឹងប្រព័ន្ធ​ដាក់ពិន័យចៅក្រមរបស់ខ្លួន​ដោយ​បញ្ជាក់​អះអាង​ថា ​ប៉ូឡូញ​បាន​ធ្វើ​ឲ្យ​ខូច​ឯករាជ្យភាព​នៃ​ប្រព័ន្ធ​តុលាការ ឬ​ត្រូវ​ប្រឈម​នឹង​ការ​ផាក​ពិន័យ​ជា​ប្រាក់​ ដែល​វិធានការ​នេះ​ អាច​នឹង​ត្រូវ​បាន​ប្រើ​ប្រាស់ខ្លាំងឡើង​ទៅ​លើ​អ្នក​រំលោភ​បំពាន​ច្បាប់ផ្សេង​ទៀត។ នេះ​បើ​យោង​តាម​របាយការណ៍​ដដែល។

ប្រទេស​ប៉ូឡូញ កាល​ពី​ដំបូង​បាន​តបត​យ៉ាង​ខ្លាំង​ទៅ​លើ​សេចក្ដី​សម្រេច​នេះ។ លោក Zbigniew Ziobro ​រដ្ឋ​មន្ត្រី​យុត្តិធម៌​ប៉ូឡូញ បាន​ព្រមាននៅ​ក្នុង​កិច្ច​សម្ភាសន៍​មួយ​ថា ប្រទេស​របស់​លោក​ មិន​គួរ​ស្ថិត​នៅ​ក្នុង​សហភាព​អឺរ៉ុប​ទៀត​ទេ ទោះ​ក្នុង​តម្លៃ​ណា​ក៏​ដោយ ដោយ​លោក​បាន​ចោទ​ប្រកាន់​ក្រុម​ប្រទេស​នេះ​ថា បាន​មួលបង្កាច់បង្ខូច​ប្រទេស​របស់លោក។ ប៉ុន្តែ​ កាលពី​ដើមខែសីហា គឺ​ប៉ុន្មាន​ម៉ោង​បន្ទាប់​មក លោក Jaroslaw Kaczynski ​ឧប​នាយករដ្ឋ​មន្ត្រី និង​ជា​ប្រធាន​គណបក្ស​កាន់​អំណាច ​បាន​ថ្លែង​ថា រដ្ឋាភិបាល​ទីក្រុង​វ៉ាសូវី​ នឹង​ទម្លាក់​ចោល​នូវ​ប្រព័ន្ធ​ដាក់​វិន័យ​ដែល​ខ្លួន​កំពុង​មាន។

កាល​ពី​ខែ​មុន សហភាព​អឺរ៉ុប​ដែល​មាន​ស្នាក់​ការ​នៅ​ទីក្រុង​ប៊្រុចសែល ក៏​បាន​ចាប់​ផ្ដើម​នីតិវិធី​តាម​ផ្លូវ​ច្បាប់​ប្រឆាំង​នឹង​ប្រទេស​ប៉ូឡូញ និង​ហុងគ្រី ផង​ដែរ​ ដោយ​សារ​តែ​ប្រទេស​ទាំង​ពីរ​នេះ​ បាន​ដាក់​វិធានការ​នានា​ដែល​សហភាព​អឺរ៉ុប​មើល​ឃើញ​ថា​ ជា​ការ​រំលោភ​លើ​សិទ្ធិ​របស់​មនុស្ស​ស្រឡាញ់ភេទ​ដូច​គ្នា។ គោល​ដៅ​សំខាន់​មួយនៃ​ច្បាប់​ថ្មី ហុងគ្រី គឺ​ហាម​ក្មេងៗ​មិន​ទាន់​គ្រប់​អាយុ​ដឹងពី​បញ្ហាមនុស្ស​ស្រឡាញ​ភេទ​ដូច​គ្នា​។ នៅ​ជំហាន​ដំបូង ប្រទេស​ហុងគ្រី​ បាន​ចាប់​ផ្ដើម​រឹត​ត្បិតលើ​សៀវភៅ​កុមារ​ដែល​សរសេរ​លើក​កម្ពស់​ខ្លឹម​សារ​ស្ដី​ពី​មនុស្ស​ប្រុស​ស្រឡាញ់​ភេទ​ដូច​គ្នា​ និង​មនុស្ស​កែ​ភេទ។

ទីក្រុង​ប៊្រុចសែល​ ក៏​ជាជើងឯក​ចំពោះ​បញ្ហា​ជាច្រើន​ផ្សេង​ទៀត​ដែរ។ កាលពី​ខែ​មិថុនា មេដឹកនាំ​អឺរ៉ុប​ចំនួន ១៧ រូប​បាន​ចុះ​ហត្ថលេខា​លើ​លិខិត​ចំហ​មួយ​អំពាវនាវ​ឲ្យ​ប្លុក​នេះ​ ប្រយុទ្ធ​ប្រឆាំង​នឹង​ការ​រើស​អើង​លើ​អ្នក​ស្រឡាញ​ភេទ​ដូច​គ្នា។

លោក Maillard ដែល​ជា​អ្នក​វិភាគ​ បានថ្លែង​ដូច្នេះ​ថា៖ «ខ្ញុំ​មិន​ដែល​ឃើញ​លិខិតដែល​ប្រមុខ​ដឹក​នាំ​រដ្ឋ​ ឬ​រដ្ឋាភិបាល​ ធ្លាប់​ធ្វើ​បែប​នេះ​ទេ​ ពី​មុន​មក។ ក្រុម​មេដឹកនាំ​ទាំងនេះ​ មិន​ចូលចិត្ត​ធ្វើដូច្នេះ​ទេ​ តែ​ពេលនេះ​ពួកគេ​បានធ្វើ»។

គណៈ​កម្មការ​អឺរ៉ុប​ ក៏​កំពុង​ស៊ើប​អង្កេតការ​ចោទ​ប្រកាន់​អំពី​កម្មវិធី​លួច​ទិន្ន័យ​អនឡាញ​របស់​ប្រទេស​អ៊ីស្រាអែល ​ទៅ​លើ​ប្រព័ន្ធ​ផ្សព្វផ្សាយ​របស់​សហភាព​អឺរ៉ុប​ផង​ដែរ។ មាន​តែ​ប្រទេស​ហុងគ្រី តែ​មួយ​គត់​ដែល​ជា​រដ្ឋ​សមាជិក​ហើយ​ត្រូវ​បាន​ដាក់បញ្ចូលឈ្មោះ​ទៅ​ក្នុង​ការ​ស៊ើប​អង្កេត​ដ៏​ទូលំទូលាយ​លើ​ប្រព័ន្ធ​ផ្សព្វផ្សាយ​ ដោយ​គេ​សង្ស័យ​ថា​ ហុងគ្រី​ គឺជា​អ្នក​ដែល​ប្រើ​ប្រាស់​កម្មវិធី​កុំព្យូទ័រ​មួយ​ឈ្មោះ​ថា Pegasus។

លោក Scott Marcus គឺជា​អ្នក​ស្រាវ​ជ្រាវ​ជាន់​ខ្ពស់​ម្នាក់​នៅ​វិទ្យាស្ថាន​គោល​នយោបាយ​សេដ្ឋកិច្ច​ Bruegel មាន​មូលដ្ឋាន​នៅ​ទីក្រុង​ប៊្រុចសែល។ លោក​បាន​ថ្លែង​ដូច្នេះ​ថា៖ «ខ្ញុំ​រំពឹង​ថា អ្វីៗ​នឹង​កើត​មាន​ឡើង​នៅ​ទីនេះ ប៉ុន្តែ​ខ្ញុំ​មិន​ប្រាកដ​ថា ក្នុង​កម្រិត​ណា​នោះ​ទេ។ ចំពោះ​ប្រទេស​ហុងគ្រី រឿងនេះ​ប្រហែល​ជា​ត្រូវ​គេ​ដាក់​បញ្ចូល​ទៅ​លើ​បន្ដឹង​ជាច្រើន​ផ្សេង​ទៀត។ ដូច្នេះ ខ្ញុំ​មិន​គិត​ថា ​វា​អាច​ធ្វើឲ្យផ្លាស់​ប្ដូរ​ស្ថានភាព​ដែល​កើត​មាន​នោះ​ច្រើន​ទេ»។

ការ​ដាក់​ពិន័យ​ផ្នែក​ហិរញ្ញវត្ថុ

គណៈ​កម្មការ​អឺរ៉ុប​ បាន​ចេញ​ផ្សាយរបាយការណ៍ស្ដី​ពី​នីតិរដ្ឋ​មួយ​សម្រាប់ខែ​កក្កដា ដែល​របាយការណ៍​នោះ​ គឺ​ជា​ឯកសារ​ស្ដី​អំពី​ការ​វាយ​តម្លៃ​របស់​រដ្ឋ​សមាជិក​ប្រចាំ​ឆ្នាំ ដែលផ្សព្វផ្សា​យកាល​ពី​ឆ្នាំ​មុន។ របាយការណ៍​នោះ​ បាន​រៀប​រាប់​អំពី​ក្ដី​កង្វល់​ជា​ច្រើន​អំពី​ប្រទេស​ប៉ូឡូញ និង​ហុងគ្រី នៅ​លើ​ទិដ្ឋភាព​ជា​ច្រើន​ដូច​ជា ​សេរីភាព​សារព័ត៌មាន ឯករាជ្យភាព​នៃ​ប្រព័ន្ធតុលាការ និង​អំពើ​ពុក​រលួយ។ របាយការណ៍​នោះ​សរសេររិះ​គន់​លើ​រដ្ឋ​ផ្សេង​ទៀត​ រួម​មាន​រដ្ឋ​សមាជិក​មក​ពី​ភាគ​ខាង​លិច ដូចជា អូទ្រីស និង​អ៊ីតាលី បើ​ទោះបី​ជា​ការ​រិះ​គន់​នេះ​មាន​ទំហំ​ស្រាល​ជាងក្តី។

រឿង​ដាច់​ដោយ​ឡែក​មួយ​ទៀត មេធាវី​ការពារ​សិទ្ធិ​មនុស្ស​កំពុង​គំរាម​ថា ​ពួក​គេ​នឹង​ចាត់​វិធានការ​ផ្លូវ​ច្បាប់​ទៅ​លើរដ្ឋាភិបាល​ប្រទេស​ដាណឺម៉ាក​ដែល​ដឹក​នាំ​ដោយ​ក្រុម​ឆ្វេង​និយម ​ចំពោះ​កិច្ច​ប្រឹង​ប្រឹង​របស់​រដ្ឋាភិបាល​ក្នុង​ការព្យាយាម​បញ្ជូន​ជនជាតិ​ស៊ីរីស្វែង​រក​សិទ្ធិ​ជ្រកកោន​ ត្រឡប់​ទៅ​ទីក្រុង​ដាម៉ាស​វិញ ដោយ​ដាណឺម៉ាក​អះអាង​ថា​ ​ទីនោះ​មាន​សុវត្ថិភាព​ហើយ ប៉ុន្តែ​ការ​អះអាង​បែបនេះ​ត្រូវ​បាន​អង្គការ​ការពារ​សិទ្ធិ​មនុស្ស​ច្រាន​ចោល ដូច​ជា​អង្គការ​លើក​លែង​ទោស​អន្តរជាតិ Amnesty International ​ជា​ដើម។

គណៈ​កម្មការអឺរ៉ុប​ត្រូវ​គេ​រំពឹង​ថា​ នឹង​ប្រើ​អំណាច​ហិរញ្ញវត្ថុ​របស់​ខ្លួន តាម​រយៈ​ការ​ដាក់​លក្ខខណ្ឌ​លើជំនួយ​សម្រាប់​ការ​អនុវត្ត​លទ្ធិប្រជាធិបតេយ្យ​នៅ​ប្រទេស​ជាច្រើន។ ប៉ុន្តែ​មនុស្ស​មួយ​ចំនួន​ជឿ​ថា វិធានការ​បែប​នេះ​មិន​ទាន់​គ្រប់​គ្រាន់​ទេ។ ស្រប​ពេល​ជាមួយ​គ្នា​នេះ លោកស្រី​ Vera Jourova អនុ​ប្រធាន​គណៈ​កម្មការ​អឺរ៉ុប​ ហាក់​ដូចជាមិន​យល់​ព្រម​លើ​ការ​ដាក់​លក្ខខណ្ឌ​ដើម្បី​ទទួល​បាន​អ្វី​មួយ ជាថ្នូរ​នឹង​ការ​បញ្ចេញ​ថវិកា​រាប់​ពាន់​លាន​ដុល្លារ ទៅ​ក្នុង​មូលនិធិ​ស្ដារ​ឡើង​វិញ​បន្ទាប់​ពីវិបត្តិ​កូវីដ១៩​នោះទេ។

លោក​ស្រី​ថ្លែង​ប្រាប់​កាសែត​បារាំង Le Monde ដូច្នេះ​ថា៖ «ខ្ញុំ​មិន​គិត​ថា ថវិកា​នេះ​គួរ​ត្រូវ​បាន​ប្រើ​ប្រាស់​ដើម្បី​ជាការ​បង្ខិត​បង្ខំ​នោះ​ទេ»។

បទ​វិចារណកថា​ដាច់ដោយឡែក​មួយទៀត​របស់​កាសែត Le Monde សរសេរ​ថា សហភាព​អឺរ៉ុប​គួរ​តែ​បញ្ចប់​នូវ​ភាព​ខ្វះ​គតិបណ្ឌិត​បែប​នេះ​ទៅ (អគតិ)។ បទ​វិចារណកថា​នោះ​ គាំទ្រ​ដល់​វិធានការ​ដែល​មាន​ភ្ជាប់​លក្ខខណ្ឌ​ ប៉ុន្តែ​ជំរុញ​ឲ្យ​មាន​វិធានការ​ខ្លាំង​ក្លា​ប្រឆាំង​នឹង​ការ​រំលោភ​បំពាន​ច្បាប់ រួម​មាន​ទាំងទណ្ឌកម្ម​ប្រឆាំង​នឹង​បុគ្គល​ដែល​មាន​បាន​ដោយ​អំពើ​ខុស​ច្បាប់​ពី​ថវិកា​របស់​សហភាព​អឺរ៉ុប។

អ្នក​វិភាគ​និយាយ​ថា ​ជម្រើស​ដ៏​តឹងរ៉ឹង​មួយ​ទំនងជា​មិន​អាច​កើត​មានទេ​ បើទោះជា​វា​មាន​លទ្ធភាព​អាច​កើត​មាន​ក្ដី។ គ្មាន​យន្តការ​ណា​សម្រាប់​បណ្ដេញ​សមាជិក​ដែល​មិន​គោរព​វិន័យ​នោះ​ទេ ហើយ​កិច្ច​ប្រឹង​ប្រែង​ព្យួរ​សិទ្ធិ​បោះ​ឆ្នោត​របស់​សមាជិក​នោះ អាចនឹង​ជួប​ការ​លំបាក។ លើស​ពី​នេះ​ទៀត បន្ទាប់​ពី​ការ​ចាក​ចេញ​របស់​ចក្រភព​អង់គ្លេស សហភាព​អឺរ៉ុប ​មិន​មាន​បំណង​ធ្វើ​ឲ្យ​អន់​ថយ​ដល់​ឋានៈភាព​របស់​ខ្លួន​ទៀត​ទេ។ ការ​ដាក់​ទណ្ឌកម្ម​ទៅ​លើ​ប្រជាជាជន​ទាំង​មូល​នៃ​ប្រទេស​ណា​មួយ ជា​ជាង​អនុវត្ត​ចំពោះ​តែ​រដ្ឋាភិបាល​ណា​មួយ​នោះ ក៏​រឹត​តែ​មិន​យុត្តិធម៌​ទៅ​ទៀត។

អ្នក​វិភាគ​គឺ​លោក Maillard បាន​ថ្លែង​សំដៅ​ទៅ​លើ​នាយក​រដ្ឋ​មន្ត្រី​ហុងគ្រី​ថា៖ «លោក​ Viktor Orban នឹង​មិន​ស្ថិត​ក្នុង​តំណែង​រហូត​ទេ។ ដូច្នេះ ខ្ញុំ​មិន​គិត​ថា ការ​គំរាម​កំហែង​បែប​នេះ ​អាច​ជួយ​អ្វី​បាន​ទេ។ យើង​ត្រូវ​តែ​មាន​សាមគ្គីភាព​ចំពោះ​ភាពចម្រុះ​ និង​ភាព​ខុស​គ្នា​របស់​យើង»៕

ប្រែសម្រួលដោយលោក នៀម ឆេង

XS
SM
MD
LG