ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សហភាព​អឺរ៉ុប​អនុម័ត​ច្បាប់ Magnitsky ដើម្បី​ប្រឆាំង​នឹង​អ្នក​រំលោភ​សិទ្ធិ​មនុស្ស


រូបឯកសារ៖ ស្ត្រី​ម្នាក់​កាន់ផ្ទាំង​ក្រដាស​ដែល​មាន​រូប​របស់​លោក​មេធាវី Sergei Magnitsky និង​សំណេរ​ដែល​សរសេរ​ថា «បាន​ប្រយុទ្ធ​ប្រឆាំងនឹង​ប្រព័ន្ធ​ចោរកម្ម» ក្នុង​អំឡុង​ពេល​ធ្វើ​បាតុកម្ម​ដែល​គ្មាន​ការអនុញ្ញាត​នៅ​កណ្តាល​ទីក្រុង​មូស្គូ កាលពី​ថ្ងៃទី១៥ ខែធ្នូ ឆ្នាំ២០១២។

អ្នក​រំលោភ​សិទ្ធិ​មនុស្ស ​នឹង​ប្រឈម​នឹង​ការ​បង្កក​ទ្រព្យសម្បត្តិ និង​ការ​ហាម​ឃាត់​ការ​ធ្វើ​ដំណើរ​ចូល​ទឹកដី​អឺរ៉ុប ក្រោម​ច្បាប់​ថ្មី​មួយ​ដែល​អនុម័ត​ដោយ​សហភាព​អឺរ៉ុប។

ច្បាប់ ដែល​គេ​ហៅ​ថា​ជា​ច្បាប់ Magnitsky នេះ មាន​ឈ្មោះ​ជា​ផ្លូវការ​ថា វិធី​ដាក់​ទណ្ឌកម្ម​ជា​សាកល​របស់​សហភាព​អឺរ៉ុប​លើ​ផ្នែក​សិទ្ធិ​មនុស្ស (EU Human Rights Global Sanctions Regime)។ ច្បាប់​នេះ ​នឹង​សំដៅ​លើ​អ្នក​ដែល​រង​ការ​ចោទ​ប្រកាន់​ថា ​បាន​ប្រព្រឹត្តិ​អំពើ​ប្រល័យ​ពូជសាសន៍ ការធ្វើ​ទារុណកម្ម ឃាតកម្ម​នយោបាយ និង​ការ​ឃុំ​ខ្លួន​ដោយ​បំពាន។

សហភាព​អឺរ៉ុប​នឹង​អនុម័ត​ច្បាប់​នេះ​ជា​ផ្លូវការ​នៅ​ថ្ងៃ​ទី ១០ ខែ​ធ្នូ ដែល​ត្រូវ​នឹង​ទិវា​សិទ្ធិ​មនុស្ស​ពិភពលោក។

លោក Bill Browder អ្នក​ជំនាញ​ផ្នែក​ហិរញ្ញវត្ថុ​នៃ​ក្រុមហ៊ុន​គ្រប់គ្រង​មូលធន Hermitage (Hermitage Capital Management) ដែល​បាន​ធ្វើ​យុទ្ធនាការ​ឲ្យ​មាន​ការ​អនុវត្ត​ច្បាប់​ស្រដៀង​គ្នា​នេះ នៅ​ក្នុង​ប្រទេស​ជា​ច្រើន​ជុំវិញ​ពិភពលោក បាន​និយាយ​ថា វា​ជា​ជំហាន​ដ៏​ធំ​មួយ នៅ​ពេល​ដែល​សហភាព​អឺរ៉ុប​អនុម័ត​ច្បាប់​នេះ។

លោក Browder បាន​ប្រាប់ VOA ថា៖ «យើង​មាន​ប្រទេស ២៧ [ជា​សមាជិក​សហភាព​អឺរ៉ុប] ហើយ​ប្រទេស​មួយ​ចំនួន​ក្នុង​ចំណោម​នោះ ជា​ប្រទេស​ដែល​មេដឹកនាំ​ផ្ដាច់ការ និង​មេដឹកនាំ​លួច​ជាតិ ចូលចិត្ត​មក​ទស្សនា»។

លោក Browder បាន​បន្ថែម​ថា៖ «ប្រសិនបើ​ច្បាប់ Magnitsky របស់​សហភាព​អឺរ៉ុប​នេះ​ត្រូវ​បាន​អនុវត្ត និង​អនុវត្ត​បាន​ទូលំទូលាយ នោះ​ខ្ញុំ​គិត​ថា វា​នឹង​មាន​ឥទ្ធិពល​ខ្លាំង​ទៅ​លើ​ឥរិយាបទ​របស់​អ្នក​រំលោភ​សិទ្ធិ​មនុស្ស​នៅ​ជុំវិញ​ពិភព​លោក»៕

ផែនទីលទ្ធផលការបោះឆ្នោតប្រធានាធិបតីអាមេរិកពីឆ្នាំ ១៩៩២-២០២០

XS
SM
MD
LG