ទ្វីបអឺរ៉ុបឥឡូវនេះក្លាយជាចំណុចកណ្ដាលនៃការឆ្លងរាលដាលជំងឺ COVID-19 នៅពេលដែលវីរុសដែលបង្កឲ្យកើតជំងឺនេះបន្តរីករាលដាល។ ករណីឆ្លងវីរុសនេះថ្មីៗនៅក្នុងប្រទេសចិន ដែលជាកន្លែងផ្ទុះឡើងដំបូងនៃវីរុសនេះបានចាប់ផ្ដើមធ្លាក់ចុះ។
អាជ្ញាធរបានបញ្ជាឲ្យបិទអាជីវកម្មមិនសំខាន់នានានៅក្នុងតំបន់ដែលរងគ្រោះខ្លាំងដោយសារវីរុសនេះក្នុងប្រទេសអ៊ីតាលី ស្របពេលដែលប្រទេសនេះកំពុងប្រយុទ្ធនឹងវីរុសនេះ។
នាយករដ្ឋមន្ត្រីអ៊ីតាលីលោក Giuseppe Conte បាននិយាយថា៖ «នេះគឺជាវិបត្តិដ៏ពិបាកបំផុតនៅក្នុងសម័យកាលក្រោយសង្គ្រាម»។
ប្រទេសអ៊ីតាលីបានរាយការណ៍ថា មានករណីស្លាប់ថ្មីដោយសារវីរុសនេះចំនួន ៨០០ករណីកាលពីថ្ងៃសៅរ៍ម្សិលមិញ។
កន្លងមកមានករណីឆ្លងវីរុសនេះចំនួន ៥៣.៥៧៨ករណីនៅក្នុងប្រទេសអ៊ីតាលី។ នេះបើយោងតាមមជ្ឈមណ្ឌលធនធានព័ត៌មានអំពីវីរុសកូរ៉ូណានៃសាកលវិទ្យាល័យ Johns Hopkins នៅក្នុងសហរដ្ឋអាមេរិក។
ប្រទេសគុយបាបានបញ្ជូនគ្រូពេទ្យ និងគិលានុបដ្ឋាយិកាទៅជួយប្រទេសអ៊ីតាលីទប់ទល់នឹងវីរុសនេះ។
គណៈកម្មការរបស់សហភាពអឺរ៉ុបបានធានាចំពោះប្រទេសអ៊ីតាលីថា ទោះបីជាអ៊ីតាលីនៅជំពាក់បំណុលក៏ដោយ ក៏ប្រទេសនេះនៅតែអាចខ្ចីថវិកាដើម្បីដោះស្រាយជាមួយនឹងបញ្ហាវីរុសនេះបានដែរ។
អ្នកស្រី Ursula von der Leyen ប្រធានគណៈកម្មការសហភាពអឺរ៉ុប បានបញ្ជាក់នៅក្នុងកិច្ចសម្ភាសន៍មួយជាមួយនឹងកាសែត Corriere della Sera របស់អ៊ីតាលីថា៖ «យើងយល់ថា គ្មានប្រទេសជាសមាជិកសហភាពអឺរ៉ុបណាមួយប្រឈមនឹងបញ្ហានេះតែឯងនោះទេ។ វីរុសនេះគ្មានព្រំដែន ហើយសហភាពអឺរ៉ុបកាន់តែរឹងមាំជាងមុន នៅពេលដែលយើងបង្ហាញសាមគ្គីភាពពេញលេញ»៕
