កាលពីថ្ងៃពុធទី២៣ ខែកញ្ញា សហភាពអឺរ៉ុប បានលាតត្រដាងសំណើដែលបានពន្យារពេលយូរមកហើយ ដើម្បីសើរើគោលនយោបាយចំណាកស្រុក និងការសុំសិទ្ធិជ្រកកោនក្នុងប្លុកនេះ និងបង្កើតប្រព័ន្ធចាំបាច់មួយនៅទូទាំងសហភាពនេះ ដែលមានប្រទេសចំនួន២៧ ជាសមាជិក ដើម្បីដោះស្រាយបញ្ហាទេសន្តរប្រវេសន៍។
ក្រោយពីមានការខ្វែងគំនិតគ្នាច្រើនឆ្នាំរវាងពួករដ្ឋជាសមាជិកអំពីវិធីឆ្លើយតបនឹងការហូរចូលនៃក្រុមជនចំណាកស្រុក លោកស្រី Ursula von der Leyen ប្រធានគណៈកម្មការអឺរ៉ុប បានហៅសំណើនេះថា ជា«ដំណោះស្រាយអឺរ៉ុបដើម្បីធ្វើឱ្យមានការទុកចិត្តរបស់ពលរដ្ឋឡើងវិញ»។ តាមរយៈផែនការដែលគាំទ្រដោយប្រទេសអាល្លឺម៉ង់នេះ ប្រទេសទាំង២៧នៃសហភាពអឺរ៉ុប នឹងត្រូវតម្រូវឱ្យចូលរួមជាមួយពួករដ្ឋជាសមាជិកក្នុងការយល់ព្រមទទួលយកពួកអ្នកសុំសិទ្ធិជ្រកកោន ឬ ការបញ្ជូនចេញក្រុមជនចំណាកស្រុក និងជនភៀសខ្លួនដែលពាក្យសុំជ្រកកោនបានត្រូវបដិសេធ។
គោលដៅនៃវិធានការនេះ គឺបន្ធូរសម្ពាធលើពួកប្រទេសក្នុងប្លុកនេះ ដែលនៅជាប់សមុទ្រ Mediterranee (មេឌីទែរ៉ាណេ) គឺប្រទេសអ៊ីតាលី និងប្រទេសក្រិក ហើយដើម្បីជួយតាមវិធីផ្សេងវិញ។ ពួកអ្នកវិភាគនិយាយថា គ្មានការធានាអំពីការយល់ព្រមតាមផែនការនេះ ដោយប្រមុខរដ្ឋ និងនាយករដ្ឋមន្ត្រីនៃប្រទេសទាំង២៧របស់សហភាពអឺរ៉ុបទេ ហើយការជំទាស់នឹងសំណើនេះ កំពុងកើតមានហើយ។
លោក Sebastian Kurz អធិការបតីប្រទេសអូទ្រីស មានការសង្ស័យអំពីគំនិតនៃការបែងចែកក្រុមជនសុំសិទ្ធិជ្រកកោននៅទូទាំងអឺរ៉ុប។ លោកបាននិយាយប្រាប់ទីភ្នាក់ងារព័ត៌មានAFP ថា «ធ្វើដូច្នេះមិនបានការទេ»។
ការសាកល្បងម្តងទៀត
ការប៉ុនប៉ងច្រើនដងដើម្បីរុះរើគោលនយោបាយសហភាពអឺរ៉ុបអំពីពួកជនចំណាកស្រុកកាលពីអតីតកាល មិនបានទទួលជោគជ័យទេ ភាគច្រើនដោយសារមានការជំទាស់ពីពួករដ្ឋជាសមាជិកមួយចំនួនតូចនៅក្នុងផ្នែកកណ្តាលនៃទ្វីបអឺរ៉ុបប្រឆាំងការតម្រូវឲ្យទទួលយកពួកជនសុំសិទ្ធិជ្រកកោននោះ។ លោកស្រី Ylva Johansson ស្នងការកិច្ចការមហាផ្ទៃរបស់សហភាពអឺរ៉ុប បាននិយាយប្រាប់ពួកអ្នកកាសែតក្នុងសប្តាហ៍ចុងក្រោយនៃខែកញ្ញាថា លោកស្រីប្រុងប្រៀបស្រេចហើយសម្រាប់ការជំទាស់ពីប្រទេសហុងគ្រី ប៉ូឡូញ និងប្រទេសជាតិមានធនធានច្រើននៅផ្នែកខាងជើងនៃទ្វីបអឺរ៉ុប តែលោកស្រីសង្ឃឹមថា នឹងអាចពុះពារការប្រឆាំងនេះបាន ដោយផ្តល់ឱ្យប្រទេសទាំង២៧នៃសហភាពអឺរ៉ុបនូវ«ជម្រើសសម្របសម្រួល»អំពីវិធីចូលរួមដោះស្រាយ។
ប៉ុន្មានម៉ោងមុនសេចក្តីល្អិតល្អន់នៃសេចក្តីស្នើនេះបានត្រូវលាតត្រដាងជាសាធារណៈ លោកស្រី Ylva Johansson បាននិយាយប្រាប់បណ្តាញព័ត៌មាន Euronews ថា៖ «យើងគួរផ្តោតការយកចិត្តទុកដាក់ថា តើយើងអាចចាត់ចែងបែបណាឲ្យបញ្ហាចំណាកស្រុកមានរបៀបរៀបរយហើយខ្ញុំយល់ថា នេះជាអ្វីដែលពលរដ្ឋអឺរ៉ុបសុំពីយើង»។ លោកស្រីបានថ្លែងបន្ថែមថា៖ «ពួកជនចំណាកស្រុកដូចលោកអ្នកនិងខ្ញុំដែរ គឺពួកគេជាពួកបុរសនិងពួកស្ត្រី កុមារានិងកុមារី។ ពួកគេ មានមតិផ្សេងៗគ្នា។ ពួកគេមានការជួបប្រទះផ្សេងៗគ្នា ហើយពួកគេជាមនុស្ស ហើយពួកគេត្រូវទទួលការរាប់រកក្នុងឋានៈជាមនុស្ស»។
នៅពេលលាតត្រដាងផែនការនេះ លោកស្រី Ursula von der Leyen ប្រធានគណៈកម្មការអឺរ៉ុបបានមានប្រសសាន៍ថា ផែនការនេះ នឹង«បង្កើតការទុកចិត្តគ្នាជាថ្មីរវាងពួករដ្ឋជាសមាជិក» ហើយនឹងធ្វើឱ្យមាន«តុល្យភាពរវាងសាមគ្គីភាពនិងការទទួលខុសត្រូវ»។ សេចក្តីស្នើថ្មីនេះក៏នឹងជំនួសអ្វីដែលហៅថា បទបញ្ញត្តិក្រុង Dublin ដែលចែងថា បើពួកអ្នកដាក់ពាក្យសុំសិទ្ធិជ្រកកោនដាក់ពាក្យសុំដំបូងគេទៅប្រទេសណាមួយក្នុងសហភាពអឺរ៉ុប ប្រទេសនោះ គឺជាអ្នកដោះស្រាយ។
តាមរយៈសំណើថ្មីនេះ ពួកមន្ត្រីសហភាពអឺរ៉ុប នឹងបញ្ជូនពួកអ្នកស្វះស្វែងរកសិទ្ធិជ្រកកោន ជាពិសេសទៅកាន់ប្រទេសណាមួយដោយផ្អែកលើចំណងទាក់ទងគ្រួសារ ប្រវត្តិនៃការសិក្សាអប់រំ ឬការងារ ឬមួយធ្លាប់មានទិដ្ឋាការចេញកាលពីពេលមុនដោយរដ្ឋជាសមាជិកនៃសហភាពអឺរ៉ុប។ ពួកមន្ត្រី EU និយាយថា ពួកគេសង្ឃឹមថាផែនការនេះ នឹងបញ្ឈប់ជម្លោះរវាងពួករដ្ឋសមាជិក អំពីបញ្ហាជនចំណាកស្រុកដែលបានលេចឡើងជាលើកដំបូងកាលពីឆ្នាំ២០១៥ នៅពេលមានលំហូរជនចំណាកស្រុកច្រើនក្នុងទ្វីបអឺរ៉ុប។
ការជំទាស់នឹងសំណើនេះ
ក៏ប៉ុន្តែ មានសញ្ញាបន្តិចបន្តួចដែលថា កិច្ចព្រមព្រៀងនេះនឹងបញ្ចប់ភាពជូរចត់អំពីបញ្ហាជនចំណាកស្រុក ឬបញ្ឈប់មិនឱ្យបញ្ហាជនចំណាកស្រុកធ្វើឲ្យខូចសកម្មភាពនយោបាយ។ កាលពីសប្តាហ៍ចុងក្រោយនៃខែកញ្ញា មេដឹកនាំហុងគ្រីលោក Viktor Orban បាននិយាយច្បាស់លាស់ថា លោកគ្មានបំណងសម្របសម្រួល និងទទួលយកពួកជនសុំសិទ្ធិជ្រកកោនទេ។ លោកបានបង្ហាញការមិនយល់ព្រមរបស់លោកក្នុងអត្ថបទមួយដែលលោកបានសរសេរចុះផ្សាយក្នុងកាសែតហុងគ្រី និយមនយោបាយខាងស្តាំឈ្មោះ Magyar Nemzet។ នៅក្នុងអត្ថបទនោះ លោក Viktor Orban បាននិយាយថា មានភាពទាល់ច្រកមួយរវាងពួកអភិរក្សនិយមក្នុងប៉ែកកណ្តាល និងផ្នែកខាងកើតនៃទ្វីបអឺរ៉ុប និងពួករដ្ឋសេរីនិយមក្នុងផ្នែកខាងលិចអឺរ៉ុប ហើយលោកមើលមិនឃើញថា អាចពុះពារបានឡើយ។
មេដឹកនាំហុងគ្រីរូបនេះបានសរសេរថា៖ «ពួកសេរីនិយមដែលមានកលល្បិច គ្មានហេតុផលខ្លាចលំហូរក្រុមជនអន្តោប្រវេសន៍ទេ»។ លោកបានបន្ថែមថា៖ «ពួកប្រទេសអឺរ៉ុបកណ្តាល ជ្រើសរើសអនាគតមួយខុសពីមុន គឺមិនឱ្យមានពួកជនអន្តោប្រវេសន៍ និងក្រុមជនចំណាកស្រុកទេ»។
ពួកមន្ត្រីហុងគ្រីនិយាយថា ពួកគេសង្ស័យថា រដ្ឋាភិបាលក្រុង Budapest (ប៊ុយដាប៉ែស) នឹងមិនព្រមចូលទាក់ទិននឹងការបណ្តេញក្រុមជនដែលបានត្រូវបដិសេធសិទ្ធិជ្រកកោនទេ ដោយនិយាយថា ការទទួលយកក្រុមជនចំណាកស្រុកដែលនឹងត្រូវបណ្តេញចេញពីប្រទេសជាសមាជិកផ្សេង គឺជានយោបាយទេសន្តរប្រវេសន៍លាក់លៀម។ ពួកមន្ត្រីហុងគ្រីទាំងនេះចង្អុលបង្ហាញថា ភាគច្រើននៃក្រុមជនគ្មានសិទ្ធិជ្រកកោន មិនដែលបានត្រូវបញ្ជូនទៅប្រទេសពួកគេវិញទេ ពីព្រោះមានបញ្ហាខ្វះឯកសារ ឬដោយសារអាជ្ញាធរប្រទេសពួកគេ ប្រកែកមិនព្រមទទួល ឬមិនព្រមជួយពួកគេទេ។
ប្រទេសហុងគ្រី ប៉ូឡូញ សាធារណរដ្ឋឆែក និងប្រទេសស្លូវ៉ាគី បានជំទាស់នឹងគោលនយោបាយ សហភាពអឺរ៉ុបអំពីបរិមាណភាគនៃការតាំងលំនៅដ្ឋានរបស់ពួកជនចំណាកស្រុក ចាប់តាំងពីមានវិបត្តិជនចំណាកស្រុក និងការសុំសិទ្ធិជ្រកកោនកាលពីឆ្នាំ២០១៥។ កាលពីពេលនោះ ជនចំណាកស្រុក ជនភៀសខ្លួន និងពួកសុំជ្រកកោនជិតពីរលាននាក់ ដែលភាគច្រើនមកពីទ្វីបអាហ្វ្រិក និងមជ្ឈិមបូព៌ា បានទៅដល់ឆ្នេរសមុទ្រអឺរ៉ុប។ រដ្ឋមួយចំនួននៅអឺរ៉ុបខាងជើង ក៏មានការរារែកដែរចំពោះគោលនយោបាយនេះ។
លោកស្រីអធិការបតីអាល្លឺម៉ង់ Angela Merkel បានជំរុញសេចក្តីស្នើនេះខ្លាំងជាងគេ ហើយក៏មានភាពបន្ទាន់ថែមទៀត ក្រោយពីអគ្គីភ័យកាលពីដើមខែកញ្ញា នៅឯជំរំជនចំណាកស្រុក Moria ដែលមានមនុស្សណែនក្តន់នៅលើកោះ Lebos ប្រទេសក្រិក។ ពួកមន្ត្រីអាល្លឺម៉ង់បាននិយាយថា ប្រទេសអឺរ៉ុបចំនួន១០ បានយល់ព្រមទទួលយកពួកអនិតិជន៤០០នាក់ ដែលគ្មានញាតិសន្តាន ហើយដែលបានរត់គេចខ្លួនចេញពីអគ្គីភ័យនៅ Moria។
ចំនួនអ្នកសុំសិទ្ធិជ្រកកោនដែលបានទៅដល់ឆ្នេរសមុទ្រអឺរ៉ុប មានតិចជាងកាលពីឆ្នាំមុនៗ។ រហូតមកដល់ពេលនេះ ក្នុងឆ្នាំនេះ មានមនុស្សប្រមាណ៥ម៉ឺន ៥ពាន់នាក់បានទៅដល់ឆ្នេរសមុទ្រអឺរ៉ុបដើម្បីសុំសិទ្ធិជ្រកកោនពីសង្គ្រាម ឬដើម្បីស្វែងរកជីវភាពល្អប្រសើរជាងមុន។ ហេតុផលដែលនាំឲ្យមានចំនួនតិចជាងមុននេះ គឺភាគច្រើនដោយសារកិច្ចព្រមព្រៀងកាលពីឆ្នាំ២០១៦ រវាងប្រទេស តួរគី និងសហភាពអឺរ៉ុប។ តាមរយៈកិច្ចព្រមព្រៀងឆ្នាំ២០១៦នោះ ប្រទេសតួរគីយល់ព្រមរារាំងពួកអ្នកស្វះស្វែងរកកន្លែងជ្រកកោនមិនឱ្យធ្វើដំណើរទៅអឺរ៉ុបតាមផ្លូវគោក ឬតាមសមុទ្រ ជាថ្នូរនឹងការទទួលយកប្រាក់ច្រើនក្រាស់ក្រែល។ ក៏ប៉ុន្តែ ដោយសារប្រទេសតួរគី និងពួកប្រទេសក្នុងសហភាពអឺរ៉ុប មានភាពតានតឹងខ្លាំងៗនោះ គេដឹងមិនច្បាស់លាស់ទេថា តើនឹងមានការគោរពកិច្ចព្រមព្រៀងនេះឬទេ ក្នុងពេលអនាគត៕
ប្រែសម្រួលដោយលោក ឈឹម សុមេធ
