សហភាពអឺរ៉ុបបានបង្កើនការគាំទ្រផ្នែកយោធារបស់ខ្លួនសម្រាប់ប្រទេសអ៊ុយក្រែនកាលពីថ្ងៃចន្ទ ដោយបានចាប់ផ្តើមបេសកកម្មបណ្តុះបណ្តាលទាហានអ៊ុយក្រែនចំនួន ១៥.០០០ នាក់ និងផ្តល់ថវិកាចំនួន ៥០០ លានអឺរ៉ូបន្ថែមទៀតសម្រាប់សព្វាវុធ។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP។
រដ្ឋមន្ត្រីការបរទេសអ៊ុយក្រែនលោក Dmytro Kuleba បានថ្លែងតាមវីដេអូអនឡាញពីទីក្រុងកៀវនៃប្រទេសអ៊ុយក្រែនទៅកាន់កិច្ចប្រជុំរបស់បណ្ដារដ្ឋមន្ត្រីការបរទេសនៃប្រទេសជាសមាជិកសហភាពអឺរ៉ុបនៅក្នុងប្រទេសលុចសំបួ ដោយបានជំរុញពួកគេឱ្យផ្ដល់ការការពារដែនអាកាសបន្ថែមទៀតនិងដាក់ទណ្ឌកម្មលើប្រទេសអ៊ីរ៉ង់ដែលបានផ្គត់ផ្គង់ដ្រូនដល់ប្រទេសរុស្ស៊ី បន្ទាប់ពីរុស្ស៊ីបានប្រើដ្រូននេះវាយប្រហារលើទីក្រុងកៀវកាលពីថ្ងៃចន្ទ។
លោក Kuleba បានសរសេរនៅលើ Twitter ថា៖ «[អ៊ុយក្រែន] បានស្នើឱ្យមានការការពារដែនអាកាសបន្ថែមទៀតនិងការផ្គត់ផ្គង់គ្រាប់រំសេវផ្សេងៗ។ [អ៊ុយក្រែន] បានអំពាវនាវឱ្យសហភាពអឺរ៉ុបដាក់ទណ្ឌកម្មលើប្រទេសអ៊ីរ៉ង់សម្រាប់ករណីដែលអ៊ីរ៉ង់ផ្ដល់ដ្រូនដល់រុស្ស៊ី»។
លោក Josep Borrell ប្រធានផ្នែកគោលនយោបាយការបរទេសរបស់សហភាពអឺរ៉ុប បាននិយាយនៅពេលចាប់ផ្តើមកិច្ចប្រជុំនេះថា៖ «ប្រទេសរុស្ស៊ីកំពុងចាញ់សង្រ្គាមនេះទាំងផ្នែកសីលធម៌ ផ្នែកនយោបាយ និងសូម្បីតែផ្នែកយោធា។ ដូច្នេះយើងត្រូវបន្តគាំទ្រអ៊ុយក្រែន»។
លោក Borrell បានសរសេរនៅលើ Twitter ចេញពីកិច្ចប្រជុំនេះថា៖ «នៅពេលដែលលោក Dmytro Kuleba ថ្លែងសុន្ទរកថាមកកាន់ពួកយើងចេញពីជម្រកការពារគ្រាប់ផ្លោង យើងបង្កើនជំនួយយោធារបស់សហភាពអឺរ៉ុបរហូតដល់ ៣ ពាន់លានដុល្លារអាមេរិក និងចាប់ផ្ដើមបេសកកម្មបណ្ដុះបណ្ដាលរបស់សហភាពអឺរ៉ុបសម្រាប់យោធាអ៊ុយក្រែន»។
លោក Borrell បានបន្ថែមថា៖ «ការវាយប្រហារមិនរើសមុខថ្មីចុងក្រោយបង្អស់របស់រុស្ស៊ីទាំងនេះនឹងមិនធ្វើឱ្យរង្គោះរង្គើដល់ការតាំងចិត្តរបស់យើងនៅក្នុងការគាំទ្រប្រទេសអ៊ុយក្រែននោះទេ គឺវាមានតែធ្វើឱ្យការតាំងចិត្តនេះកាន់តែរឹងមាំបន្ថែមទៀតតែប៉ុណ្ណោះ»។
បន្ទាប់ពីប្រទេសរុស្ស៊ីបានធ្វើសង្រ្គាមជិត ៨ ខែកន្លងមកនៅក្នុងប្រទេសអ៊ុយក្រែន កងទ័ពរបស់អ៊ុយក្រែនកំពុងដំណើរការល្អនៅក្នុងសមរភូមិ ហើយក្រុមបស្ចិមប្រទេសដែលគាំទ្រអ៊ុយក្រែនចង់ធ្វើឱ្យប្រាកដថាកងទ័ពអ៊ុយក្រែនមានសមត្ថភាពបន្តការប្រយុទ្ធ។
បណ្តាប្រទេសជាសមាជិកសហភាពអឺរ៉ុបជាច្រើន រួមទាំងអាល្លឺម៉ង់និងបារាំងផងដែរ កំពុងបណ្តុះបណ្តាលរួចហើយដល់ទាហានអ៊ុយក្រែនឱ្យចេះប្រើប្រាស់ប្រព័ន្ធកាំភ្លើងធំទំនើប ប្រព័ន្ធបាញ់មីស៊ីល និងប្រព័ន្ធការពារដែនអាកាសដែលពួកគេផ្តល់ដល់រដ្ឋាភិបាលអ៊ុយក្រែន។ រីឯសហរដ្ឋអាមេរិក ប្រទេសកាណាដា និងចក្រភពអង់គ្លេសវិញក៏បានបណ្ដុះបណ្ដាលទាហានរាប់ពាន់នាក់រួចមកហើយផងដែរ។
មន្ត្រីម្នាក់បាននិយាយថា ផែនការបេសកកម្មនេះគឺផ្តល់ការបណ្តុះបណ្តាលជាមូលដ្ឋានដល់ទាហានចំនួន ១២.០០០ នាក់ និងផ្ដល់ការបង្ហាត់បង្រៀនពិសេសដល់ទាហានចំនួន ២.៨០០ នាក់បន្ថែមទៀត។
ប្រទេសប៉ូឡូញដែលជាប្រទេសជិតខាងរបស់អ៊ុយក្រែនគ្រោងនឹងបម្រើជាមជ្ឈមណ្ឌលសំខាន់សម្រាប់បេសកកម្មនេះ។ អាល្លឺម៉ង់ក៏ត្រូវបានកំណត់ឱ្យក្លាយជាទីតាំងសំខាន់មួយសម្រាប់ការហ្វឹកហាត់នេះផងដែរ៕
សហភាពអឺរ៉ុបចាប់ផ្តើមបេសកកម្មហ្វឹកហ្វឺនកងទ័ពអ៊ុយក្រែន
ទីក្រុងលុចសំបួ ប្រទេសលុចសំបួ —
