នៅក្នុងកិច្ចប្រជុំមួយនៅថ្ងៃចន្ទនេះ បណ្ដារដ្ឋមន្ត្រីការបរទេសសហភាពអឺរ៉ុបកំពុងពិចារណាដាក់ទណ្ឌកម្មថ្មីលើប្រទេសរុស្ស៊ីនិងផ្ដល់ជំនួយបន្ថែមទៀតដល់យោធាអ៊ុយក្រែន ស្របពេលដែលសហរដ្ឋអាមេរិកសន្យាគាំទ្រជាបន្តដល់អ៊ុយក្រែន នៅចំពេលដែលរុស្ស៊ីវាយប្រហារតាមអាកាសលើហេដ្ឋារចនាសម្ព័ន្ធសំខាន់ៗរបស់អ៊ុយក្រែន។
កញ្ចប់ថវិកាស្នើឡើងដែលសហភាពអឺរ៉ុបកំពុងពិចារណានៅក្នុងទីក្រុងព្រុចសែល ប្រទេសបែលហ្ស៊ិកនេះ នឹងផ្ដល់ថវិកាប្រហែល ២.១០០ លានដុល្លារដើម្បីផ្គត់ផ្គង់ដល់ការដឹកជញ្ជូនសព្វាវុធឱ្យអ៊ុយក្រែន។
កន្លងមក សហភាពអឺរ៉ុបបានដាក់ទណ្ឌកម្ម៨ដងរួចមកហើយសំដៅលើបុគ្គលនិងវិស័យមួយចំនួនរបស់រុស្ស៊ី ដើម្បីឆ្លើយតបទៅនឹងការឈ្លានពានរបស់រុស្ស៊ីលើអ៊ុយក្រែនដែលបានចាប់ផ្ដើមកាលពីខែកុម្ភៈ។ ទណ្ឌកម្មលើកទី ៩ នេះនឹងដាក់លើមន្ត្រីរដ្ឋាភិបាលរុស្ស៊ីក៏ដូចជាវិស័យយោធានិងធនាគាររបស់រុស្ស៊ីផងដែរ។
ប្រធានាធិបតីសហរដ្ឋអាមេរិកលោក Joe Biden បាននិយាយតាមទូរសព្ទជាមួយនឹងប្រធានាធិបតីអ៊ុយក្រែនលោក Volodymyr Zelenskyy កាលពីថ្ងៃអាទិត្យ ដែលជាការសន្ទនាតាមទូរសព្ទមួយដែលលោក Zelenskyy បានធ្វើឡើងជាមួយនឹងមេដឹកនាំនានានៅលើពិភពលោកនៅមុនការពិភាក្សានិងការប្រជុំសំខាន់ៗរបស់សហភាពអឺរ៉ុបចូលមកដល់នៅក្នុងសប្ដាហ៍នេះ។
សេតវិមានបានបញ្ជាក់នៅក្នុងសេចក្ដីថ្លែងការណ៍មួយថា លោក Biden «បានបញ្ជាក់អះអាងជាថ្មីអំពីការតាំងចិត្តរបស់សហរដ្ឋអាមេរិកនៅក្នុងការបន្តផ្ដល់ដល់អ៊ុយក្រែននូវជំនួយសន្តិសុខ សេដ្ឋកិច្ច និងមនុស្សធម៌ ធ្វើឱ្យរុស្ស៊ីទទួលខុសត្រូវចំពោះឧក្រិដ្ឋកម្មសង្គ្រាមនិងភាពឃោរឃៅរបស់ខ្លួន និងធ្វើឱ្យរុស្ស៊ីរងផលវិបាកចំពោះការឈ្លានពាននេះ»។
រីឯប្រធានាធិបតីបារាំងលោក Emmanuel Macron វិញបាននិយាយបន្ទាប់ពីលោកបានសន្ទនាតាមទូរស័ព្ទជាមួយនឹងលោក Zelenskyy ថា អ៊ុយក្រែនអាចពឹងផ្អែកលើការគាំទ្ររបស់ប្រទេសបារាំងបាន «មិនថាយូរប៉ុណ្ណានោះទេរហូតទាល់តែទទួលបានអធិបតេយ្យភាពនិងបូរណភាពទឹកដីរបស់ខ្លួនពេញលេញឡើងវិញ»។
លោក Zelenskyy បាននិយាយថា លោកក៏បាននិយាយកាលពីថ្ងៃអាទិត្យជាមួយនឹងប្រធានាធិបតីតួកគីលោក Recep Tayyip Erdogan ផងដែរអំពីក្ដីរំពឹងនៃការពង្រីកគម្រោងផ្ដួចផ្ដើមនាំចេញធញ្ញជាតិតាមសមុទ្រខ្មៅ ដែលនៅក្រោមគម្រោងផ្ដួចផ្ដើមនេះ អ៊ុយក្រែនអាចនាំចេញធញ្ញជាតិរបស់ខ្លួនពីកំពង់ផែចំនួន៣បាន៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP ទីភ្នាក់ងារសារព័ត៌មាន AFP និងទីភ្នាក់ងារសារព័ត៌មាន Reuters។
