លោក Jean-Claude Juncker ប្រធានគណៈកម្មការអឺរ៉ុបបានអំពាវនាវឱ្យមានការពង្រីកចំនួនកូតាសម្រាប់ប្រទេសនីមួយៗនៅទូទាំងតំបន់ភាគច្រើននៃទ្វីបអឺរ៉ុបក្នុងការទទួលយកពួកអ្នកស្វះស្វែងរកទីជ្រកកោនរាប់ពាន់នាក់មកពីភូមិភាគមជ្ឈឹមបូព៌ាក្នុងរយៈពេលពីរឆ្នាំខាងមុខ។
ផែនការនេះអាចគ្របដណ្តប់លើជនភៀសខ្លួន១៦០.០០០នាក់ ដោយប្រទេសអាល្លឺម៉ង់ បារាំងនិងប្រទេសអេស្ប៉ាញ ដែលទទួលយកជនទាំងនេះច្រើនជាងគេ បន្ទាប់មកមានប្រទេសប៉ូឡូញ, ហុល្លង់ រ៉ូម៉ានី បែលហ្ស៊ិក និងប្រទេសស៊ុយអែត។
នៅខណៈដែលទ្វីបអឺរ៉ុបប្រឈមមុខនឹងលំហូររបស់ជនចំណាកស្រុកច្រើននាក់ចាប់តាំងពីសង្គ្រាមលោកលើកទីពីរមក លោក Juncker គ្រោងនឹងលាតត្រដាងសេចក្តីសម្អិតនៃសំណើរបស់លោកនៅថ្ងៃពុធនេះនៅក្នុងសភាអឺរ៉ុប។ ក៏ប៉ុន្តែគំនិតអំពីកាតកំណត់កូតា មានភាពចម្រូងចម្រាសនិងត្រូវបានជំទាស់យ៉ាងខ្លាំងដោយប្រទេសហុងគ្រី និងបណ្តារដ្ឋឯទៀតៗនៃសហភាពអឺរ៉ុប។ ការប្រកាន់យករបៀបកូតាមិនប្រាកដប្រជាទេ ដោយសារមេដឹកនាំអឺរ៉ុបខ្លះបានច្រានចោលសំណើនេះហើយកាលពីខែមិថុនា ដែលកូតានោះ គ្របដណ្តប់លើជនភៀសខ្លួនតែ៤០.០០០នាក់ប៉ុណ្ណោះ។
ការបែងចែកពួកជនស្វះស្វែងរកទីជ្រកកោននឹងផ្អែកលើស្ថានភាពសេដ្ឋកិច្ច ចំនួនប្រជារាស្ត្រ អត្រាមនុស្សគ្មានការងារធ្វើនិងចំនួនជនភៀសខ្លួនដែលប្រទេសជាតិនីមួយៗបានយល់ព្រមទទួលយក៕
