ការបោះឆ្នោតក្នុងប្រទេសតួកគីបានបិទបញ្ចប់នៅទូទាំងប្រទេស កាលពីថ្ងៃអាទិត្យ ដែលនេះជាការបោះឆ្នោតមួយរំពឹងថា មានការប្រជែងដ៏ស្វិតស្វាញបំផុតដែលលោកប្រធានាធិបតី Recep Tayyip Erdogan នឹងមានហានិភ័យក្នុងការដណ្តើមការគ្រប់គ្រងរដ្ឋធានី អង់ការ៉ា និងទីក្រុង អ៊ីស្តង់ប៊ុល (Istanbul)។
ប្រទេស តួកគី មានបញ្ហាធ្លាក់ចុះសេដ្ឋកិច្ច និងមានកំណើនអតិផរណា ដែលបញ្ហាសេដ្ឋកិច្ចទាំងនេះ គឺជារឿងសំខាន់បំផុត និងជារឿងដំបូង ដែលស្ថិតនៅក្នុងគំនិតរបស់អ្នកបោះឆ្នោត។ លោក Erdem ជាវិស្វករ បានថ្លែង មុនពេលបោះឆ្នោតនៅក្នុងទីក្រុង អ៊ីស្តង់ប៊ុល ថា៖
«សេដ្ឋកិច្ចប្រទេសយើងចេះតែអន់ថយទៅ ពីព្រោះការគ្រប់គ្រងដ៏អាក្រក់របស់រដ្ឋាភិបាល។ មិត្តភក្តិរបស់យើងភាគច្រើនកំពុងរកការងារធ្វើ ហើយមិត្តភក្តិខ្លះបាត់បង់ការងារពីព្រោះវិបត្តិសេដ្ឋកិច្ច»។
ទីក្រុងអ៊ីស្តង់ប៊ុល គឺជាទីក្រុងសេដ្ឋកិច្ចដ៏ធំជាងគេរបស់ប្រទេសតួកគី។ បើតាមការស្ទង់មតិនានាបានបង្ហាញថា ការបោះឆ្នោតមានការប្រកៀកប្រកិតគ្នា។ គណបក្ស AK របស់លោក Erdogan បានគ្រប់គ្រងទីក្រុងនេះជាង ១៥ ឆ្នាំមកហើយ។
អ្នកបោះឆ្នោតម្នាក់ទៀតឈ្មោះ Sinan ដែលជាអ្នកគាំទ្រគណបក្ស AK បានថ្លែងថា៖ «ក្តីសង្ឃឹមរបស់ខ្ញុំគឺនៅទីនោះ ដែលនឹងមានលទ្ធផលល្អចេញពីលទ្ធផលនៃការបោះឆ្នោតនេះ។ យើងនឹងទទួលបានជ័យជម្នះដែលមានគម្លាតធំ»។
តែក្រុមអ្នកបោះឆ្នោតនៅអង់ការ៉ា វិញ ដូចជា Orhan Kurubacak និង Hakan Akyürek បានត្អូញត្អែរអំពីបញ្ហាវិបត្តិសេដ្ឋកិច្ច ដូចជាពលរដ្ឋអត់ការងារធ្វើ និងបញ្ហាសេដ្ឋកិច្ចជាច្រើនទៀត៕
