ក្រុមយុវជនបរិស្ថានប្រមាណ២០នាក់ នៅថ្ងៃព្រហស្បតិ៍នេះ បានដើរជាក្បួនតាមវិថីនៅរាជធានីភ្នំពេញ ដោយស្នើបញ្ឈប់ការរឹតត្បិតសិទ្ធិអ្នកការពារព្រៃឈើ ខណៈពួកគេអះអាងថា ការកាប់បំផ្លាញព្រៃឈើក្នុងតំបន់អភិរក្សនៅបន្តកើតមានឡើង។
ក្រុមយុវជនបានធ្វើពិធីដង្ហែ«សពព្រៃឈើ» ដោយបានយកញត្ដិទៅដាក់នៅក្រសួងបរិស្ថាន។ ក្រុមអ្នកស្រឡាញ់បរិស្ថានបានស្លៀកពាក់ខោអាវពណ៌ស និងមានមឈូស ដែលតំណាងឱ្យការកាន់ទុក្ខចំពោះការបាត់បង់ព្រៃឈើក្នុងតំបន់ដែនជម្រកការពារក្នុងប្រទេសកម្ពុជា។
នៅពេលដង្ហែនោះ ក្រុមយុវជនក៏បានស្រែកជាសារថា«សូមឲ្យយើងចូលល្បាតព្រៃឡើងវិញដើម្បីការពារព្រៃឈើ» «ការពារព្រៃឈើមិនមែនជាបទល្មើសទេ» និង«សូមចាប់អ្នកកាប់ កុំចាប់អ្នកការពារ»។
នៅក្នុងញត្តិដែលបានដាក់ជូនលោក សាយ សំអាល់ រដ្ឋមន្ត្រីក្រសួងបរិស្ថាន ពួកគេបានលើកឡើងថា សហគមន៍មូលដ្ឋាន យុវជន និងសមាគមអង្គការមិនមែនរដ្ឋាភិបាលត្រូវបានក្រសួងរារាំងមិនឲ្យរៀបចំសកម្មភាពល្បាតព្រៃរបស់សហគមន៍ កម្មវិធីទស្សនកិច្ចរបស់យុវជន និងការប្រារព្ធពិធីបំបួសព្រៃឈើជាដើម។ ពួកគេចាត់ទុកថា នេះជាសកម្មភាពរឹតត្បិត និងផ្ទុយពីច្បាប់ស្តីពីតំបន់ការពារធម្មជាតិ ត្រង់មាត្រា២៩ដែលចែងថា ប្រជាពលរដ្ឋ ព្រះសង្ឃ សិស្សានុសិស្ស មន្ត្រីរាជការ កងកម្លាំងប្រដាប់អាវុធ និងអាជ្ញាធរមូលដ្ឋានមានករណីកិច្ចចូលរួមការពារ អភិរក្ស និងស្ដារធនធានធម្មជាតិឡើងវិញក្នុងតំបន់ការពារធម្មជាតិ។
បើតាមញត្តិរបស់ក្រុមយុវជន មានការបន្តរកឃើញការបាត់បង់ និងការលួចបំផ្លាញព្រៃឈើនៅក្នុងតំបន់ដែនជម្រកសត្វព្រៃ ព្រៃឡង់ និងព្រៃព្រះរកាជាដើម។ ពួកគេក៏ជំរុញឲ្យបើចំហព័ត៌មានពីក្រុមហ៊ុនដែលទទួលបានសិទ្ធិធ្វើអាជីវកម្មឈើ និងចំណូលដែលទទួលបានពីការធ្វើអាជីវកម្មឈើ និងផ្សព្វផ្សាយពីបច្ចុប្បន្នភាពធនធានធម្មជាតិ ព្រៃឈើទៅកាន់សាធារណជនឲ្យបានទូលំទូលាយ។
លោក នេត្រ ភក្ត្រា អ្នកនាំពាក្យក្រសួងបរិស្ថាន បានប្រាប់វីអូអេនៅថ្ងៃព្រហស្បតិ៍ថារាល់សហគមន៍ សមាគម និងអង្គការក្រៅរដ្ឋាភិបាលដែលបានចុះបញ្ជីស្របច្បាប់ និងមានកិច្ចព្រមព្រៀងត្រឹមត្រូវ ត្រូវបានលើកទឹកចិត្តនិងទទួលស្វាគមន៍ដោយក្រសួងក្នុងការចូលរួមការពារធនធានព្រៃឈើ សត្វព្រៃ។ លោកចាត់ទុកក្រុមយុវជនដែលដើរតាមវិថីក្នុងរាជធានីភ្នំពេញកាលពីព្រឹកថ្ងៃព្រហស្បតិ៍ជា«សកម្មជននយោបាយ» ហើយ«ស្ថិតក្រោមការបញ្ជាដោយជនបរទេស»។
លោកបញ្ជាក់ថា៖ «ពួកគេគ្រាន់តែជាជនឱកាសនិយម យកការសម្តែងជាការស្រឡាញ់ធនធានធម្មជាតិដើម្បីផលប្រយោជន៍បក្ខពួកខ្លួនប៉ុណ្ណោះ»៕
