គណៈកម្មាធិការជាតិរៀបចំការបោះឆ្នោត (គ.ជ.ប.) នៅសប្តាហ៍នេះ ប្រកាសជ្រើសរើសបុគ្គលិកជាប់កិច្ចសន្យារយៈពេលខ្លីជិត១៤ម៉ឺននាក់ ដើម្បីបម្រើការងាររៀបចំការបោះឆ្នោតថ្នាក់ជាតិនៅតាមការិយាល័យបោះឆ្នោតទូទាំងប្រទេស នាខែកក្កដា ឆ្នាំ២០១៨ខាងមុខ។
សេចក្តីជូនដំណឹងរបស់គណៈកម្មាធិការជាតិរៀបចំការបោះឆ្នោតចេញកាលពីថ្ងៃទី៨ ខែមិថុនា ដែលត្រូវបានផ្សព្វផ្សាយលើគេហទំព័ររបស់ខ្លួននៅថ្ងៃអង្គារនេះ បញ្ជាក់ថា គ.ជ.ប. ប្រកាសជ្រើសរើសមន្រ្តីជាប់កិច្ចសន្យារយៈពេលខ្លី ដើម្បីបម្រើការងារនៅតាមការិយាល័យគណៈកម្មការបោះឆ្នោតទូទាំងប្រទេស។ មន្រ្តីកិច្ចសន្យាដែលគ.ជ.ប. ប្រកាសជ្រើសរើសក្នុងមួយការិយាល័យមានប្រធានគណៈកម្មការការិយាល័យបោះឆ្នោតមួយរូប អនុប្រធានមួយរូប លេខាធិការមួយរូប សមាជិកទីមួយ១រូប សមាជិកទីពីរ១រូប និងសមាជិកទីបី១រូប។
សេចក្តីជូនដំណឹងនោះត្រូវបានសរសេរក្នុងន័យដើមថា៖
«ប្រជាពលរដ្ឋ និងមន្រ្តីរាជការនៅក្នុងក្រុង ស្រុក ខណ្ឌ ឃុំ សង្កាត់ ដែលមានបំណងដាក់ពាក្យសុំចូលបម្រើការងារតាមមុខតំណែងខាងលើ សូមអញ្ជើញទៅពិនិត្យមើលសេចក្តីជូនដំណឹងស្តីពីលក្ខខណ្ឌនៃការជ្រើសរើសសមាសភាព គ.ក.ប. ការចែក និងការទទួលពាក្យសុំចូលបម្រើការងារ ដែលនឹងបិទផ្សាយចាប់ពីថ្ងៃទី២២ ខែមិថុនា ឆ្នាំ២០១៨ នៅតាមគណៈកម្មការឃុំ សង្កាត់រៀបចំការបោះឆ្នោត ឬ/និងទីកន្លែងសាធារណៈក្នុងឃុំ សង្កាត់ ដែលកំណត់ដោយ គឃ.សប»។
សេចក្តីជូនដំណឹងដដែលក៏បានបន្ថែមថា គ.ជ.ប.ចាប់ផ្តើមទទួលពាក្យនៅគ្រប់ទីកន្លែងដែលកំណត់ដោយគណៈកម្មការឃុំសង្កាត់ រៀបចំការបោះឆ្នោត (គឃ.សប) រយៈពេលត្រឹមតែមួយសប្តាហ៍ប៉ុណ្ណោះ គឺចាប់ពីថ្ងៃទី២ ខែកក្កដា ដល់ថ្ងៃទី៨ ខែកក្កដា ឆ្នាំ២០១៨។
លោក ហង្ស ពុទ្ធា អ្នកនាំពាក្យគណៈកម្មការធិការជាតិរៀបចំការបោះឆ្នោត ប្រាប់ VOA នាល្ងាចថ្ងៃអង្គារនេះថា ការប្រកាសជ្រើសរើសមន្រ្តីជាប់កិច្ចសន្យារយៈពេលខ្លីនេះ គឺដើម្បីបម្រើការនៅតាមការិយាល័យចំនួនជាង២ម៉ឺននៅទូទាំងប្រទេស។
លោកបញ្ជាក់ថា៖
«គណៈកម្មការខេត្តរៀបចំការបោះឆ្នោតជាអ្នកទទួលខុសត្រូវ ហើយគណៈគណៈកម្មការឃុំសង្កាត់រៀបចំការការបោះឆ្នោតដែលយើងទើបហ្នឹងរើសមកនោះលោកមានតួនាទីជាអ្នករើសបន្តទៅទៀត។ អីចឹងជាយន្តការ មិនមានការព្រួយបារម្ភអ្វីទេ។ ជាយន្តការគឺគ.ជ.ប.នឹងធ្វើបាននូវការជ្រើសរើសមន្រ្តីតាមការិយាល័យការបោះឆ្នោតចំនួនជិត១៤ម៉ឺននាក់»។
កម្ពុជានឹងរៀបចំការបោះឆ្នោតជ្រើសតាំងតំណាងរាស្រ្តអាណត្តិទី៦ នៅថ្ងៃទី២៩ ខែកក្កដា ឆ្នាំ២០១៨នេះ ដោយមិនមានការចូលរួមពីគណបក្សសង្គ្រោះជាតិ ជាគណបក្សជំទាស់ដែលត្រូវបានប្រជាពលរដ្ឋជាង៤០ភាគរយបោះឆ្នោតគាំទ្រកាលពីឆ្នាំ២០១៧។ ការបោះឆ្នោត នៅពេលខាងមុខត្រូវបានក្រុមប្រទេសប្រកាន់លទ្ធិប្រជាធិបតេយ្យ និងអង្គការសង្គមស៊ីវិលមួយចំនួនយល់ថា មិនមានភាពសេរី និងយុត្តិធម៌ទេ ខណៈសហរដ្ឋអាមេរិក និងក្រុមប្រទេសនៃសហភាពអឺរ៉ុបមួយចំនួនប្រកាសដកជំនួយលើផ្នែកបោះឆ្នោតនៅកម្ពុជា។
យ៉ាងណាក៏ដោយ គ.ជ.ប.ធ្លាប់ប្រកាស នាពេលកន្លងមកថា ខ្លួនបានត្រៀមថវិកាជាតិប្រមាណជា៥៣លានដុល្លារអាមេរិក សម្រាប់ការបោះឆ្នោតនៅខែកក្កដាខាងមុខ៕
