ភ្នំពេញ — គណៈកម្មាធិការជាតិរៀបចំការបោះឆ្នោត (គ.ជ.ប) បានប្រកាសពីរបៀបរបបនៃការចុះឃោសនានយោបាយស្វែងរកសំឡេងគាំទ្រពីអ្នកបោះឆ្នោត សម្រាប់គណបក្សនយោបាយចូលរួមការបោះឆ្នោតជ្រើសរើសក្រុមប្រឹក្សាឃុំសង្កាត់ ដែលនឹងប្រព្រឹត្តធ្វើឡើងនៅថ្ងៃទី ៥ ខែមិថុនាខាងមុខនេះ។
ក្នុងសេចក្តីណែនាំមួយចុះហត្ថលេខាដោយប្រធាន គ.ជ.ប លោក ប្រាជ្ញ ចន្ទ កាលពីថ្ងៃទី ១៣ ខែឧសភានេះ គណបក្សនយោបាយនីមួយៗ នឹងត្រូវអនុវត្តតាមការចង្អុលបង្ហាញរបស់ គ.ជ.ប ក្នុងពេលធ្វើយុទ្ធនាការឃោសនាបោះឆ្នោត ដើម្បីធានាថា ដំណើរការឃោសនានឹងធ្វើឡើងដោយសុវតិ្ថភាព និងមានសណ្តាប់ធ្នាប់ល្អ នៅតាមទីតាំងសាធារណៈ ឬនៅក្នុង និងក្រៅបរិវេណផ្សារ។
បើតាមសេចក្តីណែនាំរបស់ គ.ជ.ប ការហែក្បួនព្យុហយាត្រា ឬក្បួនដំណើរដោយក្រុមថ្មើរជើង ឬដោយយានជំនិះគ្រប់ប្រភេទ ត្រូវបានកំណត់ជាទម្រង់ និងទំហំចម្បងមួយចំនួន រួមមាន ការរៀបជាក្បួនមានបិទបដា ពាក្យស្លោក សារនយោបាយផ្សេងៗ ភ្ជាប់នឹងរថយន្ត ទោចក្រយានយន្ត ឬនិងត្រីចក្រយានយន្ត និងមានការចាក់ផ្សាយដោយឧបករណ៍បំពងសំឡេង និងការកំណត់ចំនួនមនុស្សទៅតាមប្រភេទនៃមធ្យោបាយប្រើប្រាស់ក្នុងការឃោសនា តួយ៉ាង គណបក្សនយោបាយអាចប្រើប្រាស់ទោចក្រយានយន្ត ឬ/និងត្រីចក្រយានយន្តចាប់ពី២០គ្រឿង និងជលយាន ឬយានជំនិះខាងផ្លូវទឹកគ្រប់ប្រភេទចាប់ពី៥គ្រឿងឡើងទៅ។
ចំពោះចំនួនលើកនៃការចុះឃោសនាបោះឆ្នោត គ.ជ.ប បានកំណត់ថា៖ «ការហែក្បួនឃោសនាបោះឆ្នោតក្នុងអំឡុងពេលឃោសនាបោះឆ្នោតជ្រើសរើសក្រុមប្រឹក្សាឃុំសង្កាត់ធ្វើបានយ៉ាងច្រើនពីរដងនៅក្នុងឃុំសង្កាត់ ដែលគណបក្សនយោបាយមានបញ្ជីបេក្ខជន ឈរឈ្មោះបោះឆ្នោត»។
ដោយឡែកសម្រាប់ការចូលឃោសនានៅក្នុងផ្សារ គណបក្សនយោបាយត្រូវកម្រិតចំនួនមនុស្សយ៉ាងច្រើនត្រឹមតែ ១០ នាក់ប៉ុណ្ណោះ ហើយត្រូវយកចិត្តទុកដាក់គោរព និងរក្សាឱ្យបាននូវសន្តិសុខ សុវត្ថិភាព សណ្តាប់ធ្នាប់ និងមិនត្រូវយកតាមខ្លួន ឬមិនត្រូវប្រើនូវឧបករណ៍បំពងសំឡេងឡើយ។ យ៉ាងណាក៏ដោយ ការផ្សព្វផ្សាយតាមឧគ្ឃោសនសព្ទអំពីសារនយោបាយ ឬនិងគោលនយោបាយរបស់គណបក្សអាចធ្វើបាននៅក្រៅបរិវេណផ្សារ។
គួរបញ្ជាក់ផងដែរថា ប្រទេសកម្ពុជានឹងរៀបចំការបោះឆ្នោតជ្រើសរើសក្រុមប្រឹក្សាឃុំសង្កាត់ ឬក្បាលម៉ាស៊ីនដឹកនាំនៅថ្នាក់មូលដ្ឋាននៅថ្ងៃទី ៥ ខែមិថុនា ឆ្នាំ ២០២២ ដោយមានគណបក្សនយោបាយចំនួន ១៧ ត្រូវគេរំពឹងថា នឹងចូលរួមដើម្បីដណ្តើមអាសនៈក្រុមប្រឹក្សាសរុបទាំងអស់ជាង ១១.០០០ នាក់ នៅឃុំសង្កាត់សរុបចំនួន ១.៦៥២ នៅក្នុងប្រទេស។
ការបោះឆ្នោតជ្រើសរើសមេដឹកនាំថ្នាក់មូលដ្ឋាននាពេលខាងមុខនេះ កំពុងស្ថិតក្រោមការតាមដានពីក្រុមប្រទេសប្រកាន់យកលទ្ធិប្រជាធិបតេយ្យ រួមមានសហគមន៍អឺរ៉ុប សហរដ្ឋអាមេរិក និងជប៉ុន ដែលសុទ្ធតែចង់ឃើញការបោះឆ្នោតមួយធ្វើឡើងដោយគ្មានការរឹតត្បិតលើក្រុមជំទាស់ និងដោយមានលក្ខណៈបើកចំហ ដើម្បីឆ្លុះបង្ហាញពីឆន្ទៈពិតប្រាកដរបស់អ្នកបោះឆ្នោតនៅកម្ពុជា៕
