ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ពល​ករ​ខ្មែរ​នៅ​ប្រទេស​ថៃ​៨​នាក់​ស្លាប់​ក្នុង​ហេតុ​ការណ៍​គ្រោះ​ថ្នាក់​ចរាចរណ៍


កម្មករ​កម្ពុជា​ឈរ​នៅ​លើឡាន​ប៉ូលិស​ថៃខណដែលពួកគេមកដល់​កម្ពុជា​កាលពី​ថ្ងៃទី​១៧ មិថុនា ឆ្នាំ២០១៤។(AP Photo/Heng Sinith)
កម្មករ​កម្ពុជា​ឈរ​នៅ​លើឡាន​ប៉ូលិស​ថៃខណដែលពួកគេមកដល់​កម្ពុជា​កាលពី​ថ្ងៃទី​១៧ មិថុនា ឆ្នាំ២០១៤។(AP Photo/Heng Sinith)

ពលករខ្មែរ​ធ្វើ​ការ​នៅ​ប្រទេស​ថៃ​ចំនួន​៨នាក់​បាន​ស្លាប់​នៅក្នុង​ហេតុការណ៍​គ្រោះ​ថ្នាក់​ចរាចរណ៍​មួយ កាលពី​សប្តាហ៍​មុន ខណៈ​អ្នក​មួយ​ចំនួនទៀត​កំពុង​សម្រាក​ព្យាបាល​នៅ​មន្ទី​រ​ពេទ្យ។ នេះបើ​យោង​តាមសាររំលែក​ទុក្ខ​របស់​ស្ថាន​ទូត​កម្ពុជា​ប្រចាំនៅ​ប្រទេសថៃ។

បើ​តាម​សាររំលែក​ទុក្ខ ចុះថ្ងៃទី​១០ ខែមេសា ឆ្នាំ​២០២៣ គ្រោះ​ថ្នាក់​នេះ​បាន​កើត​ឡើង កាលពី​ថ្ងៃទី​៨ ខែមេសា នៅ​ក្នុង​ខេត្ត​ឈុនបុរី ប្រទេសថៃ ដោយ​មាន​ការ​បុក​គ្នា​រវាង​រថយន្តដឹក​អ្នកដំណើរ និងរថយន្តកុងតឺន័រ។

សាររំលែក​ទុក្ខដដែល​បញ្ជាក់ថា​៖ «ស្ថានទូត​កម្ពុជា​ប្រចាំ​ប្រទេស​ថៃ​សូមសម្តែងនូវការ​សោក​ស្តាយ​គ្មាន​អ្វី​ប្រៀប​ផ្ទឹម​បាន​ ចំពោះ​មរណភាព​នេះ​ និង​សូម​ចូល​រួម​រំលែក​ទុក្ខ​ដ៏​សោ​ក​សង្រេង​បំផុត​ជាមួយ​ ក្រុមគ្រួសារ សាច់ញាតិ​នៃសព»។

យោង​តាម​សារព័ត៌មាន Pattaya News ចុះផ្សាយ​កាល​ពី​ថ្ងៃអាទិត្យ ពល​ករខ្មែរ​ចំនួន​៨នាក់​បានស្លាប់​ ដោយសារតែគ្រោះ​ថ្នាក់ចរាចរណ៍​នៅពេល​ដែល​ធ្វើ​ដំណើរ​មក​ខេត្ត​ឈុនបុរី​ ដើម្បី​ពន្យារ​បណ្ណការងារ។

បើ​តាម​សារព័ត៌មាន​ដដែល​ អ្នក​ដំណើរ​ចំនួន​៤នាក់​បាន​ស្លាប់​ភ្លាម​ៗនៅ​កន្លែង​កើត​ហេតុ​ ខណៈ​៤​នាក់​ផ្សេងទៀត​បាន​ស្លាប់​នៅ​មន្ទីរពេទ្យ​ ព្រម​ទាំងមួយចំនួន​ទៀត​បាន​រងរបួស។ បើ​តាម​សារព័ត៌មាន​មួយ​នេះ គ្រោះ​ថ្នាក់​កើតឡើង​អាច​បណ្តាលមក​ពី​អ្នក​បើក​រថយន្ត​កុងតឺន័រងងុយ​គេង។

ប្រជា​ពលរដ្ឋ​ខ្មែរ​ប្រមាណ​មួយ​លាន ​២០​ម៉ឺន​នាក់ ​កំពុង​រស់​នៅ​និង​ធ្វើការ​នៅ​ប្រទេស​ថៃ​ ហើយ​រដ្ឋាភិបាល​កម្ពុជា​ប៉ាន់​ប្រមាណ​ថា ​ពួកគេ​ច្រើន​គួរ​សម​គឺ​ជា​ពលករ​មិន​ស្រប​ច្បាប់។

នាយក​ទទួល​បន្ទុក​កិច្ច​ការទូទៅ​នៃ​អង្គ​ការ​ការ​ពារ​សិទ្ធិ​មនុស្ស​លី​កា​ដូ លោក អំ សំអាត ប្រាប់​វីអូ​អេថា បញ្ហា​ដែល​ពលករ​ខ្មែរ​ប្រឈម ពេល​ធ្វើការ​នៅប្រ​ទេស​ថៃ មាន​ដូចជា​ការរស់​នៅ ភាសា ការងារ​ងន់​មាន​ប្រាក់​ខែទាប​ជា​ដើម។ លោក​ជំរុឱ្យ​អាជ្ញាធរ​កម្ពុជាយក​ចិត្តទុក​ដាក់​លើពួក​គេបន្ថែម​ទៀត។

លោក​ថ្លែងថា៖«អ្វីដែល​សំខាន់នោះ​គឺការត្រួត​ពិនិត្យ ការ​ពិនិត្យ​មើល​ទៅលើ​ស្ថានភា​ពពលក​រខ្មែរ និង​ការជួយ​ពលករខ្មែរ​ឱ្យទាន់​ពេលវេលា​ពីស្ថានទូត​ឬក៏អាជ្ញាធរ​កុងស៊ុលនៅ​ក្នុង​ប្រទេសថៃ អាហ្នឹង​ជា​រឿងមួយ​ល្អ»។

យោង​តាម​របាយ​ការណ៍​របស់​អង្គការ​ទេសន្តរ​ប្រវេសន៍​អន្តរ​ជាតិ ​(IOM) ​ឆ្នាំ​២០១៩ ​មួយ​ភាគ​បី​នៃ​ពលករ​ចំណាក​ស្រុក​ដែល​ត្រូវ​បាន​គេ​សាកសួរ​ព័ត៌មាន​ ពុំ​មាន​ការងារ​ធ្វើ​ក្នុង​ស្រុក​ មុន​ពេល​ពួក​គេ​ចេញ​ពី​កម្ពុជា។ ជិត​ពាក់​កណ្តាល គឺគ្មាន​ចំណូល ​និង​ប្រហែល​ពីរ​ភាគ​បី​បាន​សម្រេច​ចិត្ត​ទៅ​ប្រទេស​ថៃ ដើម្បីស្វែង​រក​ការងារ​ដោយ​សារ​ពុំ​មាន​ឱកាស​ការងារ​នៅ​ក្នុង​ស្រុក ​និង​ដោយ​សារ​ចង់​បាន​ចំណូល​ប្រសើរ​ជាង​មុន។

របាយ​ការណ៍​បង្ហាញ​ថា​ ចំនួន​ពាក់​កណ្តាល​នៃ​អ្នក​ដែល​ត្រូវ​បាន​សម្ភាស​បាន​ផ្ញើ​ប្រាក់​ត្រឡប់​ទៅ​ស្រុក​កំណើត​ប្រមាណ ​១២២៨​ដុល្លារ​ក្នុង​មួយ​ឆ្នាំ ​ហើយ​ថា​ប្រាក់​ទាំង​នេះ ​គឺ​ជា​ប្រាក់​ចំណូល​ចម្បង​សម្រាប់​ទំនុក​បម្រុង​គ្រួសារ​នៅ​ប្រទេស​កម្ពុជា​ឬ​ក៏​ដើម្បី​ប្រើ​ប្រាស់​ធ្វើ​ឲ្យ​ជីវភាព​ប្រសើរ​ឡើង។

ក្នុង​ពេល​ចូលរួមពិធីសង្រ្កាន្ត​នៅ​ប្រទេស​ថៃ កាលពី​ថ្ងៃទី​៩ ខែ​មេសា រដ្ឋមន្រ្តី​ក្រសួង​ការងារ លោក អ៊ិត សំហេង បាន​លើក​ឡើងថា​ពលករ​ខ្មែរ​១លាន​២សែន​នាក់​ក្នុង​ប្រទេស​ថៃ ក្នុង​ម្នាក់​បាន​ផ្ញើ​ប្រាក់​ទៅ​ផ្ទះ​ចំនួន​១៦៧ដុល្លារ​អាមេរិក​ក្នុង​មួយ​ខែ។ នេះ​បើ​យោង​តាម​សារ​ដែល​បង្ហោះ​នៅ​លើ​ហ្វេសប៊ុក​របស់​ក្រសួង​ការងារ​ចេញ​ផ្សាយ​កាល​ពី​ថ្ងៃ​ចន្ទ៕

XS
SM
MD
LG