យន្តហោះរបស់ក្រុមហ៊ុនអាកាសចរណ៍ Egypt Air បានទាក់ទិននៅក្នុងការធ្លាក់សម្លាប់មនុស្សហើយនិងឧបទ្ទវហេតុប្លន់យន្តហោះជាច្រើនលើកក្នុងរយៈពេល៣០ឆ្នាំកន្លងមកនេះ។
·ឆ្នាំ១៩៨៥៖ ខ្មាន់កាំភ្លើងមួយក្រុម បានបង្ខំជើងយន្តហោះ Egypt Air ពីទីក្រុងអាថែនទៅកាន់ទីក្រុងគែរចុះនៅប្រទេសម៉ាល់ត៍ហើយបានសម្លាប់អ្នកដំណើរ៥នាក់។ អ្នកដំណើរ៥៥នាក់ទៀតបានស្លាប់នៅក្នុងការប្រយុទ្ធគ្នានៅពេលដែលពួកកងកុម៉ង់ដូអេហ្ស៊ីបបានវាយសង្គ្រប់លើយន្តហោះនោះ។
·ឆ្នាំ១៩៩៩៖ ជើងហោះហើរ៩៩០របស់ក្រុមហ៊ុនអាកាសចរណ៍ Egypt Air បានធ្លាក់នៅក្នុងមហាសមុទ្រទល់មុខឆ្នេរសមុទ្រសហរដ្ឋអាមេរិកដោយសម្លាប់មនុស្សទាំងអស់២១៧នាក់នៅលើយន្តហោះនោះ។ ពួកអ្នកស៊ើបអង្កេតសហរដ្ឋអាមេរិក បាននិយាយថា ការធ្លាក់នោះគឺជាចេតនា ក៏ប៉ុន្តែ អេហ្ស៊ីប បានច្រានចោលការសន្និដ្ឋាននោះ។
·ឆ្នាំ២០០២៖ ជើងហោះហើរ៨៤៣របស់ក្រុមហ៊ុនអាកាសចរណ៍ Egypt Air បានធ្លាក់នៅជិតចំណតអាកាសយានក្នុងរដ្ឋធានីនៃប្រទេសទុយនីស៊ីខណៈដែលកំពុងព្យាយាមចុះនៅពេលមានអាកាសធាតុមិនល្អ ដោយបានសម្លាប់មនុស្សយ៉ាងតិចណាស់ក៏១៨នាក់ដែរ។
·ឆ្នាំ២០០៩៖ ពួកឆ្មាំការពារសន្តិសុខនៅលើជើងយន្តហោះរបស់ក្រុមហ៊ុនអាកាសចរណ៍ Egypt Air ពីទីក្រុង Istanbul នៃប្រទេសតួកគីទៅកាន់ទីក្រុងគែរបានចាប់បុរសជនជាតិស៊ូដង់ម្នាក់ដែលបានព្យាយាមប្លន់យន្តហោះនោះ។
·ឆ្នាំ២០១៥៖ មិនមែនជើងហោះហើររបស់ក្រុមហ៊ុនអាកាសចរណ៍ Egypt Air ទេ ក៏ប៉ុន្តែ ជាជើងហោះហើររបស់ក្រុមហ៊ុនអាកាសចរណ៍ Metrojet របស់រុស្ស៊ី បានធ្លាក់នៅឧបទ្វីបស៊ីណៃរបស់អេហ្ស៊ីបភ្លាមៗបន្ទាប់ពីហោះឡើង ដោយបានសម្លាប់មនុស្ស២២៤នាក់។ រដ្ឋាភិបាលរុស្ស៊ីនិងប្រទេសលោកខាងលិច បាននិយាយថា ភេរវកម្មទំនងជាមូលហេតុនៃការធ្លាក់នេះ ហើយសាខារបស់ក្រុមរដ្ឋឥស្លាមក្នុងស្រុក បានអះអាងពីការដាក់គ្រាប់បែកនៅលើយន្តហោះនោះ។
·ឆ្នាំ២០១៦៖ អ្នកប្លន់យន្តហោះម្នាក់ បានអះអាងថាមានគ្រឿងផ្ទុះដែលបានបង្ខំឲ្យជើងយន្តហោះរបស់ក្រុមហ៊ុនអាកាសចរណ៍ Egypt Air ចុះចតនៅលើកោះ Cyprus។
