ក្រុមមន្រ្តីបាននិយាយនៅថ្ងៃអង្គារនេះថា ការប្រយុទ្ធពេលថ្មីៗនេះរវាងកងទ័ពនៃប្រទេសអ៊ុយក្រែននិងក្រុមទាមទារបំបែករដ្ឋដែលគាំទ្រដោយប្រទេសរុស្ស៊ី បានសម្លាប់មនុស្សយ៉ាងហោចណាស់៨នាក់នៅក្នុងតំបន់ Donetsk។
ក្រុមមន្រ្តីនៅឯសាលាក្រុងDonetskដែលកាន់កាប់ដោយក្រុមឧទ្ទាមក៏បាននិយាយដែរថា មនុស្សយ៉ាងហោចណាស់២២នាក់ដែរ បានរងរបួសនៅក្នុងការផ្ទុះគ្រាប់ផ្លោងដ៏ខ្លាំងក្លាមួយកាលពីជាង២៤ម៉ោងមុន។
ការប្រយុទ្ធបានរាលដាលកាន់តែខ្លាំងឡើងនៅក្នុងតំបន់ Donetsk និង Luhansk ដែលជាតំបន់ទាមទារបំបែករដ្ឋប្រកាសដោយខ្លួនឯង ជាពិសេសនៅជុំវិញទីក្រុង Debaltseve ដែលត្រួតត្រាដោយប្រទេសអ៊ុយក្រែន ចាប់តាំងពីការចរចាសន្តិភាពនៅក្នុងប្រទេសបែលឡារុស (Belarus) រវាងរដ្ឋាភិបាលនៃប្រទេសអ៊ុយក្រែននិងក្រុមទាមទារបំបែករដ្ឋបានបរាជ័យកាលពីថ្ងៃសៅរ៍សប្តាហ៍មុន។
មានការភ័យខ្លាចថាអំពើហិង្សាអាចរាលដាលកាន់តែធំឡើងនៅពេលឆាប់ៗនេះ។ កាលពីថ្ងៃច័ន្ទម្សិលមិញ មេដឹកនាំបំបែករដ្ឋដែលគាំទ្រដោយប្រទេសរុស្ស៊ីបានអំពី «ចលនានៃការផ្លាស់ប្តូរទូទៅ» ដោយមានគោលបំណងពង្រឹងក្រុមកងកម្លាំងប្រដាប់អាវុធទាមទារបំបែករដ្ឋឲ្យទៅដល់១សែននាក់។
នៅក្នុងខណៈនោះដែរ សហរដ្ឋអាមេរិកនិយាយថា ខ្លួនមិនបានធ្វើការសម្រេច ចិត្តថា តើនឹងផ្តល់ឲ្យប្រទេសអ៊ុយក្រែននូវជំនួយអាវុធនៅក្នុងការប្រយុទ្ធប្រឆាំងក្រុមទាមទារបំបែករដ្ឋនោះទេ។
លោកស្រី Jen Psaki អ្នកនាំពាក្យក្រសួងការបរទេសសហរដ្ឋអាមេរិកបានប្រាប់ក្រុមអ្នកយកព័ត៌មាននៅឯការថ្លែងព័ត៌មានប្រចាំថ្ងៃនៅក្រសួងការបរទេសថា មិនទាន់មានការសម្រេចនៅឡើយ អ្វីៗស្ថិតនៅលើតុ ហើយការពិភាក្សាកំពុងធ្វើឡើង ក៏ប៉ុន្តែការសម្រេចមិនទាន់បានធ្វើនៅឡើយទេ៕
