សិស្សវិទ្យាល័យហូឡង់មួយក្រុមដែលមានគ្នា២៥នាក់ បានត្រឡប់ទៅដល់ប្រទេសវិញកាលពីថ្ងៃអាទិត្យ ក្រោយពីបានធ្វើដំណើរតាមទូកក្តោងរយៈពេល៥សប្តាហ៍ឆ្លងកាត់មហាសមុទ្រអាត្លង់ទិក ជំនួសឲ្យការជិះយន្តហោះដោយសារការរាតត្បាតនៃវីរុសកូរ៉ូណា។
ក្រុមសិស្សដែលមានអាយុពី១៤ទៅ១៧ឆ្នាំទាំងនេះ មានបទពិសោធន៍ក្នុងការបញ្ជាទូកក្តោងតិចតួចបំផុត។ ពួកគេត្រូវបានមើលពីលើដោយក្រុមអ្នកមានបទពិសោធន៍បើកទូកក្តោងចំនួន១២នាក់ដែលដឹកនាំដោយលោក Christophe Meijer ប្រធានក្រុមទូកក្តោង Wylde Swan និងគ្រូបីនាក់ដែលបានអមដំណើរសិស្សទាំងនោះក្នុងដំណើរជិះទូកសិក្សានៅតំបន់សមុទ្រការ៉ាអ៊ីប។
ក្រុមសិស្សទាំង២៥នាក់ត្រូវបានគេដាក់ឲ្យនៅដាច់ដោយឡែកពីគ្នាតាំងពីថ្ងៃទី១៨ ខែមីនាម៉្លេះរហូតដល់ពីរសប្តាហ៍មុន ដោយត្រូវបានគេពិនិត្យសីតុណ្ហភាព និងតាមដានរាល់ការក្អកកណ្តាស់ជាទៀងទាត់ រហូតគ្រប់១៤ថ្ងៃ ទើបប្រាកដថា មិនមានវីរុសកូរ៉ូណានៅលើទូកក្តោង Wylde Swan។
ជំនួសឲ្យការជិះយន្តហោះពីប្រទេសគុយបាទៅហូឡង់ ក្រុមនេះសម្រេចបើកទូកដែលមានក្តោងកម្ពស់៦០ម៉ែត្រនេះ ឆ្លងកាត់មហាសមុទ្រអាត្លង់ទិកចម្ងាយជិត៧.០០០គីឡូម៉ែត្រទោកាន់កំពង់ផែ Harlingen របស់ហូឡង់។
ពេលមកដល់ប្រទេសវិញ ឪពុកម្តាយនិងបងប្អូនបង្កើតនៃសិស្សទាំង២៥នេះ បានបើកមកទទួលស្វាគមន៍ពួកគេ ដោយបើករថយន្តចូលយកម្នាក់ម្តងៗ ដោយត្រូវគោរពវិធានការរក្សាគម្លាតពីគ្នាក្នុងសង្គម៕
