រដ្ឋបន្ថែមទៀតនៅក្នុងសហរដ្ឋអាមេរិកគ្រោងនឹងចាត់វិធានការនានានៅថ្ងៃចន្ទនេះដើម្បីបន្ធូរបន្ថយការដាក់កំហិតមួយចំនួនទាក់ទិនទៅនឹងការទប់ស្កាត់ការឆ្លងរាលដាលជំងឺកូវីដ១៩។ ចំណែកឯមន្ត្រីសុខាភិបាលរដ្ឋាភិបាលសហព័ន្ធវិញបានប្រកាសថា ជំងឺកូវីដ១៩ មានរោគសញ្ញា ៦ ផ្សេងទៀត។
មន្ត្រីសុខាភិបាលសហរដ្ឋអាមេរិកបញ្ជាក់ថា គ្រុនរងា ញ័រខ្លួនព្រឺរងាជាបន្ត ឈឺសាច់ដុំ ឈឺក្បាល ឈឺបំពង់ក និងការបាត់បង់សមត្ថភាពហិតដឹងក្លិន និងដឹងរសជាតិ អាចជាសញ្ញានៃការឆ្លងជំងឺកូវីដ១៩។
មជ្ឈមណ្ឌលគ្រប់គ្រង និងបង្ការជំងឺសហរដ្ឋអាមេរិក កាលពីមុនបានបញ្ជាក់ថា មានរោគសញ្ញា ៣ សំខាន់នៃជំងឺកូវីដ១៩ ដែលនោះគឺគ្រុនក្ដៅ ពិបាកដកដង្ហើម និងក្អក។
ថ្នាក់ដឹកនាំនៃរដ្ឋ Colorado រដ្ឋ Mississippi រដ្ឋ Montana និងរដ្ឋ Tennessee បានអនុញ្ញាតឲ្យអាជីវកម្មមួយចំនួនបើកដំណើរការឡើងវិញជាធម្មតានៅថ្ងៃចន្ទនេះ។ រដ្ឋទាំងនេះ រួមទាំងរដ្ឋ Georgia រដ្ឋ Oklahoma រដ្ឋ Alaska និងរដ្ឋ South Carolina បានចាត់វិធានការនៅក្នុងការជំរុញឲ្យពលរដ្ឋចូលធ្វើការវិញ និងអនុញ្ញាតឲ្យពួកគេអាចត្រឡប់ទៅរកស្ថានភាពជីវិតមួយចំនួនមុនពេលមានវិបត្តិជំងឺកូវីដ១៩ កើតឡើង។
អ្នកជំនាញខាងសុខាភិបាលបានព្រមានប្រឆាំងនឹងការបើកដំណើរការសកម្មភាពសេដ្ឋកិច្ចឡើងវិញឆាប់ពេក ហើយអភិបាលរដ្ឋជាច្រើនបានបញ្ជាក់ថា វិធានការនានានឹងនៅជាធរមានដដែលដើម្បីការពារសុវត្ថិភាពរបស់សាធារណជន។
នៅក្នុងសហរដ្ឋអាមេរិក មានករណីឆ្លងជំងឺកូវីដ១៩ យ៉ាងតិច ៩ សែន ៨ ម៉ឺននាក់ និងអ្នកស្លាប់ដោយសារជំងឺនេះយ៉ាងតិច ៥ ម៉ឺន ៥ ពាន់នាក់៕
