ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ស.រ.អា.​និង​កូរ៉េ​ខាង​ត្បូង​បន្ថយ​ទំហំ​សមយុទ្ធ​យោធា


មេដឹកនាំ​កូរ៉េ​ខាង​ជើង Kim Jong Un ថត​រូប​ជាមួយ​នឹង​អ្នក​ចម្រៀង K-pop របស់​កូរ៉េ​ខាង​ត្បូង​នៅ​ក្នុង​ក្រុង​ព្យុងយ៉ាង កាលពី​ថ្ងៃទី២ ខែមេសា ឆ្នាំ២០១៨។

សប្តាហ៍នេះ​ សហ​រដ្ឋអាមេរិក​និង​កូរ៉េខាង​ត្បូងចាប់ផ្តើម​សមយុទ្ធយោធា​រួមគ្នា​ដែល​ត្រូវ​បាន​ពន្យារ​ពេល​ដើម្បី​រក្សា​សន្តិភាព​សម្រាប់​កីឡា​អូឡាំពិក​នៅ​កូរ៉េ​ខាង​ត្បូង​ ហើយ​បាន​កាត់​បន្ថយ​ទំហំ​សមយុទ្ធ​ដែលនេះ​ជាកាយ​វិការ​សម្រប​សម្រួល​ពាក់ព័ន្ធ​នឹង​ការ​ចរចា​ដើម្បី​បញ្ចប់​កម្មវិធី​នុយក្លេអ៊ែរ​របស់​កូរ៉េខាង​ជើង។​ ទោះ​បី​ជា​យ៉ាង​ណា​ក៏​ដោយ​ការ​បញ្ចប់​សមយុទ្ធ​ជា​អចិន្ត្រៃយ៍​និង​បញ្ហា​វត្តមាន​យោធា​អាមេរិក​នៅ​ក្នុង​ប្រទេស​កូរ៉េ​ខាង​ត្បូង​អាច​ជា​កត្តា​សំខាន់​ក្នុង​ការ​ចរចា​នា​ពេល​ខាង​មុខ។​

សមយុទ្ធ​យោធា​រួមគ្នា​នៅ​ឆ្នាំ​នេះ​ស្រដៀង​សមយុទ្ធ​កាលពី​មុន​ ដោយ​មាន​ទាហាន​អាមេរិក​ជាង​២ម៉ឺន៣ពាន់នាក់​និង​ទាហាន​កូរ៉េ​ខាង​ត្បូង​៣០ម៉ឺន​នាក់។ នេះជា​សមយុទ្ធ​ឆ្លើយតប​ទៅ​នឹង​ការ​វាយប្រហារ​ដោយ​ម៉ាស៊ីន​កុំព្យូទ័រ​ដែល​ព្យាករណ៍​អំពី​របៀប​វាយ​ប្រហារ​ដោយ​កូរ៉េ​ខាង​ជើង។​ ប៉ុន្តែ​ឆ្នាំ​នេះ​ សមយុទ្ធ​នេះ​សង្កត់​ធ្ងន់​លើ​ការ​ការពារ​ជា​ជាង​ប្រតិបត្តិការ​វាយលុក​ដែល​កំណត់​ទិសដៅ​ទៅ​លើ​មេដឹកនាំ​នៅ​ទីក្រុង​ព្យុងយ៉ាង។ ​

យន្តហោះ​មាន​សមត្ថភាព​ទម្លាក់​គ្រាប់បែក​នុយក្លេអ៊ែរ​អាមេរិក​និង​នាវា​ផ្ទុក​យន្តហោះ​ត្រូវ​បាន​គេ​រំពឹង​ថា​ នឹង​មិន​នឹង​ចូលរួម​ក្នុង​សមយុទ្ធ​នេះ​ទេ។​ ការ​កាត់បន្ថយ​ទំហំ​សមយុទ្ធ​នេះ​ទំនង​ជា​សម្បទាន​បណ្ដោះ​អាសន្ន​ដើម្បី​រក្សា​ចលនា​ការ​ទូត​ជាមួយ​កូរ៉េ​ខាង​ជើង​ដែល​ថ្មីៗ​នេះ​បាន​ប្តូរ​ជំហរ​ពីការ​សាកល្បង​កាំជ្រួច​និង​នុយក្លេអ៊ែរ​ និង​ការ​គំរាមកំហែង ហើយ​ចូលរួម​ក្នុង​កិច្ចចរចា​គ្មាន​អាវុធ​នុយក្លេអ៊ែរ​នា​ពេល​ខាង​មុខ​ជាមួយ​កូរ៉េខាង​ត្បូង និង​អាមេរិក។ ទោះ​បី​ជា​យ៉ាង​ណា​ក៏​ដោយ ​មាន​ការ​ព្រួយ​បារម្ភ​ថា ការ​រឹតបន្តឹង​ និង​ការ​លុប​ចោល​នូវ​សមយុទ្ធ​យោធា​អាច​ជាចំណុច​សំខាន់​នៃ​ការ​ចរចា​នុយក្លេអ៊ែរ៕

XS
SM
MD
LG