បេក្ខជនប្រធានាធិបតីតំណាងឲ្យគណបក្សសាធារណរដ្ឋរបស់អាមេរិកលោក Donald Trump និងប្រធានាធិបតីប្រទេសម៉ិកស៊ិកលោក Enrique Pena Nieto បានជួបពិភាក្សាគ្នានៅក្នុងរដ្ឋធានីម៉ិកស៊ីកូដែលប្រធានាធិបតីម៉ិកស៊ិកថ្លែងថា ដំណើរទស្សនកិច្ចរបស់លោក Trump គឺជាការបង្ហាញឲ្យឃើញថា អាមេរិកនិងប្រទេសម៉ិកស៊ិកមានសារៈសំខាន់ចំពោះគ្នា។
នៅក្នុងសន្និសីទសារព័ត៌មានមួយបន្ទាប់ពីកិច្ចប្រជុំនោះ លោកប្រធានាធិបតី Pena Nieto បានថ្លែងថា ទំនាក់ទំនងទ្វេភាគីរវាងប្រទេសទាំងពីរគួរតែផ្តោតលើការគោរពចំពោះគ្នាទៅវិញទៅមក។
លោកបាននិយាយចំអកដល់ប្រទេសម៉ិកស៊ិកថា បានបញ្ជូនជនអន្តោប្រវេសន៍ដែលជាឧក្រិដ្ឋជន និងជនរំលោភផ្លូវភេទចូលដែនដីអាមេរិក ហើយកេងចំណេញផលប្រយោជន៍ពីអ្នកធ្វើការជនជាតិអាមេរិកាំងតាមរយៈកិច្ចព្រមព្រៀងពាណិជ្ជកម្មដែលមានអាយុកាលពីរទសវត្សរ៍មកហើយនោះ។ លោក Trump បានទទួលការគាំទ្រពីសំណាក់អ្នកគាំទ្រគណបក្សសាធារណៈរដ្ឋរាប់លាននាក់ តាមរយៈការប្រកាសសាងសង់ជញ្ជាំងនៅតាមព្រំដែនអាមេរិកជាមួយនឹងប្រទេសម៉ិកស៊ិក ដើម្បីរារាំងការធ្វើអន្តោប្រវេសន៍ខុសច្បាប់ ហើយលោកក៏បានបង្ខំឲ្យប្រទេសម៉ិកស៊ិកបង់ថ្លៃសាងសង់ជញ្ជាំងនេះផងដែរ ដែលគំនិតនេះត្រូវបានលោកប្រធានាធិបតីប្រទេសម៉ិកស៊ិក Pena Nieto ច្រានចោលភា្លមៗផងដែរ។
លោកប្រធានាធីបតី Pena Nieto បានថ្លែងថា លោក និងលោក Trump បានពិភាក្សាគ្នាដោយបើកចំហរ និងប្រកបដោយការស្ថាបនា។ លោកបានថ្លែងថា លោកឆ្លៀតឱកាសនោះប្រាប់ទៅលោក Trump ថា ពលរដ្ឋម៉ិកស៊ិកនៅក្នុងសហរដ្ឋអាមេរិកបានជួយដល់អាមេរិកយ៉ាងច្រើន ហើយថាពួកគេជាមនុស្សឧស្សាហ៍ និងមានភាពស្មោះត្រង់។
ចំណែកឯលោក Trump វិញ លោកបានថ្លែងនៅឯសន្និសីទសារព័ត៌មានថា លោកមានអារម្មណ៍ថា ពលរដ្ឋម៉ិកស៊ិកនៅក្នុងសហរដ្ឋអាមេរិកពិតជាអស្ចារ្យ ហើយលោកបានហៅពួកគេថា អ្នកទាំងនោះជាមនុស្សអស្ចារ្យ និងឧស្សាហ៍ព្យាយាមផងដែរ។
ប៉ុន្តែលោកបានអំពាវនាវឲ្យបញ្ចប់ការធ្វើអន្តោប្រវេសន៍ខុសច្បាប់ពីប្រទេសម៉ិកស៊ិក ឬបណ្តាប្រទេសផ្សេងៗទៀត ចូលមកក្នុងសហរដ្ឋអាមេរិក។ លោកបានថ្លែងថា ភាគីណាមួយ មានសិទ្ធិក្នុងការសាងសង់ជញ្ជាំងនៅតាមព្រំដែនដើម្បីរារាំងជនអន្តោប្រវេសន៍ខុសច្បាប់ទាំងនោះ៕
