ការត្រឡប់មកកាន់តំណែងជាប្រធានាធិបតីវិញរបស់លោក Donald Trump នាពេលឆាប់ៗនេះមានន័យថា លោកនឹងបង្ហាញឡើងនូវរដ្ឋបាលថ្មីស្រឡាងមួយខុសពីរដ្ឋបាលបច្ចុប្បន្នរបស់ប្រធានធិបតីអាមេរិកលោក Joe Biden។ ក្រុមការងាររបស់លោក Trump ក៏បានប្ដេជ្ញាផងដែរថា រដ្ឋបាលអាណត្តិទីពីររបស់លោក Trump នេះនឹងមិនដូចទៅនឹងរដ្ឋបាលលើកទីមួយរបស់លោកដែលលោកបានបង្កើតក្រោយការបោះឆ្នោតឆ្នាំ ២០១៦ នោះទេ។
ប្រធានាធិបតីជាប់ឆ្នោតរូបនេះនឹងត្រូវរៀបចំក្រុមការងាររបស់លោកមុនថ្ងៃលោកស្បថចូលកាន់តំណែងផ្លូវការនៅថ្ងៃទី ២០ ខែមករាខាងមុខ។ ចំណុចសំខាន់មួយដែលត្រូវធ្វើនាពេលនេះគឺការតែងតាំងមនុស្សប្រមាណ ៤.០០០ នាក់ឱ្យកាន់តំណែងនយោបាយក្នុងជួររដ្ឋាភិបាល ដែលអ្នកទាំងនោះត្រូវបានសម្រិតសម្រាំងដោយក្រុមការងាររបស់លោក Trump។
មនុស្សប្រមាណ ១.២០០ នាក់ក្នុងចំណោមនោះត្រូវឆ្លងកាត់ការយល់ព្រមពីព្រឹទ្ធសភា ដែលការងារនេះមិនមានអ្វីពិបាកទេដោយសារតែព្រឹទ្ធសភានៅពេលនេះនឹងស្ថិតនៅក្រោមការគ្រប់គ្រងរបស់គណបក្សសាធារណរដ្ឋ។
កិច្ចការផ្ទេរអំណាចនេះមិនមែនជាបញ្ហាសម្រាប់លោក Trump នោះទេ ដោយសារតែលោកមានបទពិសោធន៍លើកិច្ចការនេះរួចហើយ។ លោកធ្លាប់បានបង្កើតរដ្ឋបាលថ្មីទាំងស្រុងកាលពីអាណត្តិទីមួយរបស់លោក ហើយលើកនេះលោកមានគំនិតច្បាស់លាស់ក្នុងការធ្វើការងារនេះឱ្យខុសពីលើកមុន។
លោក Trump បានថ្លែងនៅក្នុងពិធីប្រកាសជ័យជម្នះរបស់លោកកាលពីថ្ងៃទី ៦ ខែវិច្ឆិកាថា លោក Robert Kennedy Jr. ដែលជាអតីតបេក្ខជនប្រធានាធិបតីនិងជាសកម្មជនប្រឆាំងនឹងការចាក់វ៉ាក់សាំងនឹងចូលរួមជាមួយលោកដើម្បីជួយឱ្យ «សហរដ្ឋអាមេរិកមាំមួនម្ដងទៀត» ហើយលោកបានបន្ថែមថា «យើងនឹងឱ្យលោកកាន់តំណែងនេះ»។
លោក Trump ក៏បានសន្យាផងដែរថានឹងតែងតាំងលោក Elon Musk ដែលកើតនៅប្រទេសអាហ្វ្រិកខាងត្បូងនិងជាអ្នកគាំទ្រយុទ្ធនាការឃោសនាបោះឆ្នោតរបស់លោក ឱ្យកាន់តំណែងជារដ្ឋមន្ត្រីសម្រាប់ការកាត់បន្ថយការចំណាយរបស់រដ្ឋាភិបាលសហព័ន្ធ។ លោក Elon Musk ដែលជានាយកប្រតិបត្តិក្រុមហ៊ុន Tesla បានស្នើថា លោកអាចរកឃើញខ្ទង់ចំណាយរាប់លានលានដុល្លាររបស់រដ្ឋាភិបាលដែលនឹងត្រូវលុបបំបាត់។
ការផ្ទេរអំណាចនេះមិនត្រឹមតែជាការតែងតាំងមនុស្សដើម្បីបំពេញមុខងារផ្សេងៗនោះទេ ប្រធានាធិបតីជាប់ឆ្នោតភាគច្រើនក៏ស្ដាប់ការផ្ដល់ដំណឹងអំពីបញ្ហាស៊ើបការណ៍សម្ងាត់ជារៀងរាល់ថ្ងៃឬស្ទើរតែរាល់ថ្ងៃក្នុងអំឡុងពេលនេះផងដែរ។
កាលពីឆ្នាំ ២០០៨ លោកប្រធានាធិបតី George W. Bush ដែលជិតចប់អាណត្តិបានធ្វើបទបង្ហាញដល់ប្រធានាធិបតីជាប់ឆ្នោតលោក Barack Obama អំពីប្រតិបត្តិការសម្ងាត់របស់សហរដ្ឋអាមេរិក។ នៅពេលលោក Trump ត្រៀមចូលកាន់តំណែងនៅឆ្នាំ ២០១៦ អ្នកស្រី Susan Rice ដែលជាទីប្រឹក្សាសន្តិសុខជាតិរបស់លោក Obama បានធ្វើបទបង្ហាញដល់លោក Michael Flynn ដែលជាអ្នកស្នងតំណែងបន្តពីអ្នកស្រីសម្រាប់រដ្ឋបាលថ្មី។
កាលពីឆ្នាំ ២០២០ បញ្ហាប្រឈមផ្លូវច្បាប់របស់លោក Trump ពាក់ព័ន្ធនឹងលទ្ធផលបោះឆ្នោតបានពន្យារការចាប់ផ្ដើមដំណើរការផ្ទេរអំណាចអស់រយៈពេលជាច្រើនសប្ដាហ៍ ហើយការធ្វើបទបង្ហាញរបស់លោកដល់ប្រធានាធិបតីជាប់ឆ្នោតលោក Joe Biden នៅពេលនោះបានពន្យារពេលរហូតដល់ថ្ងៃទី ៣០ ខែវិច្ឆិកា។
ការផ្ទេរអំណាចសម្រាប់លោក Trump នេះត្រូវបានដឹកនាំជាចម្បងដោយមិត្តភក្តិនិងក្រុមគ្រួសាររបស់លោក ដែលក្នុងនោះរួមមានទាំងលោក Kennedy Jr. និងអ្នកស្រី Tulsi Gabbard ដែលជាអតីតបេក្ខជនប្រធានាធិបតីខាងគណបក្សប្រជាធិបតេយ្យ កូនប្រុសរបស់លោកឈ្មោះ Donald Trump Jr. និង Eric Trump ក៏ដូចជាអនុប្រធានាធិបតីជាប់ឆ្នោតលោក JD Vance ផងដែរ។
សហប្រធានដឹកនាំការផ្ទេរអំណាចនេះគឺលោក Howard Lutnick ដែលជានាយកប្រតិបត្តិក្រុមហ៊ុនហិរញ្ញវត្ថុ Cantor Fitzgerald និងអ្នកស្រី Linda McMahon ដែលជាអតីតប្រធានទីភ្នាក់ងារអាជីវកម្មខ្នាតតូច (SBA) នៅក្នុងអាណត្តិទីមួយរបស់លោក Trump។
លោក Lutnick បាននិយាយថា ប្រតិបត្តិការឆ្នាំនេះនឹង «ធ្វើឱ្យខុសពីឆ្នាំ ២០១៦ តាមដែលអាចធ្វើទៅបាន» ដែលកាលនោះប្រតិបត្តិការផ្ទេរអំណាចនេះត្រូវបានដឹកនាំដោយលោក Chris Christie។ បន្ទាប់ពីបានឈ្នះការបោះឆ្នោតកាលពី ៨ ឆ្នាំមុន លោក Trump បានបណ្ដេញលោក Christie ចេញពីការងារ និងលុបចោលផែនការដែលអតីតអភិបាលរដ្ឋ New Jersey រូបនេះបានលើកឡើង ហើយក៏បានប្រគល់ការងារផ្ទេរអំណាចនេះទៅឱ្យអនុប្រធានាធិបតីជាប់ឆ្នោតលោក Mike Pence ជាអ្នកកាន់កាប់វិញ។
នៅពេលចាប់ផ្ដើមអាណត្តិទីមួយរបស់លោក លោក Trump បានបង្កើតគណៈរដ្ឋមន្ត្រីថ្មីស្រឡាងមួយដែលសមាជិកបក្សសាធារណរដ្ឋនិងមេដឹកនាំអាជីវកម្មមួយចំនួននៅទីបញ្ចប់បានខកចិត្តឬបានបែកបាក់ពីលោក Trump ជាសាធារណៈ។ សម្រាប់អាណត្តិនេះ លោក Trump បានសន្យាថានឹងផ្ដល់តម្លៃទៅលើភាពស្មោះត្រង់ឱ្យបានច្រើនតាមដែលអាចធ្វើទៅបាន។ គំនិតបែបនេះអាចជួយឱ្យលោកជ្រើសរើសបានមនុស្សដែលស្របទៅនឹងគំនិតនិងរបៀបធ្វើការបែបក្រអឺតក្រទមរបស់លោក។
ខុសពីយុទ្ធនាការឃោសនាបោះឆ្នោតរបស់បេក្ខជនប្រធានាធិបតីខាងបក្សប្រជាធិបតេយ្យអ្នកស្រី Kamala Harris ក្រុមការងាររបស់លោក Trump មិនបានចុះហត្ថលេខាលើកិច្ចព្រមព្រៀងស្ដីពីការផ្ទេរអំណាចនៅមុនថ្ងៃបោះឆ្នោតជាមួយទីភ្នាក់ងារកិច្ចការសេវាកម្មទូទៅ (GSA ) នោះទេ។ ដូច្នេះ ពេលវេលាដែលលោក Trump ត្រូវយល់ព្រមជាមួយទីភ្នាក់ងារ GSA លើកិច្ចការភស្តុភារនានាបានហួសហើយ។
កាលពីឆ្នាំ ២០២០ លោក Trump បានអះអាងដោយមិនពិតថា ការបន្លំការបោះឆ្នោតយ៉ាងធំធេងបានធ្វើឱ្យលោកចាញ់ឆ្នោត ដែលការអះអាងនេះបានពន្យារពេលអស់ជាច្រើនសប្ដាហ៍នូវការចាប់ផ្ដើមផ្ទេរអំណាចពីរដ្ឋបាលជិតអស់អាណត្តិរបស់លោកទៅឱ្យរដ្ឋបាលថ្មីរបស់ប្រធានាធិបតីជាប់ឆ្នោតលោក Joe Biden នៅពេលនោះ។
កាលពី ៤ ឆ្នាំមុន មេដឹកនាំទីភ្នាក់ងារ GSA អ្នកស្រី Emily Murphy ដែលលោក Trump បានតែងតាំង បានបញ្ជាក់ថា អ្នកស្រីគ្មានសិទ្ធិដើម្បីកំណត់ថាអ្នកណាជាអ្នកឈ្នះការបោះឆ្នោតប្រធានាធិបតីនោះទេ ដោយសារតែលោក Trump នៅតតាំងក្ដីជាមួយនឹងលទ្ធផលបោះឆ្នោតតាមផ្លូវតុលាការ។ បញ្ហានេះបានធ្វើឱ្យរាំងស្ទះដល់ការប្រើប្រាស់ថវិកានិងកិច្ច សហប្រតិបត្តិការសម្រាប់ការផ្ទេរអំណាច។
កាលនោះ រហូតទាល់តែដល់ពេលដែលកិច្ចប្រឹងប្រែងរបស់លោក Trump ក្នុងការកែប្រែលទ្ធផលបោះឆ្នោតបានបរាជ័យនៅក្នុងរដ្ឋសំខាន់ៗទើបអ្នកស្រី Murphy យល់ព្រមបញ្ជាក់ឈ្មោះបេក្ខជនជាប់ឆ្នោតជាផ្លូវការជាប្រធានាធិបតី និងចាប់ផ្ដើមដំណើរការផ្ទេរអំណាច។ នៅទីបំផុត លោក Trump បានបង្ហោះនៅលើបណ្ដាញសង្គមអនឡាញថា រដ្ឋាភិបាលរបស់លោកនិងសហការ។
ដើម្បីទប់ស្កាត់កុំឱ្យមានការរាំងស្ទះបែបនេះសម្រាប់ការផ្ទេរអំណាចនាពេលអនាគត ច្បាប់ឆ្នាំ ២០២២ ស្ដីពីការធ្វើឱ្យប្រសើរឡើងដល់ការផ្ទេរអំណាចប្រធានាធិបតីបានកំណត់ថា ដំណើរការផ្ទេរអំណាចចាប់ផ្ដើម ៥ ថ្ងៃបន្ទាប់ពីការបោះឆ្នោត ទោះបីជាការកំណត់ថាអ្នកណាជាអ្នកឈ្នះនៅមានការជំទាស់ក៏ដោយ។ ការធ្វើបែបនេះគឺដើម្បីបញ្ចៀសការពន្យារពេលយូរ ហើយការបញ្ជាក់ទទួលស្គាល់ដោយទីភ្នាក់ងារ GSA លែងជាលក្ខខណ្ឌតម្រូវទុកជាមុនទៀតហើយសម្រាប់ការទទួលបានសេវាគាំទ្រដល់ការផ្ទេរអំណាច។ នេះបើយោងតាមគោលការណ៍ណែនាំរបស់ទីភ្នាក់ងារនេះស្ដីពីរូបមន្តថ្មី៕
វេទិកាបញ្ចេញមតិ