តុលាការសាលាដំបូងខេត្តបាត់ដំបង នៅថ្ងៃព្រហស្បតិ៍នេះបានសម្រេចផ្តន្ទាទោសគ្រូពេទ្យម្នាក់ឲ្យជាប់ពន្ធនាគារ២៥ឆ្នាំ «ពីបទបើកកន្លែងពិគ្រោះព្យាបាលជំងឺដោយគ្មានការអនុញ្ញាតពីក្រសួងសុខាភិបាល បទប្រព្រឹត្តក្នុងចេតនាចម្លងមេរោគអេដស៍ទៅអ្នកដទៃ និងបទទារុណកម្ម» ប្រព្រឹត្តនៅឃុំរកា ស្រុកសង្កែ ខេត្តបាត់ដំបង បន្ទាប់ពីបានបើកសវនាការជាច្រើនលើកចាប់ពីថ្ងៃទី២១ រហូតដល់ថ្ងៃទី២៨ខែតុលាកន្លងទៅនេះ។ នេះបើយោងទៅតាមសាលក្រមព្រហ្មទណ្ឌ ដែល VOAទទួលបាននៅរសៀលថ្ងៃព្រហស្បតិ៍នេះ។
គ្រូពេទ្យដែលត្រូវបានផ្តន្ទាទោសនោះគឺលោក យ៉ែម ជ្រិន អាយុ៥៦ឆ្នាំ អតីតគ្រូពេទ្យប្រចាំភូមិរកា ស្រុកសង្កែ ដែលត្រូវបានតុលាការនៃសាលាដំបូងខេត្តធ្វើការចោទប្រកាន់ពីបទប្រព្រឹត្តដោយមានចេតនាចម្លងជំងឺអេដស៍ទៅអ្នកដទៃ ពីបទឃាតកម្មដ៏ឃោរឃៅ និងបទបើកកន្លែងពិគ្រោះជំងឺដោយគ្មានលិខិតអនុញ្ញាតពីក្រសួងសុខាភិបាល កាលពីខែធ្នូ ឆ្នាំ២០១៤។
នៅក្នុងសាលក្រម ដែលប្រកាសដោយអ្នកស្រី យិច ឈាណាវី ប្រធានក្រុមប្រឹក្សាជំនុំជម្រះ បានបញ្ជាក់ថា តុលាការបានតម្រូវឲ្យជនជាប់ចោទឈ្មោះយ៉ែម ជ្រិនបង់ប្រាក់ពិន័យចំនួន៥លានរៀល ចូលថវិការដ្ឋពីបទដែលបានចោទដូចខាងលើ។
សាលក្រមនេះបញ្ជាក់ថា បទល្មើសដែលប្រព្រឹត្តនៅឃុំរកា ស្រុកសង្កែ ខេត្តបាត់ដំបង អំឡុងពីឆ្នាំ១៩៩៦ ដល់ឆ្នាំ២០១៤នេះមានស្ថានទម្ងន់ទោស ហើយវាបង្កឲ្យជនរងគ្រោះបានទទួលមរណភាព។
ជនជាប់ចោទរូបនេះក៏ត្រូវបានហាមឃាត់មិនឲ្យប្រកបវិជ្ជាជីវៈឯកជនក្នុងវិស័យវេជ្ជសាស្ត្រ អមវេជ្ជសាស្ត្រ និងជំនួយវេជ្ជសាស្ត្រជាស្ថាពរ។
មនុស្សជាច្រើនរយនាក់នៅក្នុងភូមិរកា ឃុំរកា ស្រុកសង្កែ ដែលស្ថិតនៅចម្ងាយប្រមាណ៨គីឡូម៉ែត្រពីទីរួមខេត្តបាត់ដំបង បានពិនិត្យឈាមនៅមន្ទីរពេទ្យខេត្ត ហើយមនុស្សច្រើនជាង១០០នាក់ត្រូវរកឃើញថា មានផ្ទុកមេរោគអេដស៍។
មនុស្សភាគច្រើនបានអះអាងថា បានទទួលសេវាពិនិត្យ និងព្យាបាលដោយគ្រូពេទ្យ យ៉ែម ជ្រិន ដែលជាគ្រូពេទ្យមានប្រជាប្រិយភាពម្នាក់ប្រចាំភូមិ។ នៅក្រោយការចម្លងមេរោគអេដស៍ច្រើនករណី ដែលមិនធ្លាប់មានពីមុនមកនៅក្នុងប្រទេសកម្ពុជានោះ មន្ត្រីសុខាភិបាលកម្ពុជាបានផ្តោតការសង្ស័យលើការប្រើប្រាស់ម្ជុលរួម ដែលជាកត្តាចម្បងនៃការចម្លងមេរោគនេះ៕
