ឯកសារបែកធ្លាយបានចោទប្រកាន់ថា ធនាគារធំបំផុតមួយចំនួននៅលើពិភពលោកបានអនុញ្ញាតឲ្យមានសកម្មភាពគួរឲ្យសង្ស័យ ឬការបន្លំកើតមានឡើងក្នុងចំនួនទឹកប្រាក់ប្រមាណ ២ លានលានដុល្លារ ដែលក្នុងនោះរួមមានការលាងលុយកខ្វក់សម្រាប់ក្រុមឧក្រិដ្ឋជន និងក្រុមភេរវករផងដែរ។
ឯកសារដែលមានឈ្មោះថា «FinCEN Files» បានបង្ហាញរបាយការណ៍នៃសកម្មភាពសង្ស័យជាង ២.០០០ ករណី ដែលបានកើតមានឡើង ហើយដែលត្រូវបានផ្ញើតាមធនាគារ មកឲ្យក្រសួងហិរញ្ញវត្ថុសហរដ្ឋអាមេរិក ដោយប្រកាសឲ្យអាជ្ញាធរបានដឹងនិងប្រុងជើងការ ចំពោះសកម្មភាពបទឧក្រិដ្ឋដែលអាចកើតមានឡើង ពីចន្លោះឆ្នាំ ១៩៩៩ ដល់ឆ្នាំ ២០១៧។ ឯកសារនេះត្រូវបានបែកធ្លាយទៅដល់បណ្តាញព័ត៌មានអនឡាញ Buzzfeed របស់អាមេរិក និងត្រូវបានចែកផ្សាយបន្តក្នុងបណ្តាញសាកលនៃអ្នកសារព័ត៌មានស៊ើបអង្កេតផងដែរ។
ឯកសារនោះបន្តចោទប្រកាន់ថា មហាធនាគារ HSBC របស់អង់គ្លេស បានផ្ទេរលុយបន្លំចំនួន ៨០ លានដុល្លារ តាមរយៈសហរដ្ឋអាមេរិក ទៅកាន់ទីក្រុងហុងកុង ដែលជាផ្នែកមួយនៃគម្រោងវិនិយោគបោកប្រាស់ខុសច្បាប់ (Ponzi scheme) ទោះជាមានការព្រមានជាមុន ដោយអាជ្ញាធរអាមេរិកក្តី។
ឯកសារនោះក៏បានបង្ហាញផងដែរថា ធនាគារអាមេរិក JP Morgan Chase បានផ្ទេរលុយចំនួន ១ ពាន់លានដុល្លារ តាមរយៈគណនីធនាគារក្នុងទីក្រុងឡុងដ៏ ប្រទេសអង់គ្លេស ដែលក្រោយមកទៀតត្រូវបានគេរកឃើញថា អាចជាលុយរបស់បុគ្គលឈ្មោះ Semion Mogilevich ដែលជាថៅកែក្រុមម៉ាហ្វីយ៉ារបស់រុស្សី ដែលកំពុងស្ថិតនៅក្នុងបញ្ជីឈ្មោះ ដែលត្រូវបានតាមរកបំផុតរបស់ទីភ្នាក់ងារអាមេរិក FBI នោះ។
ធនាគារអាល្លឺម៉ង់ Deutsche Bank ក៏បានរងការចោទប្រកាន់ថា បានផ្ទេរលុយកខ្វក់ពីអ្នកលាងលុយដែរ ប៉ុន្តែអ្នកនាំពាក្យធនាគារនេះ និយាយកាលពីថ្ងៃច័ន្ទថា ប្រតិបត្តិការហិរញ្ញវត្ថុទាំងនេះបានកើតឡើងកន្លងផុតយូរមកហើយ។
ចំណែកធនាគារ Standard Chartered របស់អង់គ្លេសថា ខ្លួនយកចិត្តទុកដាក់យ៉ាងខ្លាំងបំផុតចំពោះការទទួលខុសត្រូវរបស់ខ្លួន ក្នុងការប្រឆាំងនឹងឧក្រិដ្ឋកម្មហិរញ្ញវត្ថុ៕
