ប្រធានាធិបតីអាមេរិក លោក ដូណាល់ ត្រាំ បានអះអាងកាលពីថ្ងៃចន្ទ ថា លោកកំពុងតែនាំមុខបេក្ខជនឈរឈ្មោះប្រធានាធិបតីខាងគណបក្សប្រជាធិបតេយ្យ ដែលកំពុងតែព្យាយាមយកឈ្នះរូបលោកក្នុងការបោះឆ្នោតជ្រើសរើសប្រធានាធិបតីអាមេរិកឆ្នាំ២០២០ខាងមុខនេះ បើទោះបីជាយុទ្ធនាការឃោសនាបោះឆ្នោតរបស់លោកបានច្រានចោលលទ្ធផលនៃការស្ទង់មតិពីស្ថាប័នចំនួនបី បន្ទាប់ពីមានការបែកធ្លាយព័ត៌មានបង្ហាញថា លោក ត្រាំ បានទទួលការគាំទ្រតិចជាងលោក Joe Biden អតីតអនុប្រធានាធិបតីអាមេរិកខាងគណបក្សប្រជាធិបតេយ្យយ៉ាងខ្លាំង។
លោក ត្រាំ បានបង្ហោះសារលើបណ្តាញសង្គម Twitter ថា៖ «មានតែការស្ទង់មតិក្លែងក្លាយប៉ុណ្ណោះដែលបង្ហាញថាយើងទទួលបានការគាំទ្រទាបជាងសមាជិកខាងគណបក្សប្រជាធិបតេយ្យ។ យើងមានការគាំទ្រយ៉ាងច្រើន ប៉ុន្តែឥឡូវនេះ វាលឿនពេកហើយក្នុងការផ្ដោតទៅលើរឿងនេះ។ នៅមានការងារជាច្រើនទៀតដែលត្រូវធ្វើ។ ត្រូវធ្វើឲ្យអាមេរិកអស្ចារ្យឡើងវិញ»។
គណនីព័ត៌មាននានានៅក្នុងសហរដ្ឋអាមេរិកបានឲ្យដឹងថា លោក ត្រាំ មានការមិនសប្បាយចិត្ត ដែលមានការបែកធ្លាយលទ្ធផលស្ទង់មតិពីក្រុមការងាររៀបចំយុទ្ធនាការឃោសនាបោះឆ្នោតរបស់លោក។ លទ្ធផលស្ទង់មតិនោះបង្ហាញថា លោក ត្រាំ បានចាញ់លោក Biden នៅក្នុងរដ្ឋសំខាន់ៗមួយចំនួន ដែលទំនងជានឹងសំខាន់សម្រាប់លទ្ធផលនៃការបោះឆ្នោតប្រធានាធិបតីនៅថ្ងៃទី៣ ខែវិច្ឆិកា ឆ្នាំ ២០២០ ខាងមុខនេះ៕
