អនុប្រធានគណបក្សភ្លើងទៀន លោក រ៉ុង ឈុន នៅថ្ងៃអង្គារនេះ បានអំពាវនាវឱ្យសមាជិកគណបក្សទៅបោះឆ្នោតនៅថ្ងៃទី២៣ ខែកក្កដា ខាងមុខនេះ ដើម្បីអាចរក្សាសិទ្ធិឈរឈ្មោះឱ្យគេបោះឆ្នោត បើទោះបីអវត្តមានគណបក្សដែលខ្លួនពេញចិត្តក៏ដោយ។
លោក រ៉ុង ឈុន ថ្លែងបែបនេះនៅក្នុងស្រុកព្រៃឈរ ខេត្ត កំពង់ចាម ពេលលោកចុះទៅសំណេះសំណាលជាមួយសមាជិកក្រុមប្រឹក្សាដែលជាប់ឆ្នោតមកពីគណបក្សភ្លើងទៀន។
លោកថ្លែងថា វិសោធនកម្មច្បាប់បោះឆ្នោតដែលអនុម័តដោយរដ្ឋសភា បានតម្រូវឱ្យទៅបោះឆ្នោត ទើបអាចឈរឈ្មោះឱ្យគេបោះឆ្នោតបាន។ ដូច្នេះលោកថា សមាជិកទាំងអស់ដែលជាក្រុមប្រឹក្សាជាប់ឆ្នោត ត្រូវតែមានសិទ្ធិឱ្យគេបោះឆ្នោតឱ្យនៅពេលក្រោយទៀត។
លោកថ្លែងថា៖ «យើងទៅបោះឆ្នោតដើម្បីបានសិទ្ធិមួយទៀត ឈរឈ្មោះឱ្យគេបោះឆ្នោត ២០២៨ ដូចគ្នាបោះឆ្នោតសកលតំណាងរាស្រ្ត។ បើអត់បានបោះនៅពេលនេះ ទៅឈរឈ្មោះជាតំណាងរាស្រ្តក៏ឈរអត់បាន»។
អនុប្រធានគណបក្សភ្លើងទៀនរូបនេះបន្តថា ការបោះឆ្នោតខាងមុខនេះ គឺជាការប្រើប្រាស់សិទ្ធិរបស់ខ្លួនក្នុងការចូលរួមបោះឆ្នោត ដោយផ្អែកទៅលើឆន្ទៈ និងសម្បជញ្ញៈរបស់ខ្លួន ដោយមិនមាននរណាម្នាក់បង្ខិតបង្ខំបានឡើយ។
លោកបន្ថែមថា៖ «បើយើងមានបំណងចង់ឈរឱ្យគេបោះឆ្នោត យើងត្រូវទៅបោះហើយ ហើយបោះអាហ្នឹងទៅលើឆន្ទៈ។ ចូលទៅដល់បន្ទប់សម្ងាត់គឺទៅលើឆន្ទៈ និងសម្បជញ្ញៈរបស់បងប្អូន»។
ការថ្លែងរបស់លោក រ៉ុង ឈុន ធ្វើឡើងបន្ទាប់ពីរដ្ឋសភាដែលគ្រប់គ្រងទាំងមូលដោយគណបក្សប្រជាជនកម្ពុជា បានអនុម័តសេចក្តីព្រាងវិសោធនកម្មច្បាប់បោះឆ្នោតទាំងស្រុងកាលពីសប្តាហ៍មុន ដែលច្បាប់នេះនឹងកំហិតសិទ្ធិឈរឈ្មោះរបស់អ្នកនយោបាយ និងធានាថា មន្រ្តីគណបក្សជំទាស់នឹងទៅបោះឆ្នោតនាខែកក្កដាខាងមុខ បើទោះមិនមានវត្តមានរបស់គណបក្សភ្លើងទៀន។
វិសោធនកម្មច្បាប់បោះឆ្នោតដែលស្នើដោយលោកនាយករដ្ឋមន្រ្តី ហ៊ុន សែន សម្រាប់ការបោះឆ្នោតជ្រើសតាំងតំណាងរាស្រ្ត កំណត់ថា លុះត្រាតែបេក្ខជនបានអនុវត្តសិទ្ធិបោះឆ្នោតដោយបានបោះឆ្នោតសម្រាប់ការបោះឆ្នោតជាសកលចំនួនពីរលើកចុងក្រោយជាប់គ្នា ទើបអាចឈរឈ្មោះឱ្យគេបោះឆ្នោតបាន លើកលែងតែករណីដែលមិនអាចអនុវត្តសិទ្ធិបោះឆ្នោតនេះមានមូលហេតុស្រប។
ការបោះឆ្នោតជ្រើសតាំងសមាជិកព្រឹទ្ធសភាក៏ត្រូវបានកំណត់ដូចគ្នានឹងការបោះឆ្នោតជ្រើសតាំងតំណាងរាស្រ្ត ដែលតម្រូវឱ្យបេក្ខជនអនុវត្តសិទ្ធិបោះឆ្នោតនៃការបោះឆ្នោតជាសកលពីរដងជាប់គ្នា ទើបអាចឈរឈ្មោះបាន។
វិសោធនកម្មច្បាប់នេះត្រូវបញ្ជូនទៅព្រឹទ្ធសភាដែលគ្រប់គ្រងដោយគណបក្សប្រជាជនកម្ពុជា ដើម្បីពិនិត្យបន្តនឹងដាក់ថ្វាយព្រះមហាក្សត្រ ដើម្បីប្រកាសឱ្យប្រើប្រាស់ជាប្រញាប់ឱ្យបានមុនការបោះឆ្នោតថ្នាក់ជាតិថ្ងៃទី ២៣ ខែកក្កដា ឆ្នាំ ២០២៣ ខាងមុខ។
sអតីតមេដឹកនាំគណបក្សសង្រ្គោះជាតិដែលកំពុងនិរទេសខ្លួននៅក្រៅប្រទេស លោក សម រង្ស៊ី បានបង្ហោះសារនៅលើហ្វេសប៊ុករបស់លោកកាលពីថ្ងៃចន្ទថា៖ «គូសសន្លឹកឆ្នោតចោល គឺជាកាយវិការដ៏ល្អបំផុតសម្រាប់អ្នកស្នេហាជាតិ និងអ្នកដែលស្រឡាញ់យុត្តិធម៌។ ពលរដ្ឋម្នាក់ៗត្រូវទៅបោះឆ្នោតគ្រប់គ្នា។ បើយើងមិនទៅបោះឆ្នោតទេ ជនខិលខូចនឹងយកឈ្មោះយើងទៅប្រើ ដើម្បីបម្រើផលប្រយោជន៍ដ៏អាក្រក់របស់ពួកគេ»។
កាលពីការបោះឆ្នោតថ្នាក់ជាតិឆ្នាំ២០១៨ ដែលអវត្តមានគណបក្សប្រឆាំងដ៏ធំ គឺអតីតគណបក្សសង្គ្រោះជាតិ ហើយចំនួនសន្លឹកឆ្នោតមិនបានការមានប្រមាណ៦០ម៉ឺនសន្លឹក។ នេះបើយោងតាមទិន្នន័យរបស់គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប។ អ្នកតាមដានមើលឃើញថា ប្រជាពលរដ្ឋខ្លះត្រូវបានបង្ខំឱ្យទៅបោះឆ្នោត ដោយសារបារម្ភការធ្វើទុក្ខបុកម្នេញពីសំណាក់អាជ្ញាធរមូលដ្ឋានរបស់គណបក្សប្រជាជនកម្ពុជា ពាក់ព័ន្ធនឹងការរើសអើងនយោបាយ និងមិនធ្វើឯកសារសម្រាប់ប្រជាពលរដ្ឋ នៅពេលពួកគេត្រូវការ។
សម្រាប់មន្រ្តីរាជការ កម្លាំងប្រដាប់អាវុធ មានប៉ូលិស ទាហាន ពួកគេត្រូវតែទៅបោះឆ្នោត ដើម្បីមានចង្អុលដៃជ្រលក់ថ្នាំ និងបង្ហាញថា ពួកគេមិនប្រឆាំងនឹងគណបក្សកាន់អំណាចដែលចង់ឱ្យប្រជាពលរដ្ឋទៅបោះឆ្នោតឱ្យបានច្រើន ក្នុងគ្រាអវត្តមានគណបក្សភ្លើងទៀន៕
