នៅក្នុងការបោះឆ្នោតពាក់កណ្តាលអាណត្តិកាលពីថ្ងៃអង្គារ គណបក្សប្រជាធិបតេយ្យបានកាន់កាប់សភាតំណាងរាស្ត្រអាមេរិកាំងជាថ្មីវិញ នៅពេលដែលគណបក្សសាធារណរដ្ឋថែរក្សាការត្រួតត្រាព្រឹទ្ធសភា ដែលបង្កើតឱ្យមានសភាមួយមានការបែកបាក់គ្នា ដែលនឹងដាក់ឱ្យមានរបាំងដល់របៀបវារៈនីតិបញ្ញត្តិរបស់ប្រធានាធិបតី Donlad Trump នៅក្នុងរយៈពេលពីរឆ្នាំខាងមុខ។
លទ្ធផល ដែលគេបានរំពឹងទុកជាមុន ក៏យ៉ាងហោចណាស់ជាការស្តីបន្ទោសជាផ្នែកដល់លោក Trump ដែលបានធ្វើការប្រជុំជាច្រើននៅទូទាំងប្រទេសដើម្បីគាំទ្រពួកបេក្ខជនសាធារណរដ្ឋ ហើយលោកបាននិយាយទទូចច្រើនដងថាការបោះឆ្នោតនេះជាការបោះឆ្នោតប្រជាមតិមួយអំពីតំណែងប្រធានាធិបតីរបស់លោក។
នៅក្នុងសុន្ទរកថាទទួលជ័យជម្នះមួយនៅឯទីស្នាក់ការធំនៃគណបក្សប្រជាធិបតេយ្យក្នុងរដ្ឋធានីវ៉ាស៊ីនតោន លោកស្រី Nancy Pelosi នៃរដ្ឋCalifornia បានមានប្រសាសន៍ថា «ព្រឹត្តិការណ៍នៅថ្ងៃនេះមានសារៈសំខាន់ជាងអំពីពួកប្រជាធិបតេយ្យ និងពួកសាធារណរដ្ឋ វាជាការធ្វើឱ្យមានឡើងវិញនូវការត្រួតពិនិត្យគ្នាទៅវិញទៅមកតាមរយៈរដ្ឋធម្មនុញ្ញដល់រដ្ឋបាលលោក Trump»។
ជាមួយការត្រួតត្រាសភាតំណាងរាស្ត្រអាមេរិកាំងជាលើកទីមួយក្នុងរយៈពេល៨ឆ្នាំ ពួកប្រជាធិបតេយ្យអាចបំពេញកិច្ចការច្រើនជាងគ្រាន់តែត្រួតពិនិត្យអាទិភាពនីតិបញ្ញត្តិរបស់លោក Trump។ ពួកគេក៏អាចពិនិត្យមើលការធ្វើអ្វីហួសហេតុដោយប្រធានាធិបតីផងដែរ ដោយកាន់តំណែងជាមេដឹកនាំនៃគណៈកម្មាធិការសំខាន់ៗរបស់សភាតំណាងរាស្ត្រអាមេរិកាំង ដែលមានអំណាចខ្លាំងខាងការស៊ើបអង្កេត៕
