កាលពីថ្ងៃអង្គារម្សិលមិញ គណបក្សប្រជាធិបតេយ្យបានតែងតាំងលោក Joe Biden ជាបេក្ខជនប្រធានាធិបតីជាផ្លូវការរបស់គណបក្ស សម្រាប់ការបោះឆ្នោតជ្រើសរើសប្រធានាធិបតីសហរដ្ឋអាមេរិកនៅខែវិច្ឆិកាខាងមុខ។
ការតែងតាំងនេះធ្វើឡើងនៅថ្ងៃទីពីរនៃសន្និបាតជាតិគណបក្សប្រជាធិបតេយ្យ ដែលសមាជិកគណបក្សសាធារណរដ្ឋលេចធ្លោមួយចំនួនបានចូលរួមជាមួយគណបក្សប្រជាធិបតេយ្យក្នុងការរិះគន់លោកប្រធានាធិបតី Donald Trump និងកោតសរសើរជំនាញដឹកនាំរបស់លោក Biden។
លោក Biden បានក្លាយជាបេក្ខជនប្រធានាធិបតីដែលគេគិតទុកជាមុនរបស់គណបក្សប្រជាធិបតេយេ្យអស់រយៈពេលជាច្រើនខែមកហើយ ក្រោយពីលោកបានឈ្នះការបោះឆ្នោតបឋមពីរដ្ឋមួយទៅរដ្ឋមួយ រួមទាំងការយកឈ្នះលើសមាជិកព្រឹទ្ធសភាតំណាងរដ្ឋ Vermont លោក Bernie Sanders ដែលជាគូប្រជែងដ៏ប្រកៀកប្រកិតរបស់លោកផងដែរ។
នៅយប់ទីពីរនៃសន្និបាតជាតិរបស់គណបក្សប្រជាធិបតេយ្យ ដែលជាយប់បោះឆ្នោតដើម្បីតែងតាំងបេក្ខជនប្រធានាធិបតីរបស់បក្សជាផ្លូវការ តំណាងរដ្ឋ និងដែនដីនីមួយៗ ប្ដេជ្ញាចិត្តគាំទ្រលោក Biden ដែលនឹងត្រូវប្រកួតប្រជែងជាមួយនឹងលោកប្រធានាធិបតី Trump មកពីគណបក្សសាធារណរដ្ឋ។
លោក Biden បានបញ្ជាក់ដូច្នេះថា ការតែងតាំងនេះ «មានន័យធំធេងណាស់សម្រាប់រូបខ្ញុំ និងក្រុមគ្រួសារខ្ញុំ»។ លោក Biden នឹងថ្លែងសុន្ទរកថាទទួលយកការតែងតាំងនេះនៅយប់ថ្ងៃព្រហស្បតិ៍ស្អែក ដែលជាយប់ចុងក្រោយនៃសន្និបាតនេះ។
ស្របពេលដែលគណបក្សប្រជាធិបតេយ្យជួបជុំគ្នាក្នុងសន្និបាតជាតិគណបក្សតាមអនឡាញនេះ លោក Trump បានធ្វើដំណើរទៅកាន់រដ្ឋសំខាន់ពីរដែលអាចកំណត់លទ្ធផលបោះឆ្នោតគឺរដ្ឋ Iowa និង Arizona និងបានព្យាយាមទាក់ទាញអ្នកបោះឆ្នោតជាស្ត្រី ដោយកាលពីថ្ងៃអង្គារម្សិលមិញ លោកបានលើកលែងទោសបច្ឆាមរណៈដល់អ្នកស្រី Susan B. Anthony មេដឹកនាំទាមទារឲ្យស្ដ្រីមានសិទ្ធិបោះឆ្នោត ដែលបានធ្វើបាតុកម្មតវ៉ាក្នុងអំឡុងទសវត្ស ១៨៧០៕
