៣ទសវត្សរ៍ក្រោយមានកិច្ចព្រមព្រៀងដ៏សំខាន់មួយដែលបានបញ្ចប់នូវអំពើហិង្សាបង្ហូរឈាមនៅក្នុងប្រទេសកម្ពុជាមក ការដឹកនាំរបស់បុរសខ្លាំងនៅក្នុងប្រទេសនេះ បានបង្ក្រាបទៅលើក្រុមប្រឆាំងទាំងអស់ ហើយកំពុងសំឡឹងមើលអ្នកស្នងតំណែងបន្តដែលបានធ្វើឲ្យប៉ះពាល់ដល់ក្តីសង្ឃឹមនៃលទ្ធិប្រជាធិបតេយ្យនៅក្នុងប្រទេសកម្ពុជា។ នេះ បើតាមសេចក្តីរាយការណ៍របស់ទីភ្នាក់ងារព័ត៌មាន AFP។
កិច្ចព្រមព្រៀងសន្តិភាពក្រុងប៉ារីសដែលត្រូវបានចុះហត្ថលេខាកាលពីថ្ងៃទី២៣ ខែតុលា ឆ្នាំ១៩៩១ បានបញ្ចប់នូវការកាប់សម្លាប់គ្នាអស់រយៈពេលជិត២ទសវត្សរ៍ ដែលបានចាប់ផ្តើមដោយរបបវាលពិឃាដខ្មែរក្រហមដែលបានចូលកាន់អំណាច នៅក្នុងឆ្នាំ១៩៧៥។
របបប្រល័យពូជសាសន៍ខ្មែរក្រហម បានកាប់សម្លាប់ពលរដ្ឋកម្ពុជារហូតដល់ប្រមាណ២លាននាក់ តាមរយៈការធ្វើឃាត ការបង្អត់អាហារ និងធ្វើពលកម្មហួសកម្លាំង មុនការចូលឈ្លានពានរបស់វៀតណាមដែលបានផ្តួលរំលំរបបខ្មែរក្រហមកុម្មុយនីស្ត ហើយបានធ្វើឲ្យមានសង្គ្រាមស៊ីវិលមួយកើតឡើង។
កិច្ចព្រមព្រៀងសន្តិភាពក្រុងប៉ារីស បានត្រួសត្រាយផ្លូវឲ្យមានការបោះឆ្នោតតាមបែបលទ្ធិប្រជាធិបតេយ្យលើកដំបូងនៅក្នុងប្រទេសកម្ពុជានៅឆ្នាំ១៩៩៣ ហើយនាំទៅដល់ការបញ្ចប់ប្រកបដោយប្រសិទ្ធិភាពនូវសង្គ្រាមត្រជាក់ក្នុងតំបន់អាស៊ីផងដែរ។
ជំនួយពីប្រទេសលោកខាងលិច ចាប់ផ្តើមហូរចូលប្រទេសកម្ពុជា ហើយកម្ពុជាត្រូវបានគេប្រកាសថា ជាប្រទេសក្មេងមួយ ក្រោយអន្តរកាលនៃជម្លោះ ឆ្ពោះទៅកាន់លទ្ធិប្រជាធិបតេយ្យមួយ។
ក៏ប៉ុន្តែ ការទទួលបាននូវអំណរសាទរនេះ មានរយៈពេលខ្លីតែប៉ុណ្ណោះ ដោយលោកនាយករដ្ឋមន្ត្រី ហ៊ុន សែន ដែលកាន់អំណាចអស់រយៈពេលជិត៤០ឆ្នាំកន្លងមកនេះ បានដឹកនាំការបង្ក្រាបទៅលើក្រុមប្រឆាំងឥតឈប់ឈរ។
អតីតរដ្ឋមន្ត្រីការបរទេសអូស្ត្រាលីលោក Gareth Evans ដែលជាស្ថាបនិកមួយរូបនៃកិច្ចព្រមព្រៀងសន្តិភាពក្រុងប៉ារីស បានលើកឡើងយ៉ាងដូចនេះថា «យើងបានធ្វើការងារនេះយ៉ាងល្អអំពីការធ្វើឲ្យមានសន្តិភាព ក៏ប៉ុន្តែ បានបរាជ័យអំពីលទ្ធិប្រជាធិបតេយ្យ និងសិទ្ធិមនុស្ស»។ លោកបានថ្លែងបន្តទៀតថា វាជាកំហុសមួយដែលបានយល់ព្រមទៅតាមការទាមទាររបស់លោក ហ៊ុន សែន ក្នុងការចែករំលែកអំណាច ក្រោយការបោះឆ្នោតឆ្នាំ១៩៩៣នោះ៕
