ក្រុមអ្នកជំនាញបានចាប់ផ្តើមធ្វើការវាយតម្លៃចំពោះការខូចខាតនៅឯព្រះវិហារ Notre Dame ក្នុងក្រុងប៉ារីស បន្ទាប់ពីក្រុមមន្រ្តីបាននិយាយថា អគ្គីភ័យដែលបានបំផ្លាញព្រះវិហារដ៏សំខាន់មួយកាលពីថ្ងៃចន្ទបានត្រូវពន្លត់។
បន្ទាប់ពីការប្រកាសថា «អគ្គីភ័យទាំងមូលត្រូវបានពន្លត់» លោក Gabriel Plus អ្នកនាំពាក្យក្រុមពន្លត់អគ្គីភ័យក្រុងប៉ារីសបាននិយាយថា អ្នកឯកទេសនិងស្ថាបត្យករអាគារនោះបានចាប់ផ្តើមសិក្សាពីចលនានៃតួអាគារនោះ ហើយពន្លត់កាកសំណល់ដែលនៅឆេះងំ»។
ទោះបីអគ្គីភ័យបានបណ្តាលឲ្យមានការខូចខាតយ៉ាងខ្លាំងដល់គ្រឹះរបស់វិហារបែប Gothic ដ៏ល្បីនៅកណ្តាលក្រុងប៉ារីសក៏ដោយ លោក Jean–Claude Gallet ប្រធានក្រុមពន្លត់អគ្គីភ័យរបស់ក្រុង បានប្រាប់ក្រុមអ្នកយកព័ត៌មានកាលពីយប់ថ្ងៃចន្ទថា ក្រុមអ្នកពន្លត់អគ្គីភ័យបានជួយសង្គ្រោះកំផែងដែលជានិមិត្តរូបចំនួនពីរ និងតួធ្វើពីថ្មរបស់អាគារនោះ។ អណ្តាតភ្លើងដែលបានឆាបឆេះរហូតដល់កម្ពស់ ១០ ម៉ែត្រទៅលើអាកាសបានបំផ្លាញផ្នែកភាគច្រើននៃដំបូលរបស់ព្រះវិហារនោះ ហើយបានបណ្តាលឲ្យកំពូលស្រួចនៅផ្នែកកណ្តាលរបស់ព្រះវិហារនោះដួលរលំ។
លោក Andre Finot អ្នកនាំពាក្យព្រះវិហារនោះ បានប្រាប់បណ្តាញព័ត៌មានបារាំងកាលពីព្រឹកថ្ងៃចន្ទថា ផ្នែកខាងក្នុងធ្វើពីឈើទាំងមូលរបស់ព្រះវិហារនោះបានត្រូវអគ្គីភ័យបំផ្លាញ។
ក្រុមមន្រ្តីក្រុងប៉ារីសបាននិយាយថា ក្រុមអ្នកពន្លត់អគ្គីភ័យបានធ្វើការជួយសង្គ្រោះស្នាដៃសិល្បៈ និងរបស់របរពិសិដ្ឋជាច្រើនពីព្រះវិហារសតវត្សរ៍ទី ១២ នេះទៅតាមដែលពួកគេអាចធ្វើបាន៕
