ប្រទេសអ៊ុយក្រែននិងប្រទេសរុស្ស៊ីបានចោទប្រកាន់គ្នាទៅវិញទៅមកថាបានបំផ្ទុះទំនប់វារីអគ្គិសនីដ៏ធំមួយនៅជិតទីក្រុង Kherson នៅភាគខាងត្បូងប្រទេសអ៊ុយក្រែននៅថ្ងៃអង្គារនេះ។
ការបំផ្លាញទំនប់វារីអគ្គិសនី Kakhovka នេះនៅក្នុងតំបន់ដែលកាន់កាប់ដោយកងទ័ពរុស្ស៊ីក្នុងប្រទេសអ៊ុយក្រែនបានបង្កឱ្យមានការព្រមានអំពីការជម្លៀសប្រជាជនដែលរស់នៅតាមដងទន្លេ Dnipro។
ប្រធានាធិបតីអ៊ុយក្រែនលោក Volodymyr Zelenskyy បានកោះហៅឱ្យមានការប្រជុំបន្ទាន់មួយរបស់ក្រុមប្រឹក្សាសន្តិសុខនិងការពារជាតិរបស់លោកដើម្បីពិភាក្សាអំពីស្ថានការណ៍នេះ។
លោក Zelenskyy បានសរសេរនៅលើ Twitter ដូច្នេះថា៖ «ការបំផ្លាញទំនប់រោងចក្រថាមពលវារីអគ្គិសនី Kakhovka នេះបានបង្ហាញយ៉ាងច្បាស់ដល់ពិភពលោកទាំងមូលថា កងទ័ពរុស្ស៊ីត្រូវតែបណ្ដេញចេញពីគ្រប់ជ្រុងទាំងអស់នៃដែនដីអ៊ុយក្រែន ដោយមិនត្រូវទុកឱ្យពួកគេបន្តនៅនោះទេទោះបីជាដីមួយម៉ែត្រក៏ដោយ ដោយហេតុថាពួកគេប្រើវត្តមានរបស់ខ្លួននៅលើដែនដីទាំងនោះដើម្បីប្រព្រឹត្តអំពើភេរវកម្ម។ មានតែពេលដែលអ៊ុយក្រែនទទួលបានជ័យជម្នះប៉ុណ្ណោះដែលសន្តិសុខនឹងត្រឡប់មកវិញ ហើយជ័យជម្នះនេះនឹងមកដល់។ ពួកភេរវករនឹងមិនអាចបញ្ឈប់អ៊ុយក្រែនដោយប្រើផ្លូវទឹក មីស៊ីល ឬក៏អ្វីផ្សេងទៀតនោះឡើយ»។
លោក Andriy Yermak ប្រធានខុទ្ទកាល័យប្រធានាធិបតីអ៊ុយក្រែន បានសរសេរនៅលើ Telegram ថា ការបំផ្លាញរបស់រុស្ស៊ីលើទំនប់វារីអគ្គិសនីនេះគឺជា «ទង្វើព្រៃផ្សៃ» និងជាឧក្រិដ្ឋកម្មសង្គ្រាម។
មន្ត្រីរុស្ស៊ីបាននិយាយថា ការវាយប្រហាររបស់អ៊ុយក្រែនបានបំផ្លាញដល់ទំនប់វារីអគ្គិសនីនេះ។
ទីភ្នាក់ងារមនុស្សធម៌របស់អង្គការសហប្រជាជាតិបានសរសេរនៅលើ Twitter នៅថ្ងៃអង្គារនេះថា ការបំផ្លាញទំនប់វារីអគ្គិសនីនេះ «ធ្វើឱ្យជនស៊ីវិលរាប់ពាន់នាក់ស្ថិតក្នុងគ្រោះថ្នាក់ ដោយធ្វើឱ្យមនុស្សជាច្រើនគ្មានផ្ទះសម្បែងស្នាក់នៅនិងត្រូវការជំនួយមនុស្សធម៌ជាបន្ទាន់»។
អគ្គលេខាធិការអង្គការអូតង់ (NATO) លោក Jens Stoltenberg បានហៅការបំផ្លិចបំផ្លាញទំនប់វារីអគ្គិសនីនេះថាជា «ទង្វើសាហាវហួសហេតុ ដែលបង្ហាញជាថ្មីម្ដងទៀតអំពីភាពឃោរឃៅនៃសង្គ្រាមរបស់រុស្ស៊ីនៅក្នុងប្រទេសអ៊ុយក្រែន»។
ប្រធានក្រុមប្រឹក្សាអឺរ៉ុបនៃសហភាពអឺរ៉ុបលោក Charles Michel បាននិយាយថា លោក «ភ្ញាក់ផ្អើលយ៉ាងខ្លាំងចំពោះការវាយប្រហារដែលមិនធ្លាប់មានពីមុននេះ» និងថាក្រុមប្រឹក្សាអឺរ៉ុបនឹងពិភាក្សាអំពីរឿងនេះនៅឯកិច្ចប្រជុំរបស់ខ្លួននៅក្នុងខែនេះ។
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP,Reuters និង AFP។
