ប្រទេសគុយបាបានប្រកាសកាលពីថ្ងៃច័ន្ទថាខ្លួនបានចាប់ផ្តើមចាក់វ៉ាក់សាំងដល់កុមារចាប់ពីអាយុ២ឆ្នាំដោយប្រើវ៉ាក់សំាងដែលខ្លួនបានបង្កើតឡើងហើយដែលមិនត្រូវបានទទួលស្គាល់ដោយអង្គការសុខភាពពិភពលោក (WHO) នៅឡើយ។
ប្រព័ន្ធផ្សព្វផ្សាយរដ្ឋបាននិយាយថាគោលដៅនៃយុទ្ធនាការនេះគឺចាក់វ៉ាក់សាំងយ៉ាងហោចណាស់ ឱ្យបាន៩០%នៃប្រជាជនសរុប។ ប្រជាជនប្រហែលពាក់កណ្តាលបានចាក់វ៉ាក់សំាងដូសទីមួយហើយប្រហែលមួយភាគបីបានចាក់ពីរដូស។ នេះបើយោងតាមទិន្នន័យរបស់រដ្ឋាភិបាលគុយបា។
ប្រទេសគុយបាបានកត់ត្រាករណីឆ្លងជំងឺកូវីដ១៩ថ្មីជាមធ្យមប្រហែល៧ពាន់ករណីក្នុងមួយថ្ងៃក្នុងរយៈពេល៧ថ្ងៃចុងក្រោយនេះ។ នេះបើយោងតាមទិន្នន័យពីសាកលវិទ្យាល័យ Johns Hopkins របស់សហរដ្ឋអាមេរិក។ ដោយមានប្រជាជនជាង១១លាននាក់ប្រទេសគុយបាមានអត្រាឆ្លងខ្ពស់បំផុតនៅលើពិភពលោក។
ប្រទេសនេះចង់ឲ្យកុមារៗត្រឡប់ចូលថ្នាក់រៀនវិញ។តាមផ្ទះភាគច្រើននៅក្នុងប្រទេសនេះមិនមានអ៊ីនធឺណិតទេហើយដោយសាលារៀនបានបិទតាំងពីខែមីនាឆ្នាំ២០២០មកកុមារភាគច្រើនរៀនតាមរយៈមើលកម្មវិធីទូរទស្សន៍។
ប្រទេសនេះក៏មានបំណងចង់ចាប់ផ្តើមឧស្សាហកម្មទេសចរណ៍របស់ខ្លួនផងដែរ។យោងតាមសារព័ត៌មាន The Associated Press នៅឆ្នាំ២០១៩ ប្រទេសគុយបាមានចំណូលក្នុងវិស័យទេសចរណ៍ប្រមាណ៤,១ពាន់លានដុល្លារ ឬប្រហែល១០%នៃកំណើនផលិតផលក្នុងស្រុកសរុប។
ប្រទេសគុយបាបានបង្កើតវ៉ាក់សាំងចំនួនពីរ។ កុមារអាយុពី ២ ទៅ ១៨ឆ្នាំនឹងទទួលបានវ៉ាក់សំាងSoberana-2 ចំណែកមនុស្សពេញវ័យទទួលបានវ៉ាក់សាំង Abdala។ វ៉ាក់សាំងទាំងពីរត្រូវបានអនុម័តដោយនិយតករក្នុងស្រុកប៉ុន្តែមិនបានឆ្លងកាត់ការត្រួតពិនិត្យពីស្ថាប័នអន្តរជាតិឡើយ។
ប្រទេសផ្សេងៗទៀតរួមមានប្រទេសចិន វ៉េណេស៊ុយអេឡា និងអេមីរ៉ាតអារ៉ាប់រួមបានប្រកាសថាពួកគេនឹងចាក់វ៉ាក់សំាងដល់កុមារប៉ុន្តែគុយបាជាប្រទេសដែលបានធ្វើរឿងនេះដំបូងគេបំផុត។
នាយកអង្គការសុខភាពពិភពលោកបានព្រមានកាលពីថ្ងៃច័ន្ទថាការប្រយុទ្ធប្រឆាំងនឹង ជំងឺកូវីដ១៩ នៅមិនទាន់ចប់នៅឡើយទេ៕
(ព័ត៌មានខ្លះដកស្រង់ពីThe Associated Press និងReuters)
