សហរដ្ឋអាមេរិក កំពុងតែពិនិត្យមើលមធ្យោបាយដើម្បីផ្ដល់ជំនួយដល់ប្រជាពលរដ្ឋគុយបា បន្ទាប់ពីមានការធ្វើបាតុកម្មប្រឆាំងនឹងរដ្ឋាភិបាលនៅក្នុងខែនេះដែលជាបាតុកម្មធំបំផុតនៅក្នុងប្រទេសនេះអស់រយៈពេលរាប់ទសវត្សរ៍កន្លងមកនេះ។
ក្រុមមន្ត្រីជាន់ខ្ពស់នៃរដ្ឋបាលលោកប្រធានាធិបតី Joe Biden ដែលបាននិយាយជា មួយនឹងបណ្ដាទីភ្នាក់ងារព័ត៌មានដោយសុំមិនបញ្ចេញឈ្មោះ បានថ្លែងថា វិធានការដែលត្រូវបានយកមកពិចារណា រួមមានដូចជាការកែប្រែមធ្យោបាយក្នុងការផ្ញើប្រាក់ ដែលនឹងអាចឲ្យប្រជាពលរដ្ឋនៅក្នុងសហរដ្ឋអាមេរិក អាចផ្ញើប្រាក់កាសដល់ក្រុមគ្រួសាររបស់ពួកគេនៅក្នុងប្រទេសគុយបាបាន ដោយមិនចាំបាច់ត្រូវបង់ប្រាក់ឲ្យរដ្ឋាភិបាលគុយបាឡើយ។
ជម្រើសផ្សេងទៀតរួមមានការធ្វើឲ្យប្រជាពលរដ្ឋកាន់តែងាយស្រួលក្នុងការប្រើប្រាស់អ៊ីនធឺណិត ធ្វើការជាមួយនឹងអង្គការអន្តរជាតិដើម្បីផ្ដល់ជំនួយមនុស្សធម៌បន្ថែមទៀត និងបង្កើនចំនួនបុគ្គលិកស្ថានទូតសហរដ្ឋអាមេរិកប្រចាំនៅទីក្រុងឡាហាវ៉ាន។
រដ្ឋបាលលោកប្រធានាធិបតី Biden នៅមិនទាន់ប្រកាសជាសាធារណៈអំពីវិធានការអ្វីនៅឡើយទេ ប៉ុន្តែរដ្ឋបាលនេះ កំពុងពិនិត្យឡើងវិញលើគោលនយោបាយទំនាក់ទំនងរវាងសហរដ្ឋអាមេរិក និងគុយបា។ សេតវិមាន បានឲ្យដឹងកាលពីថ្ងៃចន្ទថា ក្រុមមន្ត្រីមួយចំនួនរបស់ខ្លួនបានជួបជាមួយនឹងក្រុមមេដឹកនាំអាមេរិកដើមកំណើតគុយបាមួយក្រុមដើម្បីស្ដាប់ពីអនុសាសន៍សម្រាប់គោលនយោបាយនិងក្ដីបារម្ភរបស់ពួកគេ។
លោក Ned Price អ្នកនាំពាក្យក្រសួងការបរទេសសហរដ្ឋអាមេរិក បានថ្លែងប្រាប់អ្នកកាសែតកាលពីថ្ងៃចន្ទថា រដ្ឋបាលលោក Biden មានការព្រួយបារម្ភអំពីសិទ្ធិមនុស្ស ប្រជាធិបតេយ្យ និងសិទ្ធិពលរដ្ឋនៅប្រទេសគុយបា៕
ព័ត៌មានមួយចំនួននៅក្នុងសេចក្ដីរាយការណ៍នេះ ត្រូវបានដកស្រង់ពីទីភ្នាក់ងារព័ត៌មាន AP និង Reuters
