រយៈពេល៧ថ្ងៃចុងក្រោយពោលគឺពីថ្ងៃសៅរ៍ទី២២មកទល់នឹងថ្ងៃសុក្រទី២៨ខែឧសភានេះក្រសួងសុខាភិបាលបានរកឃើញការឆ្លងជំងឺកូវីដថ្មីសរុប៤.០៨០ករណីមានអ្នកស្លាប់៣១នាក់និងអ្នកជាសះស្បើយ៤.៣៧៦នាក់។
បើគិតជាមធ្យមនា៧ថ្ងៃកន្លងមកនេះក្នុងមួយថ្ងៃក្រសួងរកឃើញអ្នកឆ្លងថ្មីរង្វង់៥៨២នាក់និងអ្នកជាសះស្បើយ៦២៥នាក់។
ល្បឿននៃនិន្នាការឆ្លងថ្មីនេះបង្ហាញថាករណីឆ្លងមានការហក់ឡើងហើយសន្ទុះនៃការជាសះស្បើយបានបន្ថយល្បឿនបើធៀបនឹងសប្ដាហ៍មុនដែលមានអ្នកឆ្លងថ្មីជាមធ្យមក្នុងមួយថ្ងៃត្រឹម៣៧៩នាក់និងមានអ្នកជាសះស្បើយជាមធ្យម៩៥១នាក់។
អ្នកស្រីវេជ្ជបណ្ឌិត Li Ailan តំណាងអង្គការសុខភាពពិភពលោកនៅកម្ពុជាបានសម្ដែងក្ដីបារម្ភថាការហក់ឡើងមកវិញហាក់មានសភាពធ្ងន់ធ្ងរដោយសារតែឆាប់បន្ធូរវិធានការបង្ការទប់ស្កាត់ពេក។
អ្នកស្រីវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាលបានព្រមានថា ការបិទខ្ទប់អាចនឹងមានឡើងវិញបើសិនជាមានសភាពធ្ងន់ធ្ងរ។
រដ្ឋមន្ត្រីសុខាភិបាល ម៉ម ប៊ុនហេង ត្រូវបានកាសែតក្នុងស្រុកដកស្រង់សម្ដីថាការសះស្បើយគឺច្រើនដោយសារប្រសិទ្ធភាពថ្នាំចិនសែប្រភេទ Lianhua Qingwen Jiaonang ដែលទើបត្រូវបានអនុញ្ញាតឱ្យប្រើប្រាស់និងត្រូវបានចិនផ្ដល់ជាជំនួយជាផ្នែកនៃរបបថ្នាំសម្រាប់អ្នកជំងឺកូវីដប្រើប្រាស់ក្នុងដំណាក់កាលព្យាបាល៕
