ឯកអគ្គរាជទូតរបស់ចក្រភពអង់គ្លេសប្រចាំនៅប្រទេសកូរ៉េខាងជើង និយាយថា ស្ថានទូតអង់គ្លេស បានបិទជាបណ្តោះអាសន្ននៅក្នុងប្រទេសកូរ៉េខាងជើងបណ្តាលមកពីការរឹតត្បិតដ៏តឹងតែងនៃមេរោគកូរ៉ូណា។
លោក Colin Crooks បានបញ្ជូនសារតាម Twitter ថា កាលពីថ្ងៃព្រហស្បតិ៍ម្សិលមិញ ថា «ស្ថានទូចក្រភពអង់គ្លេស បានបិទជាបណ្តោះអាសន្ននៅថ្ងៃទី២៧ ខែឧសភា ឆ្នាំ២០២០នេះ ហើយបុគ្គលិកការទូតទាំងអស់បានចាកចេញពីប្រទេសកូរ៉េខាងជើង»។
NK News ដែលជាទីភ្នាក់ងារព័ត៌មាន មានទីតាំងក្នុងប្រទេសកូរ៉ូខាងត្បូងដែលឃ្លាំមើលកូរ៉េខាងជើង បានរាយការណ៍ថា បុគ្គលិកស្ថានទូតចក្រភពអង់គ្លេស បានឆ្លងកាត់ព្រំដែនចូលក្នុងប្រទេសចិនតាមដីគោក។
ការិយាល័យបរទេសរបស់អង់គ្លេស បានចេញសេចក្តីថ្លែងការណ៍មួយដោយនិយាយថា ការសម្រេចជម្លៀសបុគ្គលិកការទូតចេញពីរដ្ឋធានីព្យុងយ៉ាង បានត្រូវធ្វើឡើង ពីព្រោះតែការរឹតត្បិតលើការចូលក្នុងប្រទេសនោះបានធ្វើឲ្យចក្រភពអង់គ្លេសមិនអាចផ្លាស់ប្តូរបុគ្គលិករបស់ខ្លួន និងបន្តកិច្ចប្រតិបត្តិការរបស់ស្ថានទូតទៀត។
កូរ៉េខាងជើង បានបិទព្រំដែនរបស់ខ្លួនហើយបានដាក់វិធានការឲ្យនៅដាច់ពីគ្នាលើជនបរទេសទាំងអស់នៅពេលចាប់ផ្តើមការរាតត្បាត បានបណ្តាលឲ្យប្រទេសជាច្រើនដកឯកអគ្គរដ្ឋទូតនិងបិទស្ថានទូតរបស់ខ្លួន៕
