រដ្ឋមន្រ្តីក្រសួងពាណិជ្ជកម្មឲ្យដឹងថាគម្រោងចុះកិច្ចព្រមព្រៀងពាណិជ្ជកម្មសេរី កម្ពុជា-ចិន ត្រូវបានពន្យារពេល ដោយមិនកំណត់ថ្ងៃ ក្រោមហេតុផលជំងឺកូវីដ១៩។
ពីដើមឡើយ មន្រ្តីជាន់ខ្ពស់កម្ពុជាមួយចំនួនបានប្រកាសថា ការចុះកិច្ចព្រមព្រៀងនេះនឹងធ្វើឡើងឲ្យបានឆាប់ ពោលគឺកំណត់នៅថ្ងៃទី ១២ ខែសីហា នៅថ្ងៃដែលសហភាពអឺរ៉ុបដកប្រព័ន្ធអនុគ្រោះពន្ធពីកម្ពុជា។
រដ្ឋមន្រ្តីក្រសួងពាណិជ្ជកម្ម លោក ប៉ាន សូរស័ក្តិ ថ្លែងប្រាប់ VOA កាលពីថ្ងៃព្រហស្បតិ៍ថា ការពន្យារពេលចុះហត្ថលេខានៅពេលនេះ ដោយសារវិបត្តិជំងឺកូវីដ១៩ ដែលមិនអាចឲ្យភាគីណាមួយអាចធ្វើដំណើរជួបគ្នាដោយផ្ទាល់។
លោកមានប្រសាសន៍ថា៖ «មិនមែនបញ្ហាអីទេ ពីព្រោះបញ្ហាកូវីដ១៩ ដែលជាបញ្ហាមួយ។ យើងជួបគ្នាយ៉ាងម៉េច។ ត្រូវទៅជួបគ្នាផ្ទាល់ ឬទៅជួបគ្នាតាមរលកធាតុអាកាស។ បានន័យថាធ្វើវីដេអូConference តើស៊ីញ៉េបែបម៉េច»។
លោករដ្ឋមន្រ្តីក្រសួងពាណិជ្ជកម្មមានប្រសាសន៍ថា តាមរយៈកិច្ចព្រមព្រៀងនេះ នឹងជួយជំរុញឧស្សាហកម្មកម្ពុជាឲ្យបានខ្ពស់ថែមទៀត ដូចជាការផលិតគ្រឿងអេឡិចត្រូនិកទូរស័ព្ទជាដើម។ ហើយជាពិសេស លោករដ្ឋមន្រ្តីថា កម្ពុជានឹងអាចនាំផលិតផលកសិកម្មទៅប្រទេសចិនបាន ដូចជាផ្លែចេកជាដើម។
ប្រទេសកម្ពុជានិងចិនធ្លាប់បានអះអាងថា កិច្ចព្រមព្រៀងពាណិជ្ជកម្មសេរីនេះនឹងផ្តល់ប្រយោជន៍ដល់ប្រជាជននៃប្រទេសទាំងពីរ។
កិច្ចព្រមព្រៀងនេះធ្វើឡើង ស្របពេលសហភាពអឺរ៉ុបទើបនឹងដាក់ទណ្ឌកម្មផ្នែកពាណិជ្ជកម្ម «គ្រប់មុខទំនិញលើកលែងសព្វាវុធ ឬ Everything But Arms (EBA)» ដោយចាប់ផ្ដើមយកពន្ធចំនួន ២០ ភាគរយ លើទំនិញកម្ពុជាដែលនាំចេញពីកម្ពុជា ជាការឆ្លើយតបនឹងការ «រំលោភបំពានជាប្រព័ន្ធនិងយ៉ាងធ្ងន់ធ្ងរ» លើសិទ្ធិពលរដ្ឋនិងសិទ្ធិនយោបាយក្នុងប្រទេសនេះ ក្រោយការចាប់ខ្លួនលោក កឹម សុខា និងការរំលាយគណបក្សសង្គ្រោះជាតិ។
ទំហំពាណិជ្ជកម្មទ្វេភាគីកម្ពុជាចិនមានទឹកប្រាក់ប្រមាណ ៧,៤ពាន់ លានដុល្លារអាមេរិក កាលពីឆ្នាំ ២០១៨។ នេះបើយោងតាមក្រសួងពាណិជ្ជកម្មកម្ពុជា។
នៅក្នុងនោះកម្ពុជាមានឱនភាព ដោយសារតែការនាំចូលពីប្រទេសចិនមានទំហំប្រមាណ ៦ ពាន់លានដុល្លារ ទៅហើយដែលខុសគ្នាប្រមាណ ៨០ ភាគរយ។ ប្រទេសទាំងពីរគ្រោងបង្កើនទំហំពាណិជ្ជកម្មទ្វេភាគីដល់ ១០ ពាន់លានដុល្លារ ត្រឹមឆ្នាំ ២០២៣៕
