ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ជំងឺ​​កូវីដ១៩​ពន្យារ​ពេល​ការ​បោះឆ្នោត​បឋម​ ហើយ​នាំ​ឱ្យ​មាន​ការ​បារម្ភ​អំពី​ការ​បោះឆ្នោត​ប្រធានាធិបតី​ក្នុង​ខែ​វិច្ឆិកា


ស្ត្រីវ័យចំណាស់ម្នាក់ដែលស្នាក់នៅក្នុងមណ្ឌលថែទាំមនុស្សចាស់ជរា Lambeth House ក្រវីទង់ជាតិអាមេរិក ខណៈអ្នកចម្រៀងអូប៉េរ៉ាម្នាក់បានច្រៀងកំដរពលរដ្ឋរស់នៅក្នុងទីក្រុង New Orleans ដែលត្រូវនៅក្នុងផ្ទះដោយសារវីរុសកូរ៉ូណា កាលពីថ្ងៃទី២០ ខែមីនា ឆ្នាំ២០២០។

ដោយសារតំបន់​ជា​ច្រើន​នៅ​ក្នុង​សហរដ្ឋ​អាមេរិក​បាន​បិទ​ ការ​រាតត្បាត​នៃ​មេរោគ​វីរុសកូរ៉ូណា​បាន​កែប្រែ​ទិដ្ឋភាព​សឹង​តែ​ទាំង​អស់​នៃ​ជីវភាព​ប្រចាំ​ថ្ងៃ​របស់​ប្រជារាស្ត្រ​ក្នុង​ស.រ.អ.។​ មេរោគ​នេះ​ក៏​មាន​ផលប៉ះពាល់​ជា​បន្ទាន់​និង​អាច​ជា​អចិន្ត្រៃយ៍​ផង​ដែរ​ទៅ​លើ​ថា​តើ​ប្រទេស​ជាតិ​ជ្រើសរើស​មេដឹកនាំ​ខ្លួន​ដោយបែបណា។​

អ្នកស្រី ​Lauren Jewett ជា​គ្រូបង្រៀន​ខាង​ការ​សិក្សា​អប់រំ​ក្មេង​ដែល​ត្រូវ​ការ​ជំនួយ​ពិសេស​ នៅ​ក្នុង​រដ្ឋ Louisiana ដែល​ជា​រដ្ឋ​ទី​មួយ​ដែល​ប្រកាស​អំពី​ការ​លើក​ថ្ងៃ​ការ​បោះឆ្នោត​បឋមដោយ​សារ​ការ​រាលដាល​នៃ​មេរោគ​វីរុសកូរ៉ូណា។ ​អ្នកស្រី​បារម្ភ​ថា​ បញ្ហា​នានា​នឹង​មាន​រហូត ដល់ ការបោះឆ្នោត​ទូទៅ​ក្នុងខែវិច្ឆិកាដែលនៅ​ពេលនោះលោកប្រធានាធិបតី​ Donald​ Trump នឹង​ប្រឈម​នឹងបេក្ខជន​ប្រធានាធិបតី​ខាង​គណបក្ស​ប្រជាធិបតេយ្យ។

អ្នកស្រី​ Jewett សួរថា៖ «តើយើង​បោះឆ្នោត​បែបណា?តើ​យើង​ចុះ​ឈ្មោះ​អ្នក​ឯ​ទៀត​ឱ្យ​បោះឆ្នោត​បែប​ណា?តើ​យើង​ស្ទង់​មតិ​អ្នកជិត​ខាង​បែបណា​សម្រាប់​បេក្ខជន​ម្នាក់?​ការណ៍​នេះ​អាច​មាន​ផលប៉ះពាល់​ដល់លទ្ធផល​នៃ​ការបោះឆ្នោតប្រធានាធិបតី​ក្នុង​ខែ​វិច្ឆិកា​ហើយ​ការ​បោះឆ្នោត​នោះ​មាន​ផលប៉ះពាល់​លើ​ប្រទេស​ក្នុង​រយៈ​ពេល​យូរ‍»។

រដ្ឋ​ Louisiana បាន​ក្លាយ​ជា​កន្លែង​មាន​បញ្ហា​ធ្ងន់ធ្ងរ​ខាង​ការ​រាលដាល​មេរោគ COVID-19 ដោយ​មាន​អត្រា​កំណើនមនុស្សផ្ទុកមេរោគវីរុសនេះ​លឿនបំផុត​មួយ​ក្នុងពិភពលោក។​ នៅ​ក្នុង​ពេល​មួយ​សប្តាហ៍ រដ្ឋ​នេះ​បាន​រាយ​ការណ៍​ថា​ ករណី​មនុស្ស​ផ្ទុក​មេរោគ​វីរុសនេះ​កើន​ឡើង​ពី​មិន​ដល់​ ១០០នាក់​ ទៅ​ដល់​ ១.៤០០នាក់​ កាលពី​ថ្ងៃអង្គារ​ ទី​២៤ ខែមីនា។

នៅ​មុន​ករណី​អ្នក​ផ្ទុក​មេរោគ​វីរុស​នេះ​កើន​ឡើង​ខ្លាំង​នៅ​ក្នុង​រដ្ឋ Louisiana កាល​ពី​ថ្ងៃ​ទី១៣ ខែមីនា​ លោក John Bel Edwards អភិបាល​រដ្ឋ​ខាងគណបក្ស​ប្រជាធិបតេយ្យ​បាន​បញ្ជា​ឱ្យ​លើក​ការបោះឆ្នោត​បឋម​មាន​កំណត់ធ្វើ​នៅ​ថ្ងៃទី៤​ ខែមេសា​ទៅ​ធ្វើ​នៅ​ថ្ងៃ​ទី២០​ ខែ​មិថុនា​វិញ។

រដ្ឋ​និង​ដែន​ដី១០ទៀត​ បាន​ធ្វើ​ដូច្នេះ​ដែរ​ដោយ​បាន​លើក​ការបោះឆ្នោត​បឋម​របស់ពួក​គេ​ទៅ​ធ្វើ​នៅ​ថ្ងៃ​ក្រោយ​វិញ។ ​អ្នក​បោះឆ្នោត​ច្រើន​នាក់​នៅ​ក្នុង​រដ្ឋ Louisiana និយាយ​ថា​ ពួកគេ​យល់​អំពី សេចក្តី​ត្រូវ​ការ​ការពារ​សុខភាព​សាធារណៈ។ ចំណែក​ឯ​ជន​ខ្លះទៀត​ក៏កត់​សម្គាល់​ដែរ​ថា​សំឡេង​របស់ពួក​គេ​បាន​ត្រូវ​ខ្ទប់។

រូបឯកសារ៖ ទិដ្ឋភាពស្ងត់ជ្រងំនៃលើដងវិថី Bourbon Street ដោយសារការឆ្លងរាលដាលនៃវីរុសកូរ៉ូណា នៅទីក្រុង New Orleans រដ្ឋ Louisiana កាលពីថ្ងៃទី២៥ ខែមីនា ឆ្នាំ២០២០។
រូបឯកសារ៖ ទិដ្ឋភាពស្ងត់ជ្រងំនៃលើដងវិថី Bourbon Street ដោយសារការឆ្លងរាលដាលនៃវីរុសកូរ៉ូណា នៅទីក្រុង New Orleans រដ្ឋ Louisiana កាលពីថ្ងៃទី២៥ ខែមីនា ឆ្នាំ២០២០។

សេចក្តី​សម្រេច​ពន្យារ​ពេល​ការ​បោះឆ្នោត​បឋម

អ្នក​បោះឆ្នោត​ឈ្មោះ Ernesto Noguera និយាយ​ថា៖ «ការ​ពន្យារ​ពេល​ការ​បោះឆ្នោត​បឋម​លើក​ទៅ​ធ្វើ​នៅ​ថ្ងៃក្រោយ​វិញ​ជា​ការ​ធ្វើ​ត្រឹមត្រូវ​នៅ​ក្នុង​កាលៈទេសៈ​នេះ។ ជីវិត​របស់​ប្រជារាស្ត្រ​និង​សុខភាព​របស់​ប្រជារាស្ត្រជា​អាទិភាព​កំពូល‍»។

អ្នកស្រី​ Marielle Pichon ជា​អ្នកបោះឆ្នោត​នៅ​ក្នុង​ក្រុង​ New Orleans។ ​អ្នកស្រី​និយាយ​ថា៖«ការ​តប់​ប្រមល់​តែ​មួយ​របស់​ខ្ញុំ​គឺ​រដ្ឋឯទៀតៗ​ដូច​ជារដ្ឋ​ Arizona, Florida និងរដ្ឋ Illinois ជា​ដើម​បាន​ធ្វើ​ការ​បោះឆ្នោត​បឋម​របស់​ពួកគេ។ នេះ​ជា​ការ​មិន​ទទួល​ខុសត្រូវ‍»។

លោក Tyler Brey អ្នកនាំពាក្យ​របស់​លោក Kyle Ardoin រដ្ឋមន្ត្រី​រដ្ឋលេខាធិការ​រដ្ឋ Louisiana និយាយ​ប្រាប់​វីអូអេ​ថា ​ពួកមន្ត្រីរដ្ឋ Louisiana មិន​បាន​ផ្តោត​ការ​យក​ចិត្ត​ទុកដាក់​លើ​អ្វី​ដែល​រដ្ឋឯទៀតៗ​ធ្វើ​នោះទេ។​

លោក Tyler Brey ពន្យល់ថា៖ «យើង​ធ្វើសេចក្តី​សម្រេច​របស់​យើង​ដោយផ្អែក​តែ​លើ​សុវត្ថិភាព​នៃ​ក្រុមអ្នក​បោះឆ្នោត​នៅក្នុង​រដ្ឋ​យើង​ ហើយ​ការណ៍​នេះ​ក៏​មាន​រួម​បញ្ចូលពួក​អ្នកធ្វើការរៀបចំ​ការបោះឆ្នោត​របស់​យើងដែរ​ដែល​ជា​ច្រើននាក់​មានអាយុ​ច្រើនជាង​៦៥ឆ្នាំ​ហើយភាគ​ច្រើន​អាចប្រឈម​នឹងគ្រោះថ្នាក់​បាន‍»។​

លោក​ Brey កត់សម្គាល់​ថា​រដ្ឋ Louisiana បានជ្រើសរើស​យក​ការ​ពន្យារ​ពេល​ការបោះឆ្នោត​បឋម​នៅ​មុនការ​បោះឆ្នោត​ដំបូង​បានចាប់ផ្តើម​ធ្វើនៅ​ក្នុង​រដ្ឋនេះ ដោយ​លោកនិយាយ​ថា «យើង​មិនទាន់ឋិត​នៅ​ពាក់​កណ្តាល​ការបោះឆ្នោត​មួយ​នៅ​ឡើយទេហើយ​យើង​មិន​ចង់​បញ្ឈប់​ការ​បោះឆ្នោតនៅ​ក្រោយ​វា​បាន​ចាប់​ផ្តើមទេ‍»។

ច្បាប់​រដ្ឋ​មាន​រួមបញ្ចូល​មាត្រាមួយ​សម្រាប់​ការ​លើក​ការបោះឆ្នោត​ទៅ​ធ្វើនៅ​ពេល​ក្រោយ។

រដ្ឋមន្ត្រី​ការបរទេសរបស់​រដ្ឋអាច​បញ្ជាក់​ភាព​មានអាសន្ន​ជម្រាបអភិបាល​រដ្ឋដែល​អាចចេញ​បញ្ជា​នីតិប្រតិបត្តិមួយដើម្បីលើកការបោះឆ្នោតទៅ​ធ្វើនៅ​ពេលក្រោយ។

លោក Brey និយាយថា ​លោក​ Ardoin ដែលជា​អ្នក​សាធារណរដ្ឋ​ម្នាក់​បានចាប់ផ្តើម​ដំណើរការ​នោះហើយ​នៅ​ក្រោយ​ពិនិត្យមើល​ជម្រើសនៃ​ការបោះឆ្នោតឯ​ទៀតៗ​ ដូចជា​ធ្វើការបោះឆ្នោត​តាមរយៈ​ការផ្ញើសន្លឹក​ឆ្នោត​តាមប្រៃសណីយ៍ ឬ ការ​បោះឆ្នោត​ដោយគ្មាន​វត្តមាន​អ្នក​បោះឆ្នោត។​

លោក Brey ថ្លែងថា៖ «ខ្ញុំ​មិនគិត​ថា​ប្រជារាស្ត្រដឹង​អំពីដំណើរការ​ទាំង​នេះទេ។ គ្មាន​ពេល​គ្រប់គ្រាន់​សម្រាប់​បោះពុម្ព​សន្លឹក​ឆ្នោត សម្រាប់រក​ស្រោមសំបុត្រ ដើម្បី​ផ្ញើ​សន្លឹកឆ្នោត​ទៅ​ឱ្យក្រុម​អ្នកបោះឆ្នោត​និង​ដើម្បី​ឱ្យមាន​ការ​ផ្ញើសន្លឹក​ឆ្នោត​ត្រឡប់​មក​វិញទេ‍។»

ទោះ​ជា​គណបក្ស​សាធារណរដ្ឋ​ច្បាស់​ជា​នឹងតែងតាំង​លោក ​Trump ​សម្រាប់តំណែង​ប្រធានាធិបតី មួយ​អាណត្តិទៀតក៏​ដោយ ក៏​ការ​ប្រកួតប្រជែង​ប្រធានាធិបតី​ខាង​គណបក្សប្រជាធិបតេយ្យ​នៅមានធ្វើ​ចំហរហូត​ដល់​កាល​ពីប៉ុន្មានសប្តាហ៍​ថ្មីៗ​នេះ។

នៅ​ពេលឥឡូវនេះ​លោក​សមាជិកព្រឹទ្ធសភាស.រ.អ. Bernie Sanders នៅ​តែឋិតនៅ​ក្នុង​ការ​ប្រកួតប្រជែង​នៅឡើយ ទោះណាជា​លោកអតីតអនុប្រធានាធិបតី Joe Biden បាននាំ​មុខច្រើនក្នុងចំនួនពួក​ប្រតិភូ​ដែល​នឹង​ចូលរួម​ក្នុង​មហាសន្និបាត​ជាតិ​នៃ​គណបក្សប្រជាធិបតេយ្យ នៅ​ពាក់កណ្តាលខែកក្កដា​ខាងមុខនេះក៏ដោយ។​

ការពន្យារពេល​ការបោះឆ្នោតបឋម​មិនគ្រាន់តែបន្ថយផលប៉ះពាល់​របស់​ក្រុម​អ្នក​បោះឆ្នោតទៅ​លើ​ការប្រកួតប្រជែង​ដើម្បី​ជ្រើសតាំង​បេក្ខជន​ប្រធានាធិបតី​ប៉ុណ្ណោះទេ តែ​វាថែម​ទាំង​អាច​ធ្វើឱ្យ​មានបញ្ហា​ដល់ការចូលរួមរបស់​ពពួក​រដ្ឋក្នុង​មហា​សន្និបាត​គណបក្ស​ផង​ដែរ។

រូបឯកសារ៖ លោក Joe Biden អតីតអនុប្រធានាធិបតីអាមេរិក និងលោក Bernie Sanders សមាជិកព្រឹទ្ធសភាប្រចាំរដ្ឋ Vermont ចូលរួមវេទិកាជជែកដេញដោលលើកទី១១ នៅរដ្ឋធានីវ៉ាស៊ីនតោន កាលពីថ្ងៃទី១៥ ខែមីនា ឆ្នាំ២០២០។
រូបឯកសារ៖ លោក Joe Biden អតីតអនុប្រធានាធិបតីអាមេរិក និងលោក Bernie Sanders សមាជិកព្រឹទ្ធសភាប្រចាំរដ្ឋ Vermont ចូលរួមវេទិកាជជែកដេញដោលលើកទី១១ នៅរដ្ឋធានីវ៉ាស៊ីនតោន កាលពីថ្ងៃទី១៥ ខែមីនា ឆ្នាំ២០២០។

រូបឯកសារ៖ លោកប្រធានាធិបតី ដូណាល់ ត្រាំ ថ្លែងនៅក្នុងយុទ្ធនាការជួបអ្នកគាំទ្រលោក នៅទីក្រុង Charlotte រដ្ឋ North Carolina កាលពីថ្ងៃទី២ ខែមីនា ឆ្នាំ២០២០។
រូបឯកសារ៖ លោកប្រធានាធិបតី ដូណាល់ ត្រាំ ថ្លែងនៅក្នុងយុទ្ធនាការជួបអ្នកគាំទ្រលោក នៅទីក្រុង Charlotte រដ្ឋ North Carolina កាលពីថ្ងៃទី២ ខែមីនា ឆ្នាំ២០២០។

ផលវិបាក

បទបញ្ញត្តិ​បច្ចុប្បន្ន​របស់​គណៈកម្មាធិការ​ជាតិនៃ​គណបក្ស​ប្រជាធិបតេយ្យ​ហៅ​កាត់​ថា​ DNC បញ្ជាក់​ថា​ ការ​ប្រកួត​ប្រជែង​ទាំង​អស់​ដើម្បី​ជ្រើសតាំង​បេក្ខជន​ប្រធានាធិបតី​ត្រូវធ្វើ​ឱ្យ​ចប់​មិន​ហួស​ពី​ថ្ងៃទី៩ ខែមិថុនា ទេ​ហើយ​បញ្ជី​ឈ្មោះពួក​ប្រតិភូ​ត្រូវ​ដាក់ស្នើ​មិន​ឱ្យ​ហួស​ថ្ងៃទី២០ ខែ​មិថុនា​ឡើយ គឺ​ជិត​បួន​អាទិត្យមុន​ការ​ចាប់ផ្តើម​មហាសន្និបាត​ជាតិ​នៃ​គណបក្ស​ប្រជាធិបតេយ្យ​នៅ​ក្នុង​ក្រុង Milwaukee រដ្ឋ Wisconsin។

បទបញ្ញត្តិ​របស់ DNC ចែង​ថា​ការ​ធ្វើមិន​ទាន់​ពេល​កំណត់​ចុងក្រោយ​បង្អស់អាច​នាំ​ឱ្យនាំ​រដ្ឋ​បាត់បង់ការ​បោះឆ្នោត​ពាក់កណ្តាល​របស់​ខ្លួន​នៅ​ក្នុង​មហាសន្និបាត​របស់​គណបក្ស។ អ្នកនាំ​ពាក្យ​ម្នាក់​របស់ DNC និយាយ​ថា​ គណៈកម្មាធិការខាង​បទបញ្ញត្តិ​និងច្បាប់របស់​ពួកគេកំពុងពិនិត្យ​មើលអំពី​បទបញ្ញត្តិ​នៅក្នុងកាលៈទេសៈមិន​ធម្មតា​បណ្តាល​មក​ពីមេរោគ​វីរុស​ COVID-19 ក៏​ប៉ុន្តែ​មិនទាន់មានសេចក្តី​សម្រេច​អំពី​ការថាតើ​នឹងព្យួរ​ការចែង​លក្ខខណ្ឌ​ឬបែបណាទេ។

លទ្ធភាព​នៃ​ការបាត់បង់​ភាពតំណាង​នៅក្នុង​មហាសន្និបាត​គណបក្ស នៅ​ក្រោយការ​ពន្យារ​ពេល​ការបោះឆ្នោត​បឋម នាំ​ឱ្យពួកអ្នកបោះឆ្នោត​ច្រើននាក់​នៅ​ក្នុង​រដ្ឋ ​Louisiana ខក​ចិត្ត​ដោយសារ​ការណ៍នេះ​អាច​ឱ្យ​លោក​ Trump ឈ្នះ​ឆ្នោត​ក្នុងរដ្ឋ​នេះ​បាន​ នៅ​ក្នុង​ខែ​វិច្ឆិកាខាង​មុខនេះ។​

អ្នកស្រី​ Pichon ​ដែល​ជា​អ្នក​បោះ​ឆ្នោត និយាយ​ថា ​អ្នកស្រីមានអារម្មណ៍​ថា​ ការជ្រើសរើសបេក្ខជន​ប្រធានាធិបតីជា​វិធីតែមួយ​គត់ដែល​អ្នកស្រី​មាន​សំឡេង​ពិតប្រាកដ​មួយ ក្នុង​ការសម្រេច​ថា​នរណានឹង​ក្លាយ​ជាប្រធានាធិបតី។

អ្នកស្រី​និយាយ​ថា៖ ​«ខ្ញុំមិនមានអារម្មណ៍​ថា​ខ្ញុំមានមតិ​មួយ​នៅក្នុង​ការ​បោះឆ្នោត​ក្នុង​ខែវិច្ឆិកា​ទេ‍» ដោយ​អ្នកស្រីកត់សម្គាល់​ថា ​ប្រព័ន្ធ​បោះឆ្នោត​ដោយ​គណៈអ្នកបោះឆ្នោត​របស់​សហរដ្ឋអាមេរិកអាមេរិក​ផ្តល់ប្រតិភូទាំង​អស់ពី​រដ្ឋមួយទៅ​ឱ្យបេក្ខជន​ដែលឈ្នះ​នៅ​ក្នុង​ការបោះឆ្នោត​ដោយផ្ទាល់នៅ​ក្នុង​រដ្ឋនោះ។

អ្នកស្រី​ថ្លែងថា៖ «នៅ​ក្នុងការបោះឆ្នោត​បឋម ​សន្លឹក​ឆ្នោត​ដែល​អ្នកឈ្នះ​មានលើស​ពី​គូប្រជែងរបស់​ខ្លួនមាន​សារៈសំខាន់។ ​សន្លឹក​ឆ្នោតនីមួយៗ​មាន​សារៈសំខាន់​សម្រាប់​ឱ្យបាន​ទទួល​ចំនួន​ប្រតិភូ‍»។

អ្នកស្រី Pichon និយាយ​បន្ថែមថា៖ «ការកាត់បន្ថយប្រតិភូយើង​ពាក់កណ្តាល​ដោយសារ​ការរាតត្បាត​ជំងឺ​មួយជា​ការដក​សិទ្ធិ»។

ការ​ស្វែង​រក​ដំណោះ​ស្រាយ

លោក Brey និយាយ​ថា៖ «ខ្ញុំ​បានឭ​ពួក​អ្នកបោះឆ្នោតដែល​និយាយ​ថា​ ហេតុ​ដូចម្តេច​បានជា​យើងមិន​ប្រើវិធី​បោះឆ្នោតឯទៀតៗ​ដូច​ជាការបោះឆ្នោតតាមរយៈការ​ផ្ញើសន្លឹក​ឆ្នោត​តាមប្រៃសណីយ៍​ឬ​ការបោះឆ្នោត​ដោយ​គ្មានវត្តមាន​អ្នកបោះឆ្នោត។​ ទាំង​នេះ​ជា​អ្វី​ដែល​យើង​កំពុង​ពិនិត្យមើលនៅ​ពេលនេះ ក៏ប៉ុន្តែវិធានការ​ទាំង​នេះមិន​មែន​ជា​អ្វីដែល​យើងមានរួចស្រេច​ហើយ​សម្រាប់​ការបោះឆ្នោត​បឋម​ក្នុងខែមិថុនាទេ‍»។

អង្គការ​ការពារ​សិទ្ធិបោះឆ្នោត​ជា​ច្រើននិយាយ​ថា ​ពួកគេអបអរ​ចំពោះ​រដ្ឋនានា​ដែល​ប្រឹងប្រែង​ពុះពារ​ឧបសគ្គ ក្នុងការ​រៀបចំ​ការ​បោះឆ្នោតនៅ​ពេល​មាន​ការ​រាតត្បាតជំងឺជា​សាកល​នេះ។ នៅ​ពេល​ជាមួយ​គ្នានេះ អង្គការទាំង​នេះ​បាន​ជំរុញ​រដ្ឋទាំងនោះឱ្យ​ធ្វើឱ្យ​ប្រាកដ​ប្រជា​ថា​ ការ​ចូលរួម​ក្នុង​ការបោះឆ្នោត​តាម​លទ្ធិប្រជាធិតេយ្យ​មិន​ត្រូវ​កាត់បន្ថយ​ទេ។

អ្នកស្រី Caren​ Short ជា​មេធាវី​ជាន់ខ្ពស់​នៃ​មជ្ឈមណ្ឌល​ស្វែង​រក​យុត្តិធម៌​ជូន​ពល​រដ្ឋ​ក្រី​ក្រ​Southern Poverty Law Center។

អ្នកស្រី​និយាយថា៖« ពួកមន្ត្រី​រដ្ឋ​កំពុង​ធ្វើ​សេចក្តី​សម្រេច​សាំញ៉ាំដោយ​ខិតខំ​ព្យាយាមផ្តល់​អាទិភាព​ដល់សុខភាព​សាធារណៈ ស្របពេល​ជាមួយ​កិច្ច​ការពារ​ដំណើរការ​ប្រជាធិបតេយ្យ។ អ្វី​ដែលធ្វើឱ្យមានភាព​ច្បាស់លាស់នៅ​ក្នុងវិបត្តិនេះគឺ​សារៈសំខាន់​នៃការផ្តល់​ជម្រើសសម្រាប់​ពួក​អ្នកបោះឆ្នោត​ដែល​មិន​អាចចុះ​ឈ្មោះដោយ​ផ្ទាល់បានឬ​មិនអាច​បោះឆ្នោតដោយផ្ទាល់​បាននៅថ្ងៃ​បោះឆ្នោត​នៅឯ​កន្លែង​បោះឆ្នោត​របស់ពួកគេ‍»។

អ្នកស្រី Short និយាយ​ថា វិធានការ​នានាគួរមានរួមបញ្ចូលការចុះ​ឈ្មោះតាមបណ្តាញ​Internetនិងការចុះឈ្មោះអ្នកបោះឆ្នោត​នៅ​ថ្ងៃ​តែមួយដូចគ្នា ការពង្រីកកម្មវិធីផ្ញើ​សន្លឹក​ឆ្នោត​តាម​ប្រៃសណីយ៍ឬ​ការ​បោះឆ្នោត​ដោយគ្មានវ​ត្តមាន​អ្នកបោះឆ្នោត ការ​ជ្រើសរើស​ពួកអ្នក​ចាត់ចែង​ការបោះឆ្នោតពី​ក្នុង​ចំណោមប្រជារាស្ត្រដែល​អាច​មាន​គ្រោះថ្នាក់​តិចដោយសារ​ជំងឺ​នេះ​និង​ការបោះឆ្នោតតាមចញ្ចើម​ថ្នល់។​

កាលពី​ថ្ងៃពុធ​ទី២៥ ខែមីនា ព្រឹទ្ធសភា​ស.រ.អ.​ បាន​អនុម័តសេចក្តី​ព្រាង​ច្បាប់​ខាង​សេដ្ឋកិច្ច​មួយដែល​ផ្តល់ប្រាក់​៤រយ​លានដុល្លារ សម្រាប់​ជួយដល់រដ្ឋ​ទាំងអស់​ក្នុង​ប្រទេស​អាមេរិក​ក្នុង​ការរៀបចំ​ការបោះឆ្នោត​នៅ​ពេលមានការរាតត្បាតសាកល​នៃ​ជំងឺនេះ។ ក្រុម​ចម្រុះមួយ​នៃ​អង្គការ​ក្នុងមូលដ្ឋាន​និងអង្គការ​ជាតិជាង​១៥០​ដឹកនាំ​ដោយ​អង្គការ​ការ​ពារ​សិទ្ធិពលរដ្ឋ​ The Leadership Conference on Civil and Human Rights មាន​ជំនឿ​ថា​ គេត្រូវការប្រាក់កាស​ជា​ចាំបាច់​ថែមទៀត ដោយ​សុំ​ទឹកប្រាក់ ២ពាន់​លាន​ដុល្លារ​ ដើម្បី​ធ្វើឱ្យ​ការ​បោះឆ្នោត​មាន​សុវត្ថិភាព​ និង​ការងាយ​ស្រួលជាងមុន​សម្រាប់មនុស្ស​គ្រប់គ្នា។​

អ្នកស្រី​ Short និយាយ​ថា៖ «ប្រសិនបើ​ពួក​មន្ត្រីរដ្ឋាភិបាល​យើង​ខកខាន​មិនបាន​ចាត់វិធានការទេ នៅ​ខែ​វិច្ឆិកា​នេះ ក្រុមអ្នក​បោះឆ្នោត​ប្រហែលត្រូវ​ជ្រើសរើស​ថា​ តើមួយ​ណា​សំខាន់​ជាង សុខភាព​របស់​ខ្លួន ឬការ​ចេញ​ទៅ​បោះឆ្នោត ហើយ​គ្មាន​នរណា​ម្នាក់គួរ​ធ្វើការ​ជ្រើសរើស​នោះទេ»៕

ប្រែ​សម្រួល​ដោយ ឈឹម​ សុមេធ

តួលេខនៃករណីឆ្លងជំងឺកូវីដ១៩

XS
SM
MD
LG