ប្រធានាធិបតីសហរដ្ឋអាមេរិក លោក ដូណាល់ ត្រាំ បានពន្យារពេលការកម្រិតឱ្យមនុស្សម្នាក់ៗនៅឆ្ងាយពីគ្នា និងគោលការណ៍ណែនាំផ្សេងទៀតដើម្បីប្រយុទ្ធប្រឆាំងនឹងការឆ្លងរាលដាលនៃវីរុសកូរ៉ូណានេះ រហូតដល់ថ្ងៃទី៣០ ខែមេសា ដោយលោកនិយាយថាអ្វីដែលបានធ្វើនេះ គឺដើម្បីជួយសង្គ្រោះជីវិតមនុស្ស។
លោក ត្រាំ បានថ្លែងក្នុងសន្និសីទសារព័ត៌មានប្រចាំថ្ងៃនៅសេតវិមានកាលពីថ្ងៃអាទិត្យថា «បើលោកអ្នកអនុវត្តតាមវិធាននេះបានកាន់តែល្អ នោះសុបិន្តអាក្រក់ទាំងមូលនឹងកាន់តែឆាប់ចប់»។ លោក ត្រាំ ថ្លែងបន្តទៀតថា លោកចង់ឱ្យជីវិតវិលត្រឡប់ទៅរកភាពធម្មតាឡើងវិញ។
វិធានការកាត់បន្ថយការឆ្លងរាលដាលដែលរដ្ឋាភិបាលបានកំណត់រយៈពេល២អាទិត្យមុនដំបូង ត្រូវផុតកំណត់ត្រឹមថ្ងៃចន្ទនេះ។
លោក ត្រាំ បានព្យាករណ៍ថាអត្រាស្លាប់ដោយសារកូវីដ១៩នៅសហរដ្ឋអាមេរិក នឹងឡើងដល់ចំណុចកំពូលក្នុងរយៈពេល២សប្តាហ៍ទៀត។ លោកនិយាយថា បន្ទាប់ពីនោះ សហរដ្ឋអាមេរិក និងចាប់ផ្តើមធ្វើដំណើរទៅរកភាពជាសះស្បើយឡើងវិញនៅត្រឹមថ្ងៃទី១ ខែមិថុនា។
កន្លងមក លោកត្រាំ ធ្លាប់និយាយថា លោកចង់ឱ្យសហរដ្ឋអាមេរិក វិលត្រឡប់មករកភាពប្រក្រតីឡើងវិញត្រឹមថ្ងៃទី១២ ខែមេសា ដោយលោកមិនចង់ឱ្យស្ថានភាពនៃការស្តារសេដ្ឋកិច្ច មានលក្ខណៈអាក្រក់ជាងជំងឺកូវីដ១៩នេះទេ៕
