កម្មវិធីវ៉ាក់សាំង COVAX ដែលជាកម្មវិធីអន្តរជាតិមួយក្នុងការចែកចាយវ៉ាក់សាំងបង្ការជំងឺកូវីដ១៩ដោយសមធម៌ទៅឲ្យប្រទេសនានានៅជុំវិញពិភពលោកនោះ កំពុងខ្វះខាតវ៉ាក់សាំងសម្រាប់ធ្វើការចែកចាយ។
ការខ្វះខាតនេះភាគច្រើនគឺដោយសារវិទ្យាស្ថានផលិតវ៉ាក់សាំងដ៏ធំរបស់ឥណ្ឌាឈ្មោះ Serum Institute លែងមានលទ្ធភាពផលិតចែកចាយទៅតាមតម្រូវការរបស់ពិភពលោកអស់រយៈពេលជាច្រើនខែមកហើយ ដោយសារតែមានតម្រូវការខ្លាំងហួសហេតុពេកនៅក្នុងប្រទេសឥណ្ឌាខ្លួនឯង។
អង្គការមូលនិធិកុមារ UNICEF របស់អង្គការសហប្រជាជាតិទទួលបន្ទុកជាអ្នកចរចាទិញនិងចែកចាយក្នុងកម្មវិធី COVAX ទៅឲ្យប្រទេសនានានៅជុំវិញពិភពលោក។
អ្នកស្រី Henrietta Fiore នាយិកាប្រតិបត្តិនៃទីភ្នាក់ងារ UNICEF បានអំពាវនាវដល់ប្រទេសមួយចំនួន ដោយមិនគ្រាន់តែផ្តល់ថវិកាជួយទ្រទ្រង់ដល់កម្មវិធី COVAXតែប៉ុណ្ណោះទេ តែត្រូវជួយចែករំលែកនូវវ៉ាក់សាំងដែលខ្លួនមានលើសកំណត់មកឲ្យផងដែរ ដែលវ៉ាក់សាំងទាំងនេះ«កំពុងត្រូវការជាចាំបាច់នៅពេលនេះ»។
អ្នកស្រី Fiore និយាយថា ការវិភាគទិន្នន័យមួយចំនួន បានបង្ហាញថា ក្រុមប្រទេសអ្នកមាន G-7 និងរដ្ឋជាសមាជិករបស់សហភាពអឺរ៉ុប «អាចផ្តល់វ៉ាក់សាំងប្រមាណចំនួន ១៥៣លានដូស ប្រសិនបើគេអាចជួយចែករំលែកតែ ២០% នៃវ៉ាក់សាំងដែលពួកគេមានក្នុងខែមិថុនា កក្កដា និងខែសីហាខាងមុខនេះ។ សំខាន់ជាងនេះគឺប្រទេសទាំងនេះអាចធ្វើដូចនេះបាន ខណៈដែលគេនៅតែអាចឆ្លើយតបទៅតាមការសន្យារបស់គេក្នុងការចាក់វ៉ាក់សាំងទៅឲ្យពលរដ្ឋក្នុងប្រទេសរបស់ខ្លួន»។
ប្រធានអង្គការ UNICEF រូបនេះ ក៏បានបញ្ជាក់ផងដែរថា៖ «កម្មវិធី COVAX នឹងចែកចាយវ៉ាក់សាំងរបស់ខ្លួនចំនួន ៦៥ លានដូស ក្នុងរយៈពេលឆាប់ៗខាងមុខនេះ។ ចំនួនវ៉ាក់សាំងនេះ គួរមានយ៉ាងតិចណាស់ក៏១៧០លានដូសដែរ។ នៅពេលដែលក្រុមប្រទេស G7 ជួបប្រជុំគ្នាក្នុងប្រទេសអង់គ្លេសនៅខែក្រោយនោះ ហើយស្របពេលដែលរលករាតត្បាតទី២នៃជំងឺកូវីដ១៩ កំពុងវាយលុកយ៉ាងខ្លាំងនៅក្នុងប្រទេសឥណ្ឌា និងប្រទេសក្បែរខាងឥណ្ឌាជាច្រើននោះ ការខ្វះខាតវ៉ាក់សាំងសម្រាប់ចែកចាយតាមរយៈកម្មវិធី COVAX នឹងមានចំនួនកើនឡើងរហូតដល់ជិត ១៩០ លានដូស»៕
