ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

គ្រួសារ​សកម្មជន ​គង់ រ៉ៃយ៉ា​ ចាត់​ទុក​សាលក្រម​តុលាការ​ថា ​អយុត្តិធម៌


រូបឯកសារ៖ លោក គង់ រ៉ៃយ៉ា ត្រូវបានប៉ូលិសនាំខ្លួនចូលសាលាដំបូងរាជធានីភ្នំពេញ ក្រោមការចោទប្រកាន់ពីបទញុះញង់ប្រព្រឹត្តឧក្រិដ្ឋកម្មជាអាទិ៍ កាលពីថ្ងៃទី១១ ខែកក្កដា ឆ្នាំ២០១៩។

ក្រុម​គ្រួសារ​លោក​ គង់ រ៉ៃ​យ៉ា នៅ​ថ្ងៃ​សុក្រ​នេះ បាន​ហៅ​សេចក្តី​សម្រេច​របស់​សាលា​ដំបូង​ក្រុង​ភ្នំពេញ​ថា ​អយុត្តិធម៌ ក្រោយ​ពី​តុលាការ​នេះ​បានកាត់​ទោសរូប​លោក​ឲ្យ​ជាប់​ពន្ធនាគារ​ ២​ឆ្នាំ ​ពី​បទ​«ញុះ​ញង់​ឱ្យ​ប្រព្រឹត្ត​បទ​ល្មើស​ជា​អាទិ៍» និង​បទ «មិន​រាង​ចាល​ក្នុង​បទ​មជ្ឈិម​បន្ទាប់​ពី​ការ​ផ្តន្ទាទោស​បទ​មជ្ឈិម»។​

ប៉ុន្តែ​តុលាការ​បង្គាប់​ឲ្យ​អនុវត្តទោស​តែ ​៤​ខែ​ និង​១៨​ថ្ងៃ ដោយ​ព្យួរ​ទោស​ដែល​នៅ​សល់ ពោល​គឺ​កាត់​តម្រឹម​តាម​ចំនួន​ខែ​ និង​ថ្ងៃ​ ដែល​លោក​ គង់ រ៉ៃយ៉ា បាន​ជាប់​ឃុំ​មុន​ការ​កាត់​ទោស។​

អ្នក​ស្រី​ សុខ ស្រីនិច្ច ភរិយា​របស់​លោក បាន​ថ្លែង​ប្រាប់​វីអូអេ​ នៅ​យប់​ថ្ងៃ​សុក្រ​នេះ​ យ៉ាង​ដូច្នេះ​ថា៖ «មិន​រក​ភាព​ស្អាត​ស្អំ​ឲ្យ​គាត់​ បែរ​ជា​ចោទ​ប្រកាន់​គាត់​ហើយ​កាត់​ទោស​គាត់​ ២​ឆ្នាំ​ អ៊ីចឹងទៀត គឺ​វា​អយុត្តិធម៌​មែនទែន​ សម្រាប់​ស្វាមី​របស់​ខ្ញុំ»។​

លោក​ គង់ រ៉ៃយ៉ា ​ត្រូវ​បាន​អាជ្ញាធរ​ចាប់​ខ្លួន​ កាល​ពី​ខែ​កក្កដា ​ឆ្នាំ​២០១៩​ តាម​ការ​ចោទ​ប្រកាន់​ពី​បទ​ «ញុះញង់​ឲ្យ​ប្រព្រឹត្ត​បទ​ឧក្រិដ្ឋ​ជា​អាទិ៍»​ ពាក់ព័ន្ធ​នឹង​សកម្ម​ភាព​របស់​លោក​ ក្នុង​ការ​លក់​អាវ​យឺត​ដែល​មាន​រូប​ និង​សម្តី​របស់​សព​លោក​បណ្ឌិត កែម ឡី​ ដែល​ត្រូវ​បាន​ឃាតកបាញ់​សម្លាប់​ កាល​ពី​ឆ្នាំ​ ២០១៦។ ​

ពាក្យ​ស្លោក​មួយ​នៅ​លើ​អាវ​យឺត​នោះ​សរសេរ​ថា៖ ​«ប្រសិន​បើ​អ្នក​មិន​ធ្វើ​អ្វី​សោះ​ អ្នក​នឹង​រង​គ្រោះ​គ្រាន់តែ​មិន​ទាន់​ដល់​វេន​អ្នក​ប៉ុណ្ណោះ»។​

សកម្មជន​យុវជនរូប​នេះ​ធ្លាប់​ជាប់​ពន្ធនាគារ​ម្ដង​រួច​មក​ហើយ​ កាល​ពីខែ​មីនា ​ឆ្នាំ​២០១៦​ ដោយ​ត្រូវ​តុលាការ​កាត់​ទោស​ពី​បទ​ «ញុះញង់​ឱ្យ​ប្រព្រឹត្ត​បទ​ឧក្រិដ្ឋ​ជាអាទិ៍» ក្រោយ​ពី​លោក​បាន​ប្រកាស​តាម​បណ្ដាញ​សង្គម​អំពាវ​នាវឱ្យ​មហាជន​ចូលរួម​ធ្វើ​បដិវត្តន៍​ពណ៌​ជាមួយ​នឹង​រូប​លោក។​

បច្ចុប្បន្ន​សកម្មជន​រូប​នេះ​កំពុង​ស្ថិត​នៅ​ក្រៅ​ប្រទេស ចាប់​តាំង​ពី​លោក​ត្រូវ​បាន​តុលាការអនុញ្ញាត​ឲ្យ​ស្ថិត​នៅ​ក្រៅ​ឃុំ​ រង់ចាំ​ការ​ជំនុំ​ជម្រះ​ទោស​កាល​ពី​ខែ​វិច្ឆិកា ឆ្នាំ​២០១៩​មក៕

តួលេខនៃករណីឆ្លងជំងឺកូវីដ១៩

XS
SM
MD
LG