មនុស្ស ៥៦ នាក់ នៅក្នុងប្រទេសចិន បានស្លាប់ដោយសារការឆ្លងមេរោគកូរ៉ូណាប្រភេទថ្មី ដែលហៅថា 2019-nCoV។ នេះបើយោងតាមការបញ្ជាក់របស់មន្ត្រីចិន។
មនុស្សជិត ២ ពាន់នាក់ នៅក្នុងប្រទេសចិនបានឆ្លងមេរោគដ៏កាចសាហាវមួយនេះ។
រដ្ឋមន្ត្រីគណៈកម្មការសុខាភិបាលជាតិចិនលោក Ma Xiaowei បាននិយាយនៅថ្ងៃអាទិត្យនេះថា គេដឹងតិចតួចនៅឡើយអំពីមេរោគថ្មីនេះ។ លោកបានបញ្ជាក់ថា មេរោគនេះមានរយៈពេលបង្ករោគពីមួយថ្ងៃដល់ ១៤ ថ្ងៃ ដោយក្នុងរយៈពេលនេះ មេរោគនេះអាចឆ្លងបានដោយងាយស្រួលជាទីបំផុត។ លោកបានបន្ថែមថា ការឆ្លងមេរោគនេះត្រូវគេរំពឹងថានឹងបន្តកើនឡើង។
ប្រទេសចិនបានបញ្ជាក់ថា ករណីឆ្លងមេរោគថ្មីនេះចំនួន ៦៨៨ ករណីទៀត ត្រូវបានរកឃើញកាលពីថ្ងៃសៅរ៍ម្សិលមិញ។ ប្រធានាធិបតីចិនលោក Xi Jinping បាននិយាយថា ប្រទេសចិនកំពុងប្រឈមនឹង «ស្ថានភាពធ្ងន់ធ្ងរ»។
មេរោគកូរ៉ូណាប្រភេទថ្មីនេះត្រូវបានគេជឿថាបានកើតឡើងដំបូងកាលពីចុងខែធ្នូ ឆ្នាំ ២០១៩ នៅផ្សារគ្រឿងសមុទ្រមួយកន្លែងដែលលក់សត្វព្រៃខុសច្បាប់ នៅក្នុងទីក្រុង Wuhan ខេត្ត Hubei ប្រទេសចិន។
នៅថ្ងៃអាទិត្យនេះ រដ្ឋាភិបាលចិនបានប្រកាសហាមឃាត់ការលក់ដូរសត្វព្រៃជាបណ្ដោះអាសន្ននៅទូទាំងប្រទេស។ ទីក្រុង Wuhan និងទីក្រុងចិនជាង ១០ ផ្សេងទៀត ត្រូវបានកាត់ផ្ដាច់ពីកន្លែងដទៃ ដែលជាកិច្ចប្រឹងប្រែងមួយដើម្បីទប់ស្កាត់ការរីករាលដាលនៃមេរោគកូរ៉ូណាប្រភេទថ្មីនេះ។
នៅថ្ងៃអាទិត្យនេះផងដែរ សហរដ្ឋអាមេរិកកំពុងរៀបចំគម្រោងជម្លៀសមន្ត្រីការទូត និងពលរដ្ឋអាមេរិកាំងនានាចេញពីទីក្រុង Wuhan។ ប្រទេសបារាំង និងរុស្ស៊ីក៏កំពុងរៀបចំគម្រោងជម្លៀសពលរដ្ឋរបស់ខ្លួនចេញពីទីក្រុង Wuhan ផងដែរ។
មេរោគដ៏កាចសាហាវមួយនេះកំពុងរាតត្បាតនៅទូទាំងពិភពលោក។ កន្លងមក សេចក្ដីរាយការណ៍នានាបានបង្ហាញថា គេរកឃើញមានករណីឆ្លងមេរោគនេះមួយចំនួននៅក្នុងប្រទេសអូស្ត្រាលី កាណាដា បារាំង ទីក្រុងហុងកុង ប្រទេសជប៉ុន ទីក្រុងម៉ាកាវ ប្រទេសម៉ាឡេស៊ី នេប៉ាល់ ព័រទុយហ្គាល់ សិង្ហបុរី កូរ៉េខាងត្បូង កោះតៃវ៉ាន់ ប្រទេសថៃ សហរដ្ឋអាមេរិក និងប្រទេសវៀតណាម៕
