ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

មេ​​សហជីព​ទាមទារ​ឲ្យ​រដ្ឋាភិបាល​ស៊ើបអង្កេត​ឡើង​វិញ​ករណី​ហិង្សា​ផ្លូវ​វេងស្រេង


រូបឯកសារ៖ លោក​ អាត់​ ធន់​ ប្រធាន​សហភាព​ការងារ​កម្ពុជា​ ថ្លែង​ទៅ​កាន់​​អ្នក​កាសែត​អំពី​បរិយាកាស​ការងារ​នៅ​ក្នុង​ប្រទេស​​នៅ​ក្នុង​​ពិធី​​ជួបជុំ​ប្រារព្ធ​ទិវា​ពលកម្ម​អន្តរជាតិ​ថ្ងៃ​ទី​១​ ខែ​ឧសភា ឆ្នាំ​២០១៨​ នៅក្នុង​ទីក្រុង​ភ្នំពេញ​។ (ហ៊ុល​ រស្មី​/VOA)

ក្រុម​មេដឹកនាំ​សហជីព​៦​រូប​ដែល​ត្រូវបាន​តុលាការ​ក្រុង​ភ្នំពេញ​កាត់​ទោស​ឲ្យ​ជាប់​ពន្ធនាគារ​រយៈពេល​២ឆ្នាំ​ ​និង៦ខែ​ ​បាន​អំពាវនាវ​ឲ្យ​រដ្ឋាភិបាល​របស់​លោក​នាយករដ្ឋមន្ត្រី​ ​ហ៊ុន សែន​ ​បើក​ការ​ស៊ើប​អង្កេត​ឲ្យ​បាន​ហ្មត់​ចត់​និង​ឯករាជ្យ​មួយ​ដើម្បី​រក​ឲ្យ​ឃើញ​ជន​ដែល​បញ្ជា​ឲ្យ​មាន​ការ​បង្រ្កាប​យ៉ាង​ហិង្សា​លើ​ការ​តវ៉ា​របស់​កម្មករ​ដែល​ទាមទារ​ដំឡើង​ប្រាក់​ឈ្នួល​កាលពី​ចុង​ឆ្នាំ​២០១៣​ ​និង​ដើម​ឆ្នាំ​២០១៤។

លោក​ ​អាត់ ធត់​ ​ប្រធាន​សហភាព​ការងារ​កម្ពុជា​ ​មាន​ប្រសាសន៍​ប្រាប់​ VOA​ ​កាលពី​សប្តាហ៍​មុន​ថា៖

«​ចំពោះ​ខ្ញុំ​ផ្ទាល់​ករណី​នេះ​ គឺ​ដូច​អត់​ទាន់​ចប់​ គឺ​យើងផ្ទាល់​គឺ​គេ​កាត់​ក្តី​ឲ្យ​មាន​ទោស​ សូម្បី​តែ​យើង​អត់​បាន​ធ្វើ​ ហើយ​ការ​ស៊ើប​អង្កេត​ផ្សេង​ទៀត​របស់​រដ្ឋាភិបាល​ ខ្ញុំ​ក៏​អត់​ទាន់​ឃើញ​មាន​របាយការណ៍​អី​ច្បាស់​លាស់​ដែរ​ សូម្បី​អង្គការ​ ILO​ ក៏​ស្នើ​រដ្ឋាភិបាល​ហ្នឹង​គឺ​បង្ហាញ​របាយការណ៍​ អំពី​ការ​បង្ក្រាប​ក្នុង​អំឡុង​ពេល​ហ្នឹង​ ឬក៏​បញ្ហា​ពាក់​ព័ន្ធ​តាំង​ពី​សម្លាប់ ​ជា វិជ្ជា ​ហ្នឹង​ ក៏​គេ​នៅ​ឲ្យ​ គេ​នៅ​តែ​ត្រូវ​ការ​ស្នើ​ឲ្យ​ខាង​រដ្ឋាភិបាល​បង្ហាញ​ទៅ​ឲ្យគេ​ដែរ»។

អ្នកស្រី​ ​យ៉ាង សោភ័ណ្ឌ​ ​ប្រធាន​សម្ព័ន្ធ​សហជីព​កម្ពុជា​ ដែល​មិន​សប្បាយចិត្ត​នឹង​ការ​កាត់​ទោស​របស់​សាលា​ដំបូង​រាជធានី​ភ្នំពេញចំពោះ​អ្វី​ដែល​អ្នកស្រី​អះអាង​ថា​មិន​ត្រឹម​ត្រូវ​នោះ​ ក៏​បានទាមទារ​ឲ្យ​មាន​ការ​ស្រាវជ្រាវ​ ទៅ​លើ​ការ​បង្ក្រាប​ក្រុម​កម្មករ​កាល​ពី​ជិត​៥​ឆ្នាំមុន​នោះ។

«​ធម្មតា​ខ្ញុំ​ចង់​មើល​ឃើញសង្គម​មួយ​ ដែល​សង្គម​ត្រឹមត្រូវ​ យុត្តិធម៌ ហើយ​សម្រាប់​ខ្ញុំ​ខ្លួន​ឯង ​ក៏​ចង់​បាន​យុត្តិធម៌​ សម្រាប់​កម្មករ​ដទៃ​ទៀត​ ក៏​គាត់​ចង់​បាន​យុត្តិធម៌​ដែរ​ថា​ ការ​សម្រេចចិត្ត ឬ​ក៏​ការ​...ខ្ញុំ​ៗ ខ្ញុំ​ស្នើ​សុំ​ឲ្យ​មានការ​ស៊ើប​អង្កេត​មួយ​ឲ្យ​ច្បាស់​លាស់​ មាន​ការ​ស៊ើប​អង្កេត​ឯករាជ្យ​ ហើយ​មាន​គ្រប់​ភាគី​ពាក់​ព័ន្ធ ក្នុង​ការ​ចូលរួម​ មិនមែន​មាន​សមាសភាព​តែ​ភាគី​តែ​ម្ខាង​ទេ។​ ​បើ​មាន​សមាសភាព​តែ​ភាគី​ម្ខាង​ ខ្ញុំ​យល់​ថា​ មិន​មាន​ភាព​ឯករាជ្យ​ចំពោះ​ពួក​ខ្ញុំ​ទេ»។

ក្នុង​ព្រឹត្តិការណ៍​តវ៉ា​ទាម​ទារ​ដំឡើង​ប្រាក់​ឈ្នួល​ក្នុង​ឧស្សាហកម្ម​កាត់ដេរ​កាល​ពី​ចុង​ឆ្នាំ​២០១៣​និង​ដើម​ឆ្នាំ​២០១៤​នោះ​ ក្រុម​កម្មករ​បាន​ចេញ​តវ៉ា​នៅ​លើ​កំណាត់​ផ្លូវ​វេងស្រេង​ និង​តំបន់​ឧស្សាហកម្ម​ផ្សេង​ទៀត​នៅ​រាជធានី​ភ្នំពេញ។

​កងទ័ព​ពិសេស​នៃ​កង​ពល​៩១១​ ដែល​ជា​អង្គភាព​ជំនិត​របស់​លោក ​ហ៊ុន សែន​ បាន​ធ្វើ​ការ​បង្ក្រាប​យ៉ាង​ហិង្សា​លើ​ក្រុម​បាតុករ​នៅ​ថ្ងៃ​ទី ២​ ​ខែ ​មករា ឆ្នាំ​ ២០១៤។

មួយ​ថ្ងៃ​ក្រោយ​មក​ គឺ​ថ្ងៃ​ទី ៣​ ខែ មករា ឆ្នាំ ២០១៤​ មាន​មនុស្ស​បួន​នាក់​បាន​ស្លាប់​ និង​ម្នាក់​បាត់​ខ្លួន ​ហើយ​របួស​ជាច្រើន​នាក់​ផ្សេង​ទៀត​នៅ​ក្នុង​ព្រឹត្តិការណ៍​បង្ក្រាប​បាតុកម្ម​នោះ​ ដោយ​ក្នុង​ថ្ងៃ​នោះ​មាន​ការ​បាញ់​រះ​ពី​ក្រុម​សមត្ថ​កិច្ច​នៅ​តំបន់​សួន​ឧស្សាហកម្ម​កាត់ដេរ​ កាណាឌីយ៉ា​ ​ក្នុង​រាជធានី​ភ្នំពេញ​ ​លើ​កំណាត់​ផ្លូវ​វេង​ស្រេង​នោះ។

មាន​ការ​ចាប់​ខ្លួន​ក្រុម​សកម្មជន​សិទ្ធិ​មនុស្ស​២៣​នាក់​ផ្សេង​ទៀត​ក្នុង​ព្រឹត្តិ​ការណ៍​តវ៉ា​លើ​ផ្លូវ​វេងស្រេង​ និង​នៅ​ត្រង់​តំបន់​រោងចក្រ​ស្ថិត​នៅ​តាម​ផ្លូវជាតិ​លេខ៤ ​មក​ផ្តន្ទាទោស​ផង​ដែរ​ តែ​ពួកគេ​ទាំង​២៣​នាក់​នោះ ក្រោយ​មក​បាន​ទទួល​សេរីភាព​វិញ​ បន្ទាប់​ពី​មាន​ការ​ថ្កោល​ទោស​ជា​អន្តរជាតិ​ពី​ក្រុម​អង្គការ​សិទ្ធិ​មនុស្ស​អន្តរជាតិ​ធំៗ​ និង​ស្ថាប័ន​ពាក់ព័ន្ធ​ជា​ច្រើន​ដែល​ធ្វើការ​ក្នុង​វិស័យ​ការងារ។ ​គណបក្ស​សង្គ្រោះ​ជាតិ​ក៏​បាន​ចូលរួម​ធ្វើ​បាតុកម្ម​ក្នុង​គ្រា​នោះ​ដែរ។ ​នេះ​បើ​តាម​ការ​បញ្ជាក់​របស់​មេដឹកនាំ​សហជីព​មួយ​ចំនួន។

លោក ​វន់ ពៅ ​ប្រធាន​សមាគម​សេដ្ឋកិច្ច​ក្រៅ​ប្រព័ន្ធ​ ហៅ​កាត់​ថា​ IDEA​ ដែល​រង​ការ​វាយ​ដំ​ក្នុង​ព្រឹត្តិ​ការណ៍​បង្ក្រាប​យ៉ាង​ហិង្សា​នោះ​អះអាង​ថា​ ការ​ស៊ើបអង្កេត​ថ្មី​មួយ​ទៅ​លើព្រឹត្តិការណ៍​បង្រ្កាប​នេះ​គឺ​ជា​រឿង​ចាំបាច់​។

«រឿង​នេះ​ មិនមែន​ជា​រឿង​ករណីរបួស​ស្នាម​បន្តិចបន្តួច​ទេ​ គឺ​ជា​រឿង​ដែល​ប៉ុនប៉ង​វាយ​សម្លាប់​ចោល​តែម្តង​។ អីចឹង​ គួរ​តែ​អង្កេត​ឲ្យបាន​ច្បាស់​លាស់​ ដើម្បី​ដាក់​ទោស​ទណ្ឌ​អ្នក​ដែល​ប្រព្រឹត្ត​អំពើ​ហិង្សា​មក​លើ​ពួក​ខ្ញុំ​ហ្នឹង​ អ្វី​ដែល​ខ្ញុំ​មើល​ឃើញ​ អីចឹង​ហើយ​បាន​ខ្ញុំ​លើក​ឡើង​ថា​ ឥឡូវ​នេះ​ យើង​មាន​ជំងឺ​ជាប់​ខ្លួន​ ដោយសារ​រង​ការ​វាយ​ប្រហារ​ ជំងឺ​ផ្លូវ​ចិត្ត​ បាក់​ ខូចផ្លូវចិត្ត​ហ្នឹង​ទៀត តើ​អ្នកណា​ជា​អ្នក​សង​ អីចឹង​គួរតែ​ ដាក់​ទោសទណ្ឌ​អ្នក​ដែល​ធ្វើ​ឲ្យ​យើង​ខូច​សុខភាព​ ធ្វើ​ឲ្យ​យើង​មាន​របួស​ស្នាម​ ឈឺ​រហូត​ទល់​ឥឡូវ ដាក់​ទោសទណ្ឌ​អ្នក​ហ្នឹង​»។

ប៉ុន្តែ​នាយ​ឧត្តមសេនីយ៍ ​ខៀវ សុភ័គ​ អ្នកនាំពាក្យ​ក្រសួង​មហាផ្ទៃ​ប្រាប់​ VOA ថា​ ការ​ស៊ើបអង្កេត​ណាមួយ​បន្ថែម​ទៀត​ទៅ​ក្នុងហេតុការណ៍​បង្រ្កាប​ដ៏​ហិង្សា​នោះ គឺ​អាស្រ័យ​លើ​ស្ថាប័ន​តុលាការ។

«អ្វី​ដែល​ចង់​ជម្រាប​ជូន​ក្មួយ​ថា​ សំណុំ​រឿង​នេះ​ ស្ថិត​នៅ​ក្នុង​ស្ថាប័ន​របស់​តុលាការ​ តុលាការ​លោក​បាន​ព័ត៌មាន​ទាំងអស់​ពី​សមត្ថកិច្ច​ ទាំង​រូបភាពផង​ ទាំង​វត្ថុតាង​ នានា​ផង​ ដូច្នេះ​រាល់​សេចក្តី​សម្រេច​របស់​តុលាការ ចាត់​ទុក​ជា​សេចក្តីសម្រេច​ ដែល​ប្រកប​ដោយ​ឆន្ទានុសិទ្ធិ​របស់​តុលាការ​ ហើយ​ក្រសួង​មហាផ្ទៃ​នឹង​អនុវត្ត​តាម​តុលាការ​ប្រសិន​បើ​មាន​ការ​បង្គាប់​ណែនាំ​ណាមួយ​ឲ្យ​ធ្វើការ​ស៊ើបអង្កេត​បន្ត»​។

មន្ត្រី​អ្នកនាំពាក្យ​រូប​នេះ​ បានសង្កត់ធ្ងន់​ថា​ បើ​សិន​ជា​ចង់​បន្ត​សើរើ​រក​ខុស​និង​ត្រូវ​ក្នុង​ហេតុ​ការណ៍​នេះ​ ក្រុម​មន្ត្រី​ជាន់​ខ្ពស់​របស់​គណបក្ស​សង្គ្រោះ​ជាតិ​ ត្រូវ​តែ​ចេញ​មក​តទល់​ជាមួយ​ស្ថាប័ន​យុត្តិធម៌​របស់​ប្រទេស​។

«រឿង​ដែល​ពិត​ដែល​ប្រាកដ​ អ្នក​ដែល​ទទួល​ខុស​ត្រូវ​គឺ​ ភាគច្រើន​អ្នក​ណា​ដែល​មាន​ឈ្មោះ​នៅ​ក្នុង​ហ្នឹង​ មាន​ ហូ វណ្ណ​ មាន មូរ សុខហួរ​ អីណោះ​ អ្នកបញ្ជា​ពីក្រោយ​ណោះ​ អ៊ីចុះ​ អ្នក​ដែល​បញ្ជា​ពីក្រោយអ្នកបញ្ជា​ចេញ​ពី​ទីលាន​ប្រជាធិបតេយ្យ​តើ​! អ្នក​បញ្ជា​ទៅ​ណ៎ា!​ ដើម្បីឲ្យ​ប្រើ​ប្រាស់​អំពើ​ហិង្សា​ ផ្តួល​រំលំ​អី​ វា​មិនមែន​ជាបាតុកម្ម​ដើម្បី​ទាមទារ​ប្រាក់​ខែ​ឯណា​? គឺជា​កុប្បកម្ម​ផ្តួល​រំលំ​ រដ្ឋាភិបាល​ ដែល​ស្រប​ ចេញ​ពី​ការ​បោះឆ្នោត​ ហើយ​អ្នក​បញ្ជា​ បញ្ជាការដ្ឋាន​ធំ​ គឺ​ទីលាន​ប្រជាធិបតេយ្យ​។ ហើយ​អ្នក​ដែល​អនុវត្ត​បញ្ជា​ មាន​តំណាង​រាស្ត្រ​បក្ស​ប្រឆាំង​ មូរ សុខហួរ​ ហូ វណ្ណ​ យក​នំបុ័ង​ទៅ​ពី​យប់​តាំង​ រឿង​អី​ថ្នាក់​ដឹក​នំបុ័ង​តាំង​ពី​ម៉ោង​១២​យប់​អ្វី? មិន​ជា​ការ​ដឹកនាំ​កម្លាំង​អី​ផ្តួល​រំលំ​។ បើ​ចង់​ ឥឡូវចង់​ទៅ​ឆ្ងាយ​ទៀត​ កាន់​តែ​ឆ្ងាយ​តើ! មាន​ពិបាក​អី?...បើ​ចង់​ឆ្ងាយ​ទៀត​ ហៅ​ហូ វណ្ណ​ ​ហើយ​មូរ សុខ​ហួរ​ចូល​ក្រចក​សេះ​ទៅ»។

លោក ​លី សុផាណា​ អ្នក​នាំ​ពាក្យ​សាលា​ដំបូង​រាជធានី​ភ្នំពេញ​ មិន​ទាន់​មានការ​ឆ្លើយ​តប​ទៅ​នឹង​សំណួរ​របស់​ VOAដែល​បាន​ផ្ញើ​ទៅ​ទូរស័ព្ទដៃ​របស់​លោក​នៅ​ថ្ងៃ ពុធ នេះ​ទេ។ VOA ​ក៏​មិន​ទាន់​ទទួល​បានការ​ឆ្លើយ​តប​ពីអ្នកស្រី​ មូរ សុខហួរ​ តំណាងរាស្ត្រ​គណបក្ស​សង្គ្រោះ​ជាតិ​ ដែល​ត្រូវ​បាន​តុលាការ​រំលាយ​ចោល​កាល​ពី​ឆ្នាំ ​២០១៧។

ក្នុង​ករណី​ការ​បង្ក្រាប​យ៉ាង​ហិង្សា​មក​លើ​ក្រុម​អ្នក​តវ៉ា​លើ​កំណាត់​ផ្លូវ​វេងស្រេង​នៅ​ក្នុង​រាជធានី ​ភ្នំពេញ​ ដែល​បាន​នាំ​ឲ្យ​ក្រុម​មេដឹកនាំ​សហជីព​៦​រូបរងការកាត់​ទោស​នោះ​ ក្រុម​អង្គការ​សង្គម​ស៊ីវិល​ ដែល​ជាសហជីព​ ចលនា​ និង​សមាគម​អន្តរជាតិ​ចំនួន​៩៥​ បាន​ចេញ​សេចក្តីប្រកាស​មួយ​កាល​ពី​ថ្ងៃ​ទី ​២៤​ ខែ​ ធ្នូ​ កន្លង​ទៅ​នេះ ថ្កោលទោស​ការ​ផ្ដន្ទាទោស​ក្រុម​មេដឹកនាំ​សហជីព​ទាំង​៦​នាក់​របស់​កម្ពុជា​។

ក្រុម​អង្គការ​សង្គមស៊ីវិល​ទាំងនោះបាន​សរសេរ​ក្នុង​ប្រកាស​របស់​ពួកគេ​ថា ទោះបី​ជា​ការ​ផ្តន្ទាទោសមិន​តម្រូវ​ឲ្យ​ជាប់​ពន្ធនាគារ​ក៏ដោយ​ តែ​ទោះ​ជា​យ៉ាង​ណា ថ្នាក់​ដឹកនាំ​សហជីព​ទាំងនោះ​ នឹង​ប្រឈម​នឹង​ការ​ជាប់​ឃុំ​ក្នុង​ពន្ធនាគារ​ប្រសិន​បើ​ក្នុង​រយៈពេល​៥ឆ្នាំ​ (ដែល​ជា​រយៈពេល​សាកល្បង) អ្នក​ទាំង​នោះ​ ទទួល​នូវ​ការ​ចោទប្រកាន់​នូវ​បទល្មើស​ព្រហ្មទណ្ឌ​ថ្មី​ណាមួយ​នៃ​ច្បាប់​កម្ពុជា។ ការ​ព្យួរ​ទោស​ដែល​មាន​រយៈពេល​តាម​ច្បាប់​៥ឆ្នាំ​នេះ​ គឺ​ជា​រយៈពល​មួយ​ដែល​គាប់​ជួន​ទៅ​នឹង​ការ​បោះឆ្នោត​ថ្នាក់​ជាតិ​នា​អាណត្តិ​ឆ្នាំ​២០២៣។

ក្រុម​អង្គការសង្គម​ស៊ីវិល​ទាំង​ទាំង​៩៥​បាន​ឲ្យ​ដឹង​ថា​ អ្នកទាំង​៦​នាក់​ ​រួម​មាន​លោក ​អាត់​ ធន់​ លោក​ ជា មុនី​ អ្នក​ស្រី​ យ៉ាង សោភ័ណ្ឌ​ លោក​ ប៉ាវ​ ស៊ីណា​ លោក​ រ៉ុង ឈុន​ និង​អ្នកស្រី​ ម៉ម​ ញឹម ​នឹង​ត្រូវ​បាន​គេ​ចាប់​ឃុំខ្លួន​ក្នុង​ពន្ធនាគារ​ ប្រសិន​បើ​អ្នក​ទាំង​៦​នាក់​នេះ​ ហ៊ាន​ធ្វើ​សកម្មភាព​តវ៉ា​ក្នុង​រយៈ​ពេល​៥​ឆ្នាំ​ខាង​មុខ។

ក្រុម​អង្គការ​សង្គម​ស៊ីវិល​ទាំង​៩៥​ដដែល​នោះ​បាន​សរសេរ​ក្នុង​សេចក្តីប្រកាស​របស់​ខ្លួន​ថា​៖

«ការ​ចោទ​ប្រកាន់​ និង​ការ​ព្យួរទោសប្រឆាំង​នឹង​មេដឹកនាំ​សហជីព​ សំខាន់ៗ​ ដូច​ជា​ត្រូវ​បាន​ប្រើប្រាស់​ ដោយ​រដ្ឋាភិបាល​ ទប់ស្កាត់​រាល់​ការ​ធ្វើ​ការ​តវ៉ា​របស់​សហជីព​ ក្នុង​រយៈពេល​៥​ឆ្នាំបន្ទាប់​ទៀត​។ នៅ​ក្នុង​រូបភាព​នេះការ​វិនិច្ឆ័យ​អាច​ត្រូវ​បាន​មើល​ឃើញ​ថា​ជា​សកម្មភាព​លេងសើច​របស់​រដ្ឋាភិបាល​កម្ពុជា​ដើម្បី​ផ្គាប់​ចិត្ត​សហគមន៍​អន្តរជាតិ​ ជាពិសេស​សហភាព​អឺរ៉ុប​ ដែល​បាន​ផ្តើម​ការពិនិត្យ​ឡើង​វិញ​លើ​ប្រព័ន្ធ​អនុគ្រោះ​ពន្ធ​ គ្រប់​មុខទំនិញ​ទាំង​អស់​លើកលែង​តែ​សព្វាវុធ​ ដោយ​ផ្អែក​លើ​ករណី​ដែល​រដ្ឋាភិបាល​មិន​អនុវត្ត​កាតព្វកិច្ច​សិទ្ធិមនុស្ស​ដែល​បាន​ចែង​ក្នុង​កិច្ចព្រម​ព្រៀង​»។

កាលពី​ថ្ងៃ​ទី​ ១១​ ខែ ធ្នូ​ សាលា​ដំបូង​រាជធានី​ភ្នំពេញ​មិន​ត្រឹមតែ​កាត់​ទោស​ ​ឲ្យ​ក្រុម​មេដឹកនាំ ​និង​អតីត​មេដឹកនាំ​សហជីព​៦​នាក់​នោះ​ឲ្យ​ជាប់​ពន្ធនាគារ​ ហើយ​ទោស​ត្រូវ​ព្យួរ​នោះ​ទេ​ តុលាការ​ក៏​បាន​តម្រូវ​ឲ្យ​ពួកគេ​បង់​ប្រាក់​ប្រមាណ​៣៥លានរៀល​ ​(ឬ​ប្រហែល​ជា​៨៦០០ដុល្លារ​អាមេរិក) ទៅ​ដល់​ជន​រង​គ្រោះ​ពីរ​នាក់​ដែល​ជាដើម​បណ្តឹង​រដ្ឋប្បវេណី​ផងដែរ៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG