សហមេធាវីការពារក្តីរបស់លោក កឹម សុខា បន្តលើកឡើងពីការមិនជឿនលឿនទៅមុខក្នុងការជំនុំជម្រះសំណុំរឿងរបស់អតីតមេដឹកនាំគណបក្សប្រឆាំងរូបនេះ ពាក់ព័ន្ធនឹងអំពើក្បត់ជាតិ បន្ទាប់ពីសវនាការត្រូវបានធ្វើឡើងចំនួន៣៨លើកមកហើយ។
ថ្លែងទៅកាន់ក្រុមអ្នកសារព័ត៌មាននៅបរិវេណខាងមុខសាលាដំបូងរាជធានីភ្នំពេញនាថ្ងៃពុធនេះ មេធាវីការពារក្តីឱ្យលោក កឹម សុខា លោកចាន់ ចេន និយាយថា ក្រុមប្រឹក្សាជំនុំជម្រះបានចោទសំណួរជាច្រើនមកលើកូនក្តីរបស់លោក ដែលភាគច្រើនជាសំណួរបច្ចេកទេសពាក់ព័ន្ធនឹងការបោះឆ្នោតកាលពីឆ្នាំ២០១៣។ លោកក៏បានចាត់ទុកថា សំណួរមួយចំនួនក្នុងចំណោមសំណួរដែលត្រូវបានចោទសួរដោយក្រុមប្រឹក្សាជំនុំជម្រះ នោះជាសំណួរ «ក្រៅអង្គហេតុ»ផងដែរ។
លោកនិយាយថា៖ «អ៊ីចឹង យើងខ្ញុំយល់ឃើញថា សំណួរដែលតាំងមកលើកូនក្តីយើងខ្ញុំទាំងលើកទី ៣៧ និងទាំងលើក ទី៣៨នេះ វាជាសំណួរមួយអត់ពាក់ព័ន្ធនឹងបទចោទ... ជាសំណួរមួយដែលធ្វើឱ្យរំកើស(រកៀស)ចិត្ត រំខានចិត្ត ក៏ដូចជា សម្ពាធមកលើកូនក្តីយើងខ្ញុំ»។
អតីតមេដឹកនាំគណបក្សសង្គ្រោះជាតិ លោក កឹម សុខា កំពុងរងការចោទប្រកាន់ពីបទសន្ទិដ្ឋិភាពជាមួយបរទេស ឬតាមអ្វីដែលគេហៅម្យ៉ាងទៀតថា ការរៀបគម្រោងផ្តួលរំលំរដ្ឋាភិបាលទីក្រុងភ្នំពេញរបស់លោកនាយករដ្ឋមន្ត្រីហ៊ុន សែនដោយមានសហរដ្ឋអាមេរិកនៅពីក្រោយ។ បទចោទនេះ គឺស្មើនឹងអំពើក្បត់ជាតិ។ យ៉ាងណាក្តី កន្លងមកនេះ ទាំងលោកកឹម សុខានិងសហរដ្ឋអាមេរិកបានច្រានចោលការចោទប្រកាន់ដ៏ចម្រូងចម្រាសនេះ។
ក្រោយសវនាការលើកទី៣៧ ដែលធ្វើឡើងកាលពីសប្តាហ៍មុននោះ សហមេធាវីរបស់លោកកឹម សុខាមួយរូបទៀតគឺលោកអាង ឧត្តមបានអះអាងថា មានប្រទេសជាច្រើនក្រៅពីសហរដ្ឋអាមេរិក អាចនឹងត្រូវបានអញ្ជើញដោយក្រុមសហមេធាវីដើម្បីធ្វើជាសាក្សីជួយតុលាការស្វែងរកការណ៍ពិតនៅពីក្រោយសំណុំរឿងលោកកឹម សុខា ដែលអូសបន្លាយពេលមកជិត៥ឆ្នាំ។
សហមេធាវីលោក ចាន់ ចេន បានឱ្យដឹងនៅថ្ងៃពុធនេះថា ក្រុមសហមេធាវីការពារក្តីកំពុងតែរៀបចំឯកសារ ធាតុចូល និងករណីពាក់ព័ន្ធផ្សេងៗមុនពេលធ្វើការដាក់ស្នើទៅកាន់តុលាការដើម្បីអញ្ជើញសាក្សី។
ប្រធានសមាគមការពារសិទ្ធិមនុស្សអាដហុកលោក នី សុខា ដែលបានចូលរួមក្នុងសវនាការលើកទី៣៨របស់លោកកឹម សុខា ប្រាប់វីអូអេថា មានការសួរដេញដោលពីចៅក្រមនៃក្រុមប្រឹក្សាជំនុំជម្រះ ទៅកាន់លោកកឹម សុខា ដែលសំណួរភាគច្រើនពាក់ព័ន្ធនឹងបញ្ហាបច្ចេកទេសនៃការបោះឆ្នោតកាលពីឆ្នាំ ២០១៣ ដូចជា ការដាក់ពង្រាយអ្នកសង្កេតការណ៍របស់គណបក្សសង្រ្គោះជាតិ និងករណីពាក់ព័ន្ធនឹងភាពមិនប្រក្រតីផ្សេងៗអំឡុងពេលការបោះឆ្នោតជាដើម។
លោក នី សុខា យល់ថា សំណួរបែបបច្ចេកទេសដូចនេះអាចបង្កការលំបាកសម្រាប់លោក កឹម សុខា តែម្នាក់ឯង ក្នុងការឆ្លើយតបឱ្យបានត្រឹមត្រូវ និងគ្រប់ជ្រុងជ្រោយ។
លោកបានថ្លែងថា៖ «ការសួរដេញដោលលើសំណួរទាំងអស់ហ្នឹង យើងឃើញថា ហាក់បីដូចជាមានការចំណាយពេលវេលាច្រើនចំពោះសំណួរហ្នឹង។ ហើយជាសំណួរមួយ យើងនិយាយថា វាមិនពាក់ព័ន្ធ ក៏យើងមិនអាចថាបានដែរ ប៉ុន្តែគ្រាន់ជាសំណួរដែលមានលក្ខណៈបច្ចេកទេសពេក ដែលវាលម្អិតក្នុងបច្ចេកទេសនៃការបោះឆ្នោត។ ដូច្នេះ ប្រហែលមានការលំបាកក្នុងការឆ្លើយរបស់លោកកឹម សុខាក្នុងនាមជាប្រធានគណបក្ស»។
លោកបានបន្តថា ក្រៅពីការចោទសួររបស់ចៅក្រម ភាគីអយ្យការអមសាលាដំបូងរាជធានីភ្នំពេញ និងមេធាវីតំណាងរដ្ឋាភិបាលមិនមានការចោទសួរមកលើលោកកឹម សុខាក្នុងករណីនេះនោះទេ។
បើតាមលោក នី សុខា សវនាការរបស់អតីតប្រធានគណបក្សសង្គ្រោះជាតិលោកកឹម សុខានេះមិនងាយនឹងត្រូវបានបញ្ចប់ឆាប់ៗនោះទេ ដោយសារតែសកម្មភាពជាច្រើនរបស់លោកកឹម សុខាកន្លងមកត្រូវបានយកមកធ្វើជាបន្ទុកចោទប្រកាន់មកលើរូបលោក។ លោកបន្ថែមថា សវនាការនេះគឺ អាចជាប់ពាក់ព័ន្ធនឹងរឿងនយោបាយ និងអាចឈានទៅរកការបញ្ចប់ ប្រសិនបើមានដំណោះស្រាយណាមួយមកលើស្ថានភាពជាប់គាំងនៃនយោបាយក្នុងប្រទេស។
ក្រោយសវនាការលើកទី៣៨នេះ តុលាការរាជធានីភ្នំពេញគ្រោងនឹងបើកសវនាការបន្ទាប់នៅថ្ងៃទី៤ ខែឧសភាខាងមុខ។ ប៉ុន្តែបើតាមសហមេធាវីការពារក្តីលោកចាន់ ចេន មេធាវីខាងដើមបណ្តឹងរដ្ឋប្បវេណី ឬមេធាវីតំណាងឱ្យរដ្ឋាភិបាល គ្រោងស្នើសុំតុលាការលើកសវនាការទៅអំឡុងពេលចុងសប្តាហ៍ខាងមុខវិញ ក្រោមហេតុផលថា ជាប់ធុរកិច្ចផ្ទាល់ខ្លួន។
វីអូអេព្យាយាមសុំការអត្ថាធិប្បាយពីលោកអ៊ី រិន្ទ អ្នកនាំពាក្យសាលាដំបូងរាជធានីភ្នំពេញ តែលោកមិនឆ្លើយតបសំណួរដែលផ្ញើតាមប្រព័ន្ធទំនាក់ទំនងតេឡេក្រាមនោះទេ។
គួរបញ្ជាក់ផងដែរ នៅក្នុងសវនាការមុនៗ ក្រុមប្រឹក្សាជំនុំជម្រះ បានដាក់បង្ហាញភស្តុតាងជាច្រើន។ ភស្តុតាងទាំងនោះ រួមមានឃ្លីបវីដេអូ រូបថត ឯកសារ ព័ត៌មានជាវីដេអូរបស់ប្រព័ន្ធផ្សព្វផ្សាយ ដែលភស្តុតាងទាំងនោះ មានខ្លះបង្ហាញពីសកម្មភាពនៃការចាប់ផ្តើមរៀបចំបង្កើតគណបក្សសង្គ្រោះជាតិកាលពីឆ្នាំ២០១២ សកម្មភាពដឹកនាំបាតុកម្មរបស់លោកកឹម សុខានិងសហស្ថាបនិកគណបក្សសង្គ្រោះជាតិមួយរូបទៀតគឺលោកសម រង្ស៊ីក្រោយការបោះឆ្នោតជាតិឆ្នាំ២០១៣ និងរបាយការណ៍ពាក់ព័ន្ធនឹងភាពមិនប្រក្រតីនៃបញ្ជីឈ្មោះអ្នកបោះឆ្នោតសម្រាប់ការបោះឆ្នោតជាតិឆ្នាំ២០១៣។
ប៉ុន្តែភស្តុតាងសំខាន់មួយដែលតំណាងអយ្យការយកមកចោទប្រកាន់លោកកឹម សុខា គឺការថ្លែងសារនយោបាយរបស់លោកនៅប្រទេសអូស្ត្រាលី កាលពីខែវិច្ឆិកា ឆ្នាំ២០១៣ អំពីការទទួលបានយុទ្ធសាស្ត្រនយោបាយពីសំណាក់សាស្ត្រាចារ្យនៅប្រទេសលោកសេរី ដើម្បីធ្វើឱ្យមានការផ្លាស់ប្តូរក្បាលម៉ាស៊ីនដឹកនាំរដ្ឋាភិបាលកម្ពុជា។ នេះជាភស្តុតាងមួយដែលត្រូវបានតុលាការកំពូលប្រើប្រាស់ផងដែរ ដើម្បីរំលាយគណបក្សសង្រ្គោះជាតិ កាលពីខែវិច្ឆិកា ឆ្នាំ២០១៧៕
