ភ្ជាប់​ទៅ​គេហទំព័រ​ទាក់ទង

តំណាង​រាស្ត្រ​បក្ស​ជំទាស់​ស្នើ​ឱ្យ​ព្រះ​មហាក្សត្រ​ ​«ព្រះ​តម្រិះ»​ ​មុន​ឡាយ​ព្រះហស្ថ​លេខា​លើ​​វិសោធនកម្ម​ច្បាប់​ស្តី​ពី​គណបក្ស​នយោបាយ​ដ៏​ចម្រូងចម្រាស

  • នៅ វណ្ណារិន

រូបឯកសារ៖ ព្រះ​មហាក្សត្រ​ខ្មែរ​ព្រះ​បាទ​នរោត្តម​ ​សីហមុនី​។

«ជា​ពិ​សេស​សេចក្តី​ស្នើ​ច្បាប់​នេះ​មាន​ ចរិត​នយោបាយ​គាបសង្កត់​ទៅ​លើ​សិទ្ធិ​បុគ្គល​ ​បំបែក​បំបាក់​ជាតិ​ ​និង​គាប​សង្កត់​មក​លើ​គណបក្ស​នយោបាយ​ក្នុង​ន័យ​កម្ចាត់កម្ចាយ​ខ្មែរ​គ្នាឯង​ ​និង​គាប​សង្កត់​គូ​ប្រជែង​នយោបាយ​តែ​ប៉ុណ្ណោះ​ ​ហើយ​អាច​បណ្តាល​ឱ្យ​ការ​បោះឆ្នោត​នា​ពេល​ខាង​មុខ​មិន​សេរី​ ​ត្រឹមត្រូវ​ ​និង​យុត្តិធម៌»។​

ក្រុម​តំណាងរាស្ត្រគណបក្ស​សង្គ្រោះ​ជាតិ​ ​សំខាន់ៗ​ ​បាន​សរសេរ​ញ្ញត្តិ​ថ្វាយ​ព្រះ​មហាក្សត្រ​ខ្មែរ​ព្រះ​បាទ​នរោត្តម​ ​សីហមុនី​ «ព្រះ​តម្រិះ»​ ​ចំពោះ​ការ​ឡាយ​ព្រះហស្ថលេខា​ ​លើវិសោធនកម្ម​ច្បាប់​ស្តីពី​គណបក្ស​នយោបាយ​ ​ដែល​ពួក​គេ​អះអាង​ថា ​អាច​គំរាម​ដល់​លទ្ធិ​ប្រជាធិបតេយ្យ​ និង​ការ​បោះឆ្នោត​ដោយ​សេរី​ និង​យុត្តិធម៌​ក្នុង​ប្រទេស​កម្ពុជា​នា​ពេល​ខាង។​ ​នេះ​បើ​តាម​លិខិត​របស់​ក្រុម​តំណាង​រាស្ត្រ​គណបក្ស​ជំទាស់​ដែល​ ​VOA​ ​បាន​ទទួល​នា​ថ្ងៃ​ព្រហស្បតិ៍។​

​កាល​ពី​ថ្ងៃ​អង្គារ​កន្លង​ទៅ​ ​ព្រឹទ្ធសភា​ដែល​មាន​តែ​សមាជិក​មក​ពី​បក្ស​កាន់​អំណាច​ បាន​អនុម័ត​ វិសោធនកម្ម​លើក​ទី២​នៃ​ច្បាប់​ស្តី​ពី​គណបក្ស​នយោបាយ​ ដ៏​ចម្រូង​ចម្រាស ​ក្រោយ​ពី​រដ្ឋសភា​អនុម័ត​យ៉ាង​តក់ក្រហល់។​ ការ​អនុម័ត​ វិសោធនកម្ម​ច្បាប់​ស្តី​ពី​គណបក្ស​នយោបាយ​ ​ត្រូវ​បាន​ធ្វើ​ឡើង​ដោយ​រលូន​ទាំង​ក្នុង​ស្ថាប័ន​រដ្ឋសភា​និង​ព្រឹទ្ធសភា​ ​បើ​ទោះ​ជា​មាន​ពហិការ​ពី​គណបក្ស​ជំទាស់​ក៏​ដោយ។​ ​វិសោធនកម្ម​ច្បាប់​ស្តី​ពី​គណបក្ស​នយោបាយ​នឹង​ត្រូវ​បញ្ជូន​ថ្វាយ​ព្រះមហាក្សត្រ​ដើម្បី​ឡាយ​ព្រះ​ហស្ថលេខា​មុន​ពេល​ចូល​ជា​ធរមាន។​

​ក្នុង​ញ្ញត្តិ​ដែល​ចុះហត្ថ​លេខា​កាល​ពី​ថ្ងៃ​ពុធ​ ហើយ​ផ្សព្វផ្សាយ​នា​ថ្ងៃ​ព្រហស្បតិ៍​នេះ​ តំណាងរាស្ត្រ​សំខាន់ៗ​ចំនួន​២៩រូប​របស់គណបក្សសង្គ្រោះជាតិ​ បាន​ទូល​ថ្វាយ​ព្រះ​មហាក្សត្រថា វិសោធន​កម្ម​ច្បាប់​ស្តី​ពី​គណបក្ស​នយោបាយ​ ​ត្រូវ​បាន​បង្កើត​ឡើង​ «មិន​ស្រប​គោល​ការណ៍​នីតិរដ្ឋ​ ហើយ​ផ្ទុយពី​គោល​ការណ៍​ប្រជាធិបតេយ្យ​ ​សេរី​ពហុបក្ស»។​ ​តំណាង​រាស្ត្រ​គណបក្ស​ជំទាស់​ក៏​បាន​បន្ត​ថា​ វិសោធនកម្ម​នេះ​ក៏ផ្ទុយ​ពី​ព្រះរាជ​បំណង​របស់​ ព្រះ​បរម​រតនកោដ្ឋ​ ​នរោត្តម សីហនុ​ ​ផង​ដែរ​ ​ដែល​ចង់​ឱ្យ​ខ្មែរ​រួប​រួម​គ្នា​ ដោះស្រាយ​បញ្ហា​រវាង​ខ្មែរ​និង​ខ្មែរ។

ក្នុង​ញ្ញត្តិ​ដែល​មាន​បួន​ទំព័រ​ តំណាង​រាស្ត្រ​គណបក្ស​សង្គ្រោះជាតិ​បាន​សរសេរ​ក្នុង​ន័យ​ដើម​ថា៖​

«ជា​ពិ​សេស​សេចក្តី​ស្នើ​ច្បាប់​នេះ​មាន​ ចរិត​នយោបាយ​គាបសង្កត់​ទៅ​លើ​សិទ្ធិ​បុគ្គល​ ​បំបែក​បំបាក់​ជាតិ​ ​និង​គាប​សង្កត់​មក​លើ​គណបក្ស​នយោបាយ​ក្នុង​ន័យ​កម្ចាត់កម្ចាយ​ខ្មែរ​គ្នាឯង​ ​និង​គាប​សង្កត់​គូ​ប្រជែង​នយោបាយ​តែ​ប៉ុណ្ណោះ​ ​ហើយ​អាច​បណ្តាល​ឱ្យ​ការ​បោះឆ្នោត​នា​ពេល​ខាង​មុខ​មិន​សេរី​ ​ត្រឹមត្រូវ​ ​និង​យុត្តិធម៌»។​

​វិសោធនកម្ម​ច្បាប់​ស្តី​ពី​គណបក្ស​នយោបាយ​នេះ​ ​បាន​កំណត់​ថា​ ​គ្រប់​គណបក្ស​នយោបាយ​ទាំង​អស់​នឹង​ត្រូវ​រំលាយ​ចោល​ ​ប្រសិន​បើ​មាន​ទំនាក់​ទំនង​ជា​មួយ​បុគ្គល​ដែល​ជាប់​ពាក់ព័ន្ធ​នឹង​បទ​ល្មើស​មជ្ឈិម​ ឬ​បទ​ឧក្រិដ្ឋ​ណា​មួយ។

ការ​បង្កើត​និង​ការ​អនុម័ត​សេចក្តី​ស្នើ​វិសោធន​កម្ម​ច្បាប់​ស្តី​ពី​គណបក្ស​នយោបាយ​ទំាង​ពីរ​លើក​យ៉ាង​តក់ក្រហល់​ ​ដូច​នេះ​ ​ត្រូវ​បាន​គេ​មើល​ឃើញ​ថា​ ​ជា​ចេតនា​ផ្តាច់​លោក​ ​សម រង្ស៊ី​ ​ចេញ​ពី​នយោបាយ​កម្ពុជា​ និង​គណបក្ស​សង្គ្រោះ​ជាតិ ​ដែល​កំពុង​និរទេស​ខ្លួន​នៅ​ប្រទេស​បារាំង​ដើម្បី​គេច​ចេញ​ពី​ការ​ដាក់​ទោស​ដោយ​តុលាការ​កម្ពុជា​ក្នុង​សំណុំ​រឿង​ជា​ច្រើន។​ ខណៈ​កំពុង​រស់​នៅ​ប្រទេស​បារាំង​ ​លោក​ ​សម រង្ស៊ី​តែង​បង្ហោះ​សារ​ជា​សំណេរ​ ​ជា​រូបភាព​ ​និង​ជា​វីដេអូ​ ​រិះគន់​រដ្ឋាភិបាល​របស់​លោក​ ​ហ៊ុន សែន​ ​ព្រមទាំង​ឃោសនា​ឲ្យ​ប្រជាពលរដ្ឋ​បោះឆ្នោត​ឲ្យ​គណ​បក្ស​សង្គ្រោះ​ជាតិ​ជា​ដើម​ ​ធ្វើ​ឱ្យ​មាន​ការ​មិន​ពេញ​ចិត្ត​ពី​សំណាក់​លោក​ ហ៊ុន សែន​ និង​អ្នក​គាំទ្រ​មួយ​ចំនួន​របស់​គណបក្ស​កាន់​អំណាច។

យ៉ាង​ណា​ក៏​ដោយ​ ​តំណាង ​និង​តំណាង​រាស្ត្រ​នៃ​គណបក្ស​កាន់​អំណាច​របស់​លោក​ ​ហ៊ុន សែន​ ​ធ្លាប់​បាន​អះអាង​កន្លង​មក​ថា​សេចក្តី​ស្នើ​វិសោធនកម្ម​ច្បាប់ស្តីពី​គណបក្ស​នយោបាយ​នេះ​គឺ​ធ្វើ​ឡើង​ស្រប​តាម​លទ្ធិ​ប្រជាធិបតេយ្យ​ ​សេរី​ពហុបក្ស​ និង​ស្រប​តាម​រដ្ឋ​ធម្មនុញ្ញ៕​

XS
SM
MD
LG