គណបក្សសង្គ្រោះជាតិបានដាក់ឱសានវាទរយៈពេលមួយថ្ងៃគឺនៅថ្ងៃច័ន្ទ នេះ ដើម្បីទុកពេលឲ្យអ្នកស្រីឡាក់ សុភាព សមាជិកគណៈកម្មាធិការនាយករបស់គណបក្សធ្វើការកែតម្រូវជាសារធារណៈចំពោះអ្វីដែលអ្នកស្រីបានចោទប្រកាន់ថា លោកសម រង្ស៊ី ប្រធានគណបក្សបានទទួលលុយចំនួន៤០លានដុល្លារពីគណបក្សប្រជាជនកម្ពុជា ដើម្បីជាថ្នូរនឹងការឈានទៅរកការបញ្ចប់វិបត្តិនយោបាយ។
ការចោទប្រកាន់របស់អ្នកស្រីឡាក់ សុភាពទៅលើថ្នាក់ដឹកនាំគណបក្សសង្គ្រោះជាតិត្រូវបានកាសែតក្នុងស្រុកជាភាសាខ្មែរ និងភាសាអង់គ្លេសបានបោះពុម្ពផ្សាយជាបន្តបន្ទាប់។
គណៈកម្មការវិន័យរបស់គណបក្សសង្គ្រោះជាតិ បន្ទាប់ពីបានឃើញការចុះផ្សាយក្នុងទំព័រសារព័ត៌មាន បានកោះហៅអ្នកស្រីឡាក់ សុភាពមកសាកសួរអស់រយៈពេលជាច្រើនម៉ោង។
លោកអ៊ូ ច័ន្ទរិទ្ធ ប្រធានគណៈកម្មការវិន័យគណបក្សសង្គ្រោះជាតិមានប្រសាសន៍ថា គណបក្សបានទុករយៈពេលមួយថ្ងៃគឺនៅថ្ងៃច័ន្ទនេះឲ្យអ្នកស្រីឡាក់ សុភាពធ្វើការកែតម្រូវចំពោះអ្វីដែលអ្នកស្រីមានប្រសាសន៍តាមរយៈសារព័ត៌មាន ដោយចោទប្រកាន់ដោយគ្មានភស្តុតាងមកលើថ្នាក់ដឹកនាំគណបក្សសង្គ្រោះជាតិអំពីបញ្ហាពុករលួយ។
លោកនិយាយថា៖«បើគាត់មិនឆ្លើយតបជាមួយហ្នឹងព័ត៌មានថា ការលើកឡើងរបស់គាត់មិនបាននិយាយអញ្ចឹងទេ ហើយបើគាត់មិនព្រមទទួលថាគាត់និយាយខុស គណបក្សនឹងចាត់វិធានការទៅតាមនីតិវិធីនិងលក្ខន្តិកៈនិងបទបញ្ជាផ្ទៃក្នុងរបស់គណបក្ស»។
កាលពីចុងសប្តាហ៍មុន កាសែតក្នុងស្រុក និងកាសែតជាភាសារអង់គ្លេសដែលបានបោះពុម្ពផ្សាយនៅថ្ងៃច័ន្ទនេះ ដោយបានស្រង់សម្តីអ្នកស្រីឡាក់ សុភាពមកចុះផ្សាយថា លោកសម រង្ស៊ីបានទទួលប្រាក់ពីគណបក្សប្រជាជនកម្ពុជាចំនួន៤០លានដុល្លារសហរដ្ឋអាមេរិក។ អ្នកស្រីនិយាយដូច្នេះក្នុងឱកាសដែលលោកស្រីបានចូលរួមកិច្ចប្រជុំបណ្តាញសង្គម។
អ្នកស្រីឡាក់ សុភាព សមាជិកគណៈកម្មាធិការនាយកគណបក្សសង្គ្រោះជាតិ មានប្រសាសន៍ប្រាប់វីអូអេថា អ្នកស្រីមិនបានលើកឡើងទេ។
អ្នកស្រីឡាក់ សុភាព មានប្រសាសន៍ថា អ្វីដែលលោកស្រីមានប្រសាសន៍ប្រាប់អ្នកសារព័ត៌មានពេលនោះគឺលោកស្រីគ្រាន់តែស្រង់សម្តីលោកកឹម សុខា អនុប្រធានគណបក្សសង្គ្រោះជាតិ ដែលបានប្រជុំផ្ទៃក្នុងគណបក្សកាលពីថ្ងៃទី៥ខែធ្នូថា លោកសម រង្ស៊ីបានទទួលលុយពីគណបក្សប្រជាជនចំនួន៤០លានដុល្លារ នៅសល់២០លានដុល្លារទៀត មិនទាន់បានឲ្យគ្រប់ទេ។
លោកស្រីបានបញ្ជាក់ថា ពាក្យសម្តីនេះលោកស្រីផ្ទាល់មិនបាននិយាយទេគឺគ្រាន់តែអះអាងតាមលោកកឹម សុខាតែប៉ុណ្ណោះ។ ចំពោះការព្រមានរបស់គណបក្ស លោកស្រីមិនខ្លាចពីការបណ្តេញចេញពីសមាជិកគណៈកម្មាធិការនាយករបស់គណបក្សទេ។
លោកស្រីបញ្ជាក់ថា៖ «ឯកឧត្តមកឹម សុខា គាត់លើកឡើងនៅក្នុងអង្គប្រជុំគណៈកម្មាធិការនាយកកាលពីថ្ងៃទី៥។ ខ្ញុំអត់បានដឹងរឿងអ្វីទាំងអស់ បែរជាបាញ់រឿង បង្វែរមកខ្ញុំថា ខ្ញុំអ្នកនិយាយថា លោកសម រង្ស៊ីហ្នឹងទៅយកលុយ៤០លានបាន២០លាននៅ២០លានទៀត។ នេះហាក់បីដូចជាពាក្យស្លោកមួយគេនិយាយថា ស្វាស៊ីបាយ ហើយលាបមាត់ពពែ»។
លោកកែម ឡី អ្នកស្រាវជ្រាវសង្គមជាអ្នករៀបចំកិច្ចប្រជុំបណ្តាញសង្គមកាលពីចុងសប្តាហ៍មុន បានបញ្ជាក់ថា លោកស្រីឡាក់ សុភាពពិតបានចូលរួមកិច្ចប្រជុំនោះមែន។ ក៏ប៉ុន្តែលោកមិនបានដឹងថា លោកស្រីបាននិយាយចោទប្រកាន់មកលើថ្នាក់ដឹកនាំគណបក្សសង្គ្រោះជាតិទេ។
លោកនិយាយថា៖ «ខ្ញុំអត់បានឮ ខ្ញុំអត់បានដឹងថា គាត់វិភាគ សម្ភាសជាមួយអ្នកកាសែតពេលណាផង។ ខ្ញុំអត់បានឮ ស្រាប់តែឃើញចេញមក។ ខ្ញុំឃើញអញ្ចឹង»។
វីអូអេបានព្យាយាមទាក់ទងសុំការបំភ្លឺពីលោកកឹម សុខា អនុប្រធានគណបក្ស និងលោកសម រង្ស៊ី ប្រធានគណបក្ស តែមិនអាចទាក់ទងបានទេដោយមន្ត្រីគណបក្សបាននិយាយថា លោកកំពុងជាប់បំពេញបេសកកម្មនៅឯក្រៅប្រទេស៕
