អ្នកតំណាងមកពីបណ្ដាប្រទេសនានាជិត២០០ប្រទេសនឹងចាប់ផ្ដើមកិច្ចប្រជុំប្រចាំឆ្នាំស្ដីពីការប្រែប្រួលអាកាសធាតុនៅក្នុងទីក្រុង Madrid ប្រទេសអេស៉្បាញនៅថ្ងៃចន្ទនេះ។ កិច្ចប្រជុំនេះធ្វើឡើងស្របពេលដែលមានភស្តុតាងនានាបង្ហាញពីវិបត្តិអាកាសធាតុដែលកាន់តែធ្ងន់ធ្ងរ ហើយសហរដ្ឋអាមេរិកក៏ដកខ្លួនចេញពីកិច្ចព្រមព្រៀងស្ដីពីការប្រែបម្រួលអាកាសធាតុសកលលោកផងដែរ។
របាយការណ៍ចំនួនពីររបស់អង្គការសហប្រជាជាតិដែលបង្ហាញពីលទ្ធផលមិនល្អមួយចំនួនទាក់ទិននឹងអាកាសធាតុ ត្រូវបានចេញផ្សាយកាលពីពេលថ្មីៗនេះ។ របាយការណ៍ទាំងពីរនោះបានសង្កត់ធ្ងន់ទៅលើទំហំនិងផលប៉ះពាល់ទៅលើជីវិតនៅលើផែនដីនេះ ដោយសារតែការណ៍ដែលមិនបានចាត់វិធានការឲ្យបានគ្រប់គ្រាន់ទៅលើការប្រែប្រួលអាកាសធាតុ។
លោក Simon Buckle នាយកផ្នែកប្រែប្រួលអាកាសធាតុនៃអង្គការសហប្រតិបត្តិការសេដ្ឋកិច្ចនិងការអភិវឌ្ឍន៍ដែលមានមូលដ្ឋាននៅទីក្រុងប៉ារីស បានថ្លែងថា៖ «ការប្រែប្រួលអាកាសធាតុកំពុងតែផ្ដល់ផលប៉ះពាល់ដែលគេមិនធ្លាប់ស្រមៃថាអាចកើតមានពីមុនមក។ គេប្រហែលជាគិតថា ផលប៉ះពាល់ពីការប្រែប្រួលអាកាសធាតុអាចនឹងកើតឡើងនៅពេលអនាគតដ៏វែងឆ្ងាយខាងមុខទៀត ប៉ុន្តែតាមពិតវាកំពុងតែកើតឡើងហើយក្នុងពេលឥឡូវនេះ»។
កិច្ចប្រជុំស្ដីពីការប្រែប្រួលអាកាសធាតុ ដែលហៅកាត់ថា COP 25 នេះ មានគោលបំណងសម្រេចចុងក្រោយទៅលើបទបញ្ញត្តិសម្រាប់អនុវត្តកិច្ចព្រមព្រៀងស្ដីពីការប្រែប្រួលអាកាសធាតុទីក្រុងប៉ារីសឆ្នាំ២០១៥។
អ្នកបរិស្ថានសង្ឃឹមថា កិច្ចប្រជុំនេះនឹងត្រួសត្រាយផ្លូវឲ្យបណ្ដាប្រទេសនានាបង្កើនការប្ដេជ្ញាកាត់បន្ថយការបញ្ចេញឧស្ម័នផ្ទះកញ្ចក់ នៅក្នុងសន្និសីទឆ្នាំក្រោយនៅទីក្រុង Glasgow ប្រទេសស្កុតលែន៕
