ការចរចារកដំណោះស្រាយដោយមានភាគីពាក់ព័ន្ធចូលរួមបានបញ្ចប់ការធ្វើកូដកម្មរបស់កម្មករប្រមូលសំរាមចាប់ពីរសៀលថ្ងៃពុធនេះ។
កម្មករជាង២ពាន់នាក់បានធ្វើកូដកម្មមិនប្រមូលសំរាមតាំងពីថ្ងៃទី២ ខែតុលា ដែលនាំឲ្យមានវិបត្តិសំរាមនៅរាជធានីភ្នំពេញ ចាប់តាំងពីសប្តាហ៍មុន។
ក្នុងកំណត់ហេតុដំណោះស្រាយមួយដែលសម្រេចនៅថ្ងៃពុធនេះ ភាគីពាក់ព័ន្ធមានទាំងអភិបាលរាជធានីភ្នំពេញ តំណាងក្រុមហ៊ុនស៊ីនទ្រី ក្រសួងបរិស្ថាន និងសហជីពតំណាងកម្មករបានឯកភាពគ្នាលើចំណុចចំនួន៣។ ចំណុចទីមួយគឺក្រុមហ៊ុនស៊ីនទ្រីសន្យាថា នឹងដោះស្រាយតាមច្បាប់ស្តីពីការងារ ប្រសិនបើមានកម្មករបញ្ចប់កិច្ចសន្យាការងារ ហើយរដ្ឋបាលរាជធានីភ្នំពេញជា«អ្នកធានាខុសត្រូវ»។
ទីពីរ ចំពោះការងាររបស់កម្មករប្រមូលសំរាមនៅថ្ងៃខាងមុខ រដ្ឋបាលរាជធានីភ្នំពេញក៏«ធានាមិនឲ្យបាត់បង់ឡើយ» ទោះបីក្រុមហ៊ុនប្រមូលសំរាមស៊ីនទ្រីមិនឈ្នះការដេញថ្លៃប្រមូលសំរាមដែលនឹងធ្វើឡើងនៅថ្ងៃទី១៦ ខែតុលាខាងមុខ។
ហើយចំណុចទី៣ កម្មករប្រមូលសំរាមសម្រេចចូលធ្វើការងារធម្មតាវិញ ចាប់ពីរសៀលថ្ងៃទី៧ ខែតុលា ឆ្នាំ២០២០នេះ។
ការតវ៉ារបស់កម្មករប្រមូលសំរាមក្រុមហ៊ុនស៊ីនទ្រីពាក់ព័ន្ធនឹងភាពមិនច្បាស់លាស់នៃការធ្វើអន្តរកាលដោះដូររចនាសម្ព័ន្ធក្រុមហ៊ុនប្រមូលសំរាមក្នុងរាជធានី។ ក្រុមកម្មករដែលធ្វើកូដកម្មមានការបារម្ភថា ក្រោយការដេញថ្លៃរើសក្រុមហ៊ុនថ្មីមកប្រមូលសំរាម នៅថ្ងៃទី១៦ ខែតុលាខាងមុខនេះ ពួកគេនឹងត្រូវរាប់បញ្ចូលជាបុគ្គលិកថ្មី និងមិនបានប្រាក់អត្ថប្រយោជន៍នានា ដូចយ៉ាងប្រាក់អតីតភាពការងារជាដើម។
ដោយសារកម្មករប្រមូលសំរាមធ្វើកូដកម្ម អាជ្ញាធររាជធានីបានបញ្ជូនកម្លាំងសន្ដិសុខរបស់ខ្លួនចេញទៅប្រមូលសំរាមប៉ុន្មានថ្ងៃនេះ និងបានប្រកាសរើសអ្នកប្រមូលសំរាមថ្មីផងដែរ។
គួរបញ្ជាក់ថា កាលពីខែតុលា ឆ្នាំ២០១៩ លោកនាយករដ្ឋមន្ត្រីហ៊ុន សែនបានបញ្ជាឲ្យយកក្រុមហ៊ុនស៊ីនទ្រីដែលផ្តល់សេវាប្រមូលសំណល់រឹងក្នុងរាជធានីភ្នំពេញអស់២០ឆ្នាំមកហើយនោះ មកនៅក្រោមការគ្រប់គ្រងបណ្ដោះអាសន្នរបស់រដ្ឋ ក្រោមហេតុផលថា ក្រុមហ៊ុននេះផ្ដល់សេវាប្រមូលសំរាមមិនបានល្អ៕
