ក្រសួងការបរទេសចិនបាននិយាយនៅថ្ងៃព្រហស្បតិ៍នេះថាមន្ត្រីជាន់ខ្ពស់ម្នាក់នៃផ្នែកកិច្ចការគ្រប់គ្រងអាវុធរបស់ខ្លួននឹងដឹកនាំគណៈប្រតិភូមួយក្នុងកិច្ចចរចានុយក្លេអ៊ែររវាងចិននិងសហរដ្ឋអាមេរិក។
ក្រសួងនេះមិនបានប្រាប់ឈ្មោះមន្ត្រីនេះទេ។
អ្នកនាំពាក្យ Wang Wenbin បាននិយាយនៅពេលត្រូវសួរអំពីរបាយការណ៍មួយថាចិនបានយល់ព្រមធ្វើការចរចាជាមួយសហរដ្ឋអាមេរិកអំពីការគ្រប់គ្រងអាវុធថា៖«នៅសប្តាហ៍ក្រោយនៅក្នុងរដ្ឋធានីវ៉ាស៊ីនតោន ចិននិងអាមេរិកនឹងធ្វើការពិគ្រោះគ្នានៅកម្រិតអគ្គនាយកអំពីការគ្រប់គ្រងអាវុធនិងការមិនរីកសាយអាវុធនុយក្លេអ៊ែរ»។
លោក Wang បាននិយាយថាបើតាមផែនការយល់ព្រមដោយភាគីទាំងពីរ ចិននិងសហរដ្ឋអាមេរិកនឹងធ្វើការសន្ទនាគ្នានិងប្តូរយោបល់គ្នាអំពីបញ្ហាមួយចំនួនធំដូចជាការអនុវត្តសន្ធិសញ្ញាគ្រប់គ្រងអាវុធអន្តរជាតិជាដើម។
កិច្ចចរចានេះមានឡើងតែប៉ុន្មានថ្ងៃក្រោយលោករដ្ឋមន្ត្រីការបរទេស Wang Yi បានជួបជាមួយមន្ត្រីជាន់ខ្ពស់សហរដ្ឋអាមេរិក ហើយភាគីទាំងពីរបានយល់ព្រមធ្វើការពិគ្រោះយោបល់គ្នាក្នុងអនាគតឆាប់ៗនេះ។
នៅក្នុងព្រឹត្តិការណ៍ដាច់ដោយឡែកមួយទៀត កងនាវាចម្បាំងសហរដ្ឋអាមេរិកទី៧បាននិយាយនៅក្នុងសេចក្តីថ្លែងការណ៍មួយថានាវាពិឃាតអាមេរិកាំងឈ្មោះ USS Rafael Peralta និងនាវាពិឃាតមួយគ្រឿងនៃកងទ័ពជើងទឹកកាណាដាឈ្មោះHMCS Ottawa បានបើកកាត់ច្រកសមុទ្រតៃវ៉ាន់កាលពីថ្ងៃពុធ។
ក្រសួងការពារជាតិតៃវ៉ាន់បានថ្លែងថានាវាចម្បាំងទាំងពីរគ្រឿងនេះបានបើកកាត់ច្រកសមុទ្រតៃវ៉ាន់ទៅទិសខាងជើងកាលពីយប់ថ្ងៃពុធ ដោយបាននិយាយបន្ថែមថាខ្លួនបានឃ្លាំមើលចលនាកប៉ាល់ចម្បាំងទាំងនេះហើយថាស្ថានការណ៍មាន«ភាពធម្មតា»។
បញ្ជាការដ្ឋានសឹកផ្នែកខាងកើតប្រទេសនៃកងទ័ពរបស់ប្រជាជនចិនបាននិយាយនៅក្នុងសេចក្តីថ្លែងការណ៍មួយនៅថ្ងៃព្រហស្បតិ៍នេះថាចិនបានតាមដាននាវាចម្បាំងទាំងពីរគ្រឿងនេះនិងបានធ្វើតាមច្បាប់និងបទបញ្ញត្តិ។
កងទ័ពជើងទឹកសហរដ្ឋអាមេរិកនិងកាណាដាបានបើកឆ្លងកាត់ច្រកសមុទ្រតៃវ៉ាន់ដូចនេះដែរកាលពីខែកញ្ញា៕
