ប្រធានាធិបតីចិនលោក Xi Jinping នឹងមិនចូលរួមសន្និសីទកំពូលរបស់ក្រុមប្រទេសមានសេដ្ឋកិច្ចជឿនលឿនទាំង២០ឬG20នៅក្នុងប្រទេសឥណ្ឌានៅសប្តាហ៍នេះទេ នៅពេលដែលទំនាក់ទំនងទ្វេភាគីរវាងចិននិងឥណ្ឌានៅមានភាពមិនល្អ។
ជាការជំនួសវិញ លោកនាយករដ្ឋមន្ត្រី Li Qiang នឹងតំណាងឱ្យប្រទេសចិននៅឯជំនួបពីថ្ងៃទី៩ដល់ថ្ងៃទី១០ ខែកញ្ញានេះ។ នេះបើតាមការបញ្ជាក់របស់ក្រសួងការបរទេសចិននៅថ្ងៃចន្ទនេះ នៅក្នុងការបញ្ជាក់តែមួយប្រយោគប៉ុណ្ណោះ នៅលើគេហទំព័ររបស់ក្រសួង។
ទំនាក់ទំនងរវាងចិននិងឥណ្ឌាបានសោះអង្គើយខ្លាំងឡើងដោយសារបញ្ហាព្រំដែនដែលមានជម្លោះ ហើយនិងការតានតឹងក្នុងរយៈពេល៣ឆ្នាំកន្លងមកដោយសារការប៉ះទង្គិចគ្នានៅក្នុងតំបន់ Ladakh ក្នុងជួរភ្នំហេមពាន្ត ដែលបានសម្លាប់ទាហានឥណ្ឌា២០នាក់និងទាហានចិន៤នាក់។ ការប៉ះទង្គិច គ្នានេះបានក្លាយជាភាពមិនចាញ់មិនឈ្នះរយៈពេលយូរនៅក្នុងតំបន់ភ្នំដ៏យ៉ាប់យ៉ឺនមួយនេះ។
ភាពប្រេះឆារក៏បានកើនឡើងដោយសារចំណងទាក់ទងខាងពាណិជ្ជកម្មនិងយុទ្ធសាស្រ្តរបស់ឥណ្ឌាជាមួយសហរដ្ឋអាមេរិកដែលជាគូប្រជែងដ៏សំខាន់មួយរបស់ចិន។ ចិននិងឥណ្ឌាក៏បានបណ្តេញអ្នកកាសែតរបស់ពួកគេរៀងៗខ្លួនទៅវិញទៅមកដែរ។
ឥណ្ឌាកាលពីពេលថ្មីៗនេះបានក្លាយជាប្រទេសមានប្រជាពលរដ្ឋច្រើនជាងគេ ដោយវ៉ាដាច់ចិន ហើយប្រទេសទាំង២ជាគូប្រជែងផ្នែកបច្ចេកវិទ្យា ការរុករកអវកាសនិងពាណិជ្ជកម្មសាកលលោក។
នៅពេលសួរថាតើហេតុអ្វីបានជាលោក Xi នឹងមិនចូលរួមសន្និសីទកំពូលនោះ អ្នកនាំពាក្យក្រសួងការបរទេសចិនលោកស្រី Mao Ning បានបដិសេធពុំព្រមឆ្លើយ។
ពួកមេបញ្ជាការចិននិងឥណ្ឌាទើបបានជួបគ្នាកាលពីខែមុន ហើយបានសន្យាថានឹងថែរក្សាសន្តិភាពនិងភាពស្ងប់ស្ងាត់នៅតាមបណ្តោយព្រំដែនដែលមានជម្លោះរបស់ពួកគេ ក្នុងការបង្ហាញនៃការខំប្រឹងប្រែងមួយដោយភាគីទាំង២ ដើម្បីធ្វើឱ្យមានស្ថិរភាពដល់ស្ថានភាពនេះ៕
