ការិយាល័យដ៏មានអំណាចរបស់ចិនបានផ្តល់ការគាំទ្រយុទ្ធសាស្ត្ររយៈពេលយូររបស់គណបក្សកុម្មុយនីស្តចិន សម្រាប់ការរីកលូតលាស់សេដ្ឋកិច្ចដោយការលើកទឹកចិត្តឱ្យអ្នកប្រើប្រាស់ទំនិញចំណាយថវិកាកាន់តែច្រើនឡើងហើយនឹងដកចេញនូវក្រុមហ៊ុនគ្មានផលិតភាពដើម្បីលើកស្ទួយ«ការរស់ឡើងវិញនៃគុណភាព»។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន AP។
សេចក្តីថ្លែងការណ៍មួយដែលបានចេញផ្សាយកាលពីថ្ងៃទី៣០ ខែកក្កដា បន្ទាប់ពីជំនួបរបស់មេដឹកនាំជាន់ខ្ពស់បំផុត២៤រូបបានព្រមានថាប៉ុន្មានខែខាងមុខនឹងក្លាយជាការលំបាកមួយ ដោយប្រហែលនិយាយបញ្ឆៀងដល់ការកើនឡើងនៃភាពមិនប្រាកដប្រជារបស់សាកលលោកមុនពេលការបោះឆ្នោតប្រធានាធិបតីសហរដ្ឋអាមេរិកនៅក្នុងខែវិច្ឆិកា។
សេចក្តីថ្លែងការណ៍បាននិយាយទៀតថា៖«នៅមានហានិភ័យជាច្រើននិងគ្រោះថ្នាក់លាក់មុខនៅក្នុងវិស័យជាច្រើន»។ សេចក្តីថ្លែងការណ៍នោះបន្ថែមទៀតថាការងារសម្រាប់កំណែទម្រង់និងស្ថិរភាពក្នុងរយៈពេល៦ខែចុងក្រោយនៃឆ្នាំនេះមាន«ភាពធ្ងន់ធ្ងរខ្លាំងណាស់»។
ការិយាល័យនយោបាយមជ្ឈិមបក្សបានសន្យាចាត់វិធានការមិនជាក់លាក់ដើម្បីស្តារឡើងវិញនូវទំនុកចិត្តនៅក្នុងទីផ្សារហិរញ្ញវត្ថុហើយនឹងជំរុញការចំណាយរបស់រដ្ឋាភិបាល បញ្ចេញអាទិភាពដែលត្រូវបានលាតត្រដាងដោយជំនួបកាន់តែធំឡើងនៃសមាជិកជាន់ខ្ពស់របស់គណបក្សកាលពីដើមខែកក្កដា។
បន្ទាប់ពីជំនួបនោះ ធនាគារកណ្តាលរបស់ចិនបានកាត់អត្រាការប្រាក់សំខាន់ៗជាច្រើនលើកហើយរដ្ឋាភិបាលបានបង្កើនទ្វេដងនូវប្រាក់ជួយឧបត្ថម្ភសម្រាប់រថយន្តអគ្គិសនីដែលត្រូវទិញដើម្បីជំនួសរថយន្តចាស់ៗដែលជាផ្នែកមួយនៃការខំប្រឹងប្រែងដើម្បីជំរុញការរីកចម្រើន។
ការអំពាវនាវរបស់ការិយាល័យនយោបាយមជ្ឈិមបក្សឱ្យគិតគូរក្រុមពលរដ្ឋដែលមានប្រាក់ចំណូលទាបនិងមធ្យមឆ្លុះបញ្ចាំងពីការសន្យាដើម្បីស្ថាបនាបណ្តាញសុវត្ថិភាពសង្គមកាន់តែខ្លាំងឡើងដើម្បីអាចឱ្យក្រុមគ្រួសារចំណាយកាន់តែច្រើនឡើងជាជាងទុកប្រាក់មិនចំណាយដើម្បីផ្តល់ការថែទាំសុខភាពនិងការថែទាំមនុស្សចាស់ៗ។ ក៏ប៉ុន្តែ ការអំពាវនាវនោះមិនបានផ្តល់ភាពជាក់លាក់ថាតើគេនឹងធ្វើយ៉ាងដូចម្តេចទេ។
លោក Julian Evans-Pritchard នៃក្រុមហ៊ុន Capital Economics បាននិយាយនៅក្នុងអត្ថាធិប្បាយថា៖«នេះជាការសន្យាមួយនៅលើក្រដាស។ ក៏ប៉ុន្តែ ការខ្វះមធ្យោបាយជាក់លាក់គេមិនទាន់ដឹងច្បាស់អ្វីដែលត្រូវការនៅក្នុងការអនុវត្តនោះទេ»។
លោកបាននិយាយទៀតថាផែនការរបស់គណបក្សអំពីថាតើនឹងធ្វើឱ្យប្រសើឡើងនូវគោលនយោបាយសាពើពន្ធរបស់ចិននៅពេលដែលកើនឡើងនូវបំណុលរបស់រដ្ឋាភិបាលមូលដ្ឋាននោះជា«ការខ្វះខាតគំនិតថ្មី»។
ផ្ទុយទៅវិញ ការសង្កត់ធ្ងន់បែរជាលើការចាត់វិធានការឱ្យកាន់តែរហ័សឡើងដើម្បីអនុវត្តគោលនយោបាយនានាដូចជាយុទ្ធនាការរបស់រដ្ឋាភិបាលដើម្បីជំរុញឱ្យក្រុមគ្រួសារដោះដូររថយន្តចាស់ៗនិងគ្រឿងប្រើប្រាស់ក្នុងផ្ទះនិងការតុបតែងផ្ទះរបស់ពួកគេដែលរួមមានការលើកទឹកចិត្តការបន្ធូរបន្ថយពន្ធនិងប្រាក់ជួយឧបត្ថម្ភសម្រាប់ការទិញដែលទាក់ទិននឹងការការប្រើប្រាស់ប្រកបដោយប្រសិទ្ធភាពនិងការកាត់បន្ថយការបញ្ចេញឥន្ធនៈផូស៊ីល។
សេដ្ឋកិច្ចចិនបានរីកលូតលាស់ក្នុងអត្រាប្រចាំឆ្នាំ៤,៧ភាគរយក្នុងត្រីមាសចុងក្រោយបន្ទាប់ពីការរីកលូតលាស់៥,៣ភាគរយនៅក្នុង៣ខែដំបូងនៃឆ្នាំនេះ។ សេដ្ឋវិទូខ្លះនិយាយថាទិន្នន័យផ្លូវការនិយាយបំផ្លើសអត្រានៃការរីកលូតលាស់ លាក់បាំងកម្សោយរយៈពេលយូរដែលតម្រូវឱ្យមានកំណែទម្រង់ទូលំទូលាយដើម្បីធ្វើឱ្យមានតុល្យភាពឡើងវិញនូវសេដ្ឋកិច្ចចេញពីការពឹងផ្អែកខ្លាំងពេកលើសំណង់និងការនាំចេញទំនិញ។
នៅក្រោមមេដឹកនាំលោក Xi Jinping ចិនបានផ្តល់អាទិភាពលើការអភិវឌ្ឍឧស្សាហកម្ម ប្រើប្រាស់បច្ចេកវិទ្យាជឿនលឿនដូចជារថយន្តអគ្គិសនីនិងថាមពលកកើតឡើងវិញ ជាយុទ្ធសាស្ត្រមួយដែលបានធ្វើឱ្យប្រទេសនេះនាំមុខនៅក្នុងវិស័យខ្លះ ក៏ប៉ុន្តែ ក៏បាននាំទៅដល់ការផ្គត់ផ្គង់ច្រើនហួសដែលឥឡូវនេះកំពុងដាក់សម្ពាធលើក្រុមហ៊ុនផលិតខ្លះ ដូចជាក្រុមហ៊ុនផលិតបន្ទះស្រូបកំដៅព្រះអាទិត្យ។
គណបក្សបានសន្យាជួយដោះស្រាយវិបត្តិក្នុងផ្នែកអចលនទ្រព្យ មួយផ្នែកដោយការលើកទឹកចិត្តឱ្យទិញអាគារ Apartments ដើម្បីផ្តល់ផ្ទះសម្បែងដែលអាចទិញបាននិងសម្រួលគោលនយោបាយប្រាក់កាសដើម្បីជួយលើកទឹកចិត្តការចំណាយនិងការវិនិយោគទុន។
ក៏ប៉ុន្តែ ឯកសារចេញផ្សាយកាលពីថ្ងៃអង្គារ ទី៣០ ខែកក្កដា ក៏បានគូសបង្ហាញពីការព្រួយកង្វល់រយៈពេលយូរដែរ។ តំបន់ជនបទនិងពួកកសិករត្រូវការការជួយឧបត្ថម្ភកាន់តែខ្លាំងឡើងដើម្បី«ធ្វើឱ្យប្រាកដថាប្រជាពលរដ្ឋនៅតាមជនបទមិនវិលត្រឡប់ទៅកាន់ភាពក្រីក្រក្នុងទំហំធំវិញទេ»។
ឯកសារនោះក៏បានថ្កោលទោសអ្វីដែលពួកអ្នកវិភាគបាននិយាយថាជាការតស៊ូរាល ដាលដល់កិច្ចផ្តួចផ្តើមថ្មីៗ ដោយនិយាយថា«ទម្រង់និយមនិងការិយាធិបតេយ្យជាជំងឺពិបាកដោះស្រាយហើយត្រូវតែកែប្រែ»ហើយឯកសារនោះបានព្រមានទៀតថាជម្លោះសេដ្ឋកិច្ចមិនត្រូវដោះស្រាយដោយ«មធ្យោបាយរដ្ឋបាលនិងព្រហ្មទណ្ឌទេ»។
ទីផ្សារចិនមិនបានបង្ហាញនូវការសាទរច្រើនសម្រាប់គោលនយោបាយនានាដែលបានបញ្ជាក់ក្នុងប៉ុន្មានសប្តាហ៍ថ្មីៗនេះ។ នៅថ្ងៃដែលឯកសារនោះបានចេញផ្សាយកាលពីថ្ងៃអង្គារ ទី៣០ ខែកក្កដា សន្ទស្សន៍ទីផ្សារភាគហ៊ុនHang Seng ក្រុងហុងកុង បានធ្លាក់ចុះ៤,៣ភាគរយក្នុងរយៈពេល៣ខែកន្លងមកនេះ ខណៈដែលសន្ទស្សន៍ក្រុងសៀងហៃបានធ្លាក់ចុះ៧,៣ភាគរយ៕
ប្រែសម្រួលដោយលោក ជឹង ប៉ូជីន
វេទិកាបញ្ចេញមតិ