ប្រធានាធិបតីចិន ស៊ី ជីងពីង (Xi Jinping) បានចេញការព្រមានដ៏ខ្លាំងមួយដល់កោះតៃវ៉ាន់និងរដ្ឋាភិបាលដែលចង់បានឯករាជ្យដែលទើបចូលកាន់តំណែងរបស់កោះនោះ។
យោងទៅតាមទីភ្នាក់ងារព័ត៌មានស៊ីនហួ (Xinhua) របស់ប្រទេសចិនបានប្រាប់ឲ្យដឹងថា លោកប្រធានាធិបតីស៊ីបានប្រាប់គណៈប្រតិភូដែលចូលរួមសន្និសីទប្រចាំឆ្នាំរបស់សភាចិននៅថ្ងៃអាទិត្យនេះថា រដ្ឋាភិបាលក្រុងប៉េកាំងនឹងរារាំងសកម្មភាពទាមទារឯករាជ្យរបស់កោះតៃវ៉ាន់ក្នុងទម្រង់ណាមួយ និងមិនអនុញ្ញាតឲ្យមានការបែកបាក់ជាប្រវត្តិសាស្រ្តកើតមានឡើងម្តងទៀតទេ។
ចិននិងកោះតៃវ៉ាន់ បានផ្តាច់ចេញពីគ្នាចាប់តាំងពីឆ្នាំ១៩៤៩ នៅពេលដែលកងទ័ពជាតិនិយមរបស់លោក Chiang Kai-shek បានរត់ចេញពីចិនដីគោក បន្ទាប់ពីចាញ់សង្គ្រាមស៊ីវិលជាមួយនឹងកងទ័ពកុម្មុយនិស្តរបស់លោកម៉ៅ សេទុង។ រដ្ឋាភិបាលក្រុងប៉េកាំងចាត់ទុកកោះតៃវ៉ាន់ជាខេត្តមួយរបស់ខ្លួន ហើយបានសន្យាយកកោះនោះមកត្រួតត្រាវិញដោយប្រើកម្លាំង ប្រសិនបើចាំបាច់។
កោះនោះស្ថិតនៅចម្ងាយ១៨០គ.មពីឆ្នេរសមុទ្រភាគអាគ្នេយ៍នៃប្រទេសចិនដីគោក ដែលជាកោះមួយស្ថិតនៅក្រោមការត្រួតត្រារបស់ជប៉ុនរហូតដល់ចប់សង្គ្រាមលោកលើកទី២ នៅឆ្នាំ១៩៤៥។
ការព្រមានរបស់លោកស៊ី ជាបញ្ហាថ្មីបំផុតមួយរបស់កោះដែលត្រួតត្រាដោយខ្លួនឯងនេះចាប់ តាំងពីលោកស្រី Tsai Ing-wen ប្រធានគណបក្សប្រជាធិបតេយ្យជឿនលឿន (DPP) របស់កោះតៃវ៉ាន់ បានឈ្នះការបោះឆ្នោតប្រធានាធិបតីនៅខែមករា ហើយបានដឹកនាំគណបក្សប្រជាធិបតេយ្យជឿនលឿនឆ្ពោះទៅកាន់ជ័យជម្នះភ្លូកទឹកភ្លូកដីនៅក្នុងការបោះឆ្នោតសភា។ លោកស្រី Tsai បាននិយាយថា លោកស្រីចង់រក្សាស្ថានភាពសន្តិភាព និងស្ថេរភាពនៅពេលបច្ចុប្បន្ននេះរវាងរដ្ឋាភិបាលក្រុងប៉េកាំង និងរដ្ឋាភិបាលក្រុងតៃប៉ិ បន្ទាប់ពីលោកស្រីចូលកាន់តំណែងនៅខែឧសភា៕
