ប្រទេសចិនកំពុងបើកការស៊ើបអង្កេតថ្មីមួយទៀតទាក់ទងរឿងជម្លោះពាណិជ្ជកម្មដ៏ជូរចត់របស់ខ្លួនជាមួយប្រទេសអូស្ត្រាលី នោះគឺការស៊ើបអង្កេតករណីទី២ជុំវិញរឿងការនាំចូលស្រារបស់ប្រទេសអូស្រ្តាលីមកលក់ក្នុងប្រទេសចិន។ រដ្ឋមន្ត្រីពាណិជ្ជកម្មរបស់ចិនបានប្រកាសកាលពីថ្ងៃចន្ទ ថា ប្រទេសចិននឹងធ្វើការស៊ើបអង្កេតកម្មវិធីមួយចំនួនរបស់រដ្ឋាភិបាលអូស្ត្រាលីទាក់ទងនឹងការជួយឧបត្ថម្ភថវិកាលើវិស័យឧស្សាហកម្មផលិតស្រារបស់អូស្រ្តាលី។ ការស៊ើបអង្កេតនេះមានរយៈពេលពេញមួយឆ្នាំ។
រដ្ឋមន្ត្រីក្រសូងពាណិជ្ជកម្មអូស្ត្រាលីលោក Simon Birmingham ចេញសេចក្តីថ្លែងការណ៍មួយប្រឆាំងនឹងការលើកឡើងរបស់ប្រទេសចិន ដែលថា កម្មវិធីស្រាវជ្រាវ និងអភិវឌ្ឍន៍របស់រដ្ឋាភិបាលអូស្រ្តាលីមានលក្ខណៈដូចជាការឧបត្ថម្ភដល់ការនាំចេញស្រារបស់ប្រទេសអូស្ត្រាលី។
លោក Birmingham និយាយថារដ្ឋាភិបាលប្រទេសអូស្រ្តាលីនឹងធ្វើការជាមួយក្រុមហ៊ុនឧស្សាហកម្មស្រាល្បីៗរបស់អន្តរជាតិ ដើម្បីបង្កើតការជំទាស់ដ៏រឹងមាំមួយប្រឆាំងតបនឹងប្រទេសចិនវិញ។
ការប្រកាសបើកការស៊ើបអង្កេតថ្មីនេះ កើតមានឡើងបន្ទាប់ពីក្រសួងពាណិជ្ជកម្មចិនកាលពី២សប្តាហ៍មុននិយាយថា ខ្លួននឹងស៊ើបអង្កេតការនាំចូលស្រាពីប្រទេសអូស្រ្តាលី ដោយចោទអ្នកផលិតស្រាក្នុងប្រទេសអូស្រ្តាលីថា បានកាត់បន្ថយតម្លៃស្រាដែលកំពុងលក់ក្នុងប្រទេសចិន ដែលនេះ បានធ្វើឱ្យប៉ះពាល់ដល់ផលិតផលស្រាក្នុងស្រុករបស់ចិន។
ចិនជាទីផ្សារធំជាងគេសម្រាប់ការនាំចូលស្រារបស់ប្រទេសអូស្រ្តាលី ដោយក្នុងនោះតម្លៃលក់សរុបកាលពីឆ្នាំទៅមានចំនួនប្រមាណជាង៧៩០លានដុល្លារអាមេរិក ឬស្មើប្រមាណ៣៧%នៃទីផ្សារទាំងមូល ហើយប្រទេសបារាំងឈរក្នុងលំដាប់ទី២ ដែលស្មើប្រមាណ២៧%នៃទីផ្សាររបស់ចិន៕
